Pue Ala hai to Isaraeli
Nani pepaturona Asaf.
78
1 Ee hangka to Isaraelingku, nipehadingi paturongku,nitaa talingami i lolitangku.
2 Ina mololitana hai ngkora pandiri
hai ina mohowarana tatangkulera
au hangkongkoiana
3 au kihadimi hai kiisami
au rapololitaamongkai toiorungki.
4 Barahe ina kiwuniangia anangki,
agaiana hangangaa kiuliangaahe pemuleangki
hinangka petoia i Pue kana i kuasaNa
hai hinangka tanda kuasa au Nababehi.
5 Napatokami hinangka atura i Yako
hai hawaNa naweimohe to Isaraeli;
toiorunta Napohawaahe
bona rapaturoahe ananda.
6 Tunggaiana bona hawa iti ina raisa pemuleanda
hai rapaliliu wori i ananda au ina mesupa hangalo,
7 bona mepoinalai worihe i Pue Ala,
hai bara ina naliu inaonda
hinangka au nababehi Pue Ala,
agaiana ina mia-mia peahe mekingki i hawaNa;
8 datihe nodo toiorunda
au matua lalunda hai meewahe,
bara tetida pepoinalainda
hai barahe matundu i Pue Ala.
9 To Epraim iamohe topepana
au handa parewa pombealanda;
i tempo pombeala melangkahe mabali.
10 Molingkaihe dandiNa Pue Ala,
hai barahe mampeulai hawaNa.
11 Naliumi inaonda ope-ope bagoNa
hai hinangka tanda kuasa au Napatongawaamohe.
12 Hinangka tanda kuasa au nababehi Pue Ala
raita-ita mata toiorunda
i tampo Masiri i pada Soan.
13 Napopogaa tahi hai Nawetahahe,
owai Napopengkahe mewali bente.
14 Mabaa, Naninihe hai gawu;
ane kaindi, Naninihe hai api.
15 Ia mobika bulu watu i pada wungi,
hai Naweihe owai raenu au handaka nodo tahi.
16 Hangko i bulu watu Napopesuwu owai,
Napopoili nodo owai matio.
17 Agaiana mobabehi liliuhe dosa i Pue Ala
hai meewahe Iria au makuasa, i pada mpadii.
18 Raoaka mampetandaka Pue Ala,
hangko i pamperapinda paande moula peundeanda.
19 Rauli i Pue Ala,
“Nabuku pae Pue Ala mopaara paande i pada wungi?
20 Tou, Nabuku mowombe bulu watu au matua,
alana moilimi owai au ngkaia
agaiana Nabuku pae moweike roti
hai mopasilolonga bau i taunaNa?”
21 KanahadiNa pohume-humenda, rumpumi Pue.
Pemuleana Yako Nahukuhe hai api,
karumpuNa au rumihi morumpahe to Isaraeli.
22 Lawi barahe mepoinalai i Pue Ala,
hai barahe moharunga pehorema hangko Iria.
23 Nauri nodo, Pue Ala mampohawaa
hinangka gawu hangko i wongko,
mobungkahi hinangka baba pewati au i langi.
24 Napopendauluahe roti manna nodo uda bona raande,
Naweihe paande hangko i langi.
25 Moandemohe rotinda malaeka;
Naweihe bakunda au handaka.
26 Himburu hangko i Mata alo Napopewui i langi;
himburu hangko i Lau Naeri hai karohoNa.
27 Napopendauluahe tadasi au handaka
nodo wungi au bara peisa teimba.
28 Tadasi iti Nanawoahe i pobambaruanda,
mantoleli i paidaanda.
29 Maandehe kabuhu-buhuanda;
apa au rapeinao Naweimohe.
30 Nauri tanganda peami maande,
bara mani rapohandaka,
31 mewali rumpumi Pue Ala irihira,
Napapatehe to Isaraeli au mangura hai maroho.
32 Nauri nodo, mia-miahe mobabehi dosa
hai barahe mepoinalai i Pue Ala
au mobabehimi tanda kuasa i lindonda.
33 Katuwonda napaope mbero-mbero Pue Ala nodo pewui himburu,
tinuwunda hopo i lalu kalanga.
34 Ane aramohe au Napapate
hangko mohaokirahe Pue Ala, menosohe hai mesule hulehe Iria.
35 Hangko rakatuinaori Pue Ala iami bulu watu rohonda,
hai Pue Ala au melumbu kamakuasaNa iami topehoremanda.
36 Agaiana moakalangihe Pue Ala hai humenda;
mampodongkoahe Pue Ala hai dilanda.
37 Lalunda bara tetida Iria,
hai barahe mekingki i dandiNa.
38 Agaiana Pue Ala maahi laluna meampungi;
Ia moampungi salanda taunaNa,
hai bara mopatuna taunaNa,
bosa belana Ia motaha sodoNa hai bara mekarumpui.
39 Nabuhuinao kaawu tamponda pea;
tuwonda nodo himburu au mewui hai barapi ina mesule.
40 Bosa belana meewahe Iria i pada wungi,
hai mopamasusahe laluNa i pada au maemba.
41 Bosa belana to Isaraeli mampetandakahe Pue Ala,
mopakoihe inaona Pue Ala Au Malelaha,
au rapenombai to Isaraeli.
42 Barahe mokatuinao kamakuasaNa
i alo kaNakabahanda hangko i iwali
43 i tempoNa mobabehi tanda-tanda kuasa i Masiri,
hai hinangka au melangaki i pada Soan.
44 Hinangka owainda to Masiri,
ope-ope owai moili Nabaliki mewali wahe
alana barapi peisa raenu.
45 Nahukuhe hai dale au mopakapepahe,
hai seo au mopakarugihe.
46 Tuda-tudanda Napaandeahe tabulu;
powianda napaandeahe kakomba.
47 Kau anggoronda Napapate hai uda mowua;
ope-ope kau aranda Napapate hai langalo baku.
48 Hinangka binatanda Napogiangaahe narumpa uda mowua,
hai pinatuwonda nahangkehe kila.
49 Nabumbuhaahe hinangka karumpuNa au rumihi,
hai Natuduhe malaeka au moanti kapate i olonda.
50 Barapi motaha-taha karumpuNa,
hai barapohe Napeparai hangko i kapate,
watanda Napogiangaa napentakai haki tangga au melangaki.
51 Ope-ope ulu ana i Masiri;
iami ana towutu i paidaanda pemuleana Hama
Napatunahe.
52 Napopelingkahe taunaNa nodo dimba,
Naninihe nodo porewu i pada wungi.
53 Naninihe hai kalene, ido hai barahe langa,
agaiana iwalinda nabalumbangihe tahi.
54 Naantihe i tampoNa au malelaha,
i paidaa au mobulu-bulu
au Naperampai sadudua anti kamakuasaNa.
55 Nawurahe ope-ope tauna
au maida i tampo iti hangko i lindonda.
Roo nodo tampo iti Nakira-kiraahe to Isaraeli taunaNa,
ido hai peisahe mampaidai bambarunda iwali.
56 Agaiana mampetandakahe hai moewahe Pue Ala Au Makuasa,
hai barahe mampeulai hawaNa.
57 Motaleukihe Pue Ala, nodo toiorunda;
barahe peisa rapoinalai nodo pana au mobengko.
58 Mopakoihe inaona Pue Ala, lawi moarohe penombaanda i anitu;
mopaarahe kamahinana laluNa lawi menombahe i watu tauna.
59 Kanaitana Pue Ala babehianda iti,
rumangkami hai rumihi karumpuNa,
hai Naae mpuumohe to Isaraeli.
60 Ia mopalehi paidaaNa i Silo,
bambaruNa au Napaidai i olonda taunaNa.
61 Ia mopalikangaa peti podandiNa rapamuru;
peawaNa Napogiangaa manawo i taienda iwali.
62 TaunaNa Napogiangaahe naande mata mpiho,
hai rumangkami i taunaNa haduduaNa.
63 Anantomoanenda naandehe api,
ido hai anantowawinenda barapohe rabua.
64 Tadulako mpenomba rapapatehe hai piho,
hai bembanda barapohe tepaka mandawi.
65 Mewali pehadimi Pue, nodo tauna au hangko mearo,
nodo surodado au nahadia hangko i kanalanguina anggoro.
66 Napopousulihe iwaliNa,
Napaara eanda hawe i hae-haena.
67 Pemuleana Yusupu Nasapuakahe,
hai pemuleana Epraim barahe Napilei.
68 Agaiana au Napilei iami pemuleana Yehuda
hai bulu Sion au Napokakaia.
69 Ia moaro souNa nodo kapangka langi
hai monono nodo tampo au Nahuami i hae-haena.
70 Ia mopilei Daudi, hawiNa,
Nakakio mai hangko i olo gimpu dimba,
71 Napopealamai Daudi
hangko i pamporewuana dimba
bona mokadipura Yako, taunaNa,
Isaraeli, taunana haduduaNa.
72 Daudi mokadipurahe i kabulana laluna,
hai naninihe i lalu kamatumpali.