Pekakae merapi rapelae
Nani petoiana Asaf
79
1 O Pue Ala, humalele tauna hangko i ngamba ntanina au barahe moisaKomosuakimohe tampo sosoraMu,
modaihihe souMu au malelaha
hai mogerohe Yerusale.
2 Mopatundehiamohe watanda taunaMu au mate raande tadasi,
hai watanda tauna au Nupokaahi rapalikangaa raande binata maila.
3 Wahenda taunaMu rapamabubu nodo owai
i humalele Yerusale
hai barahe ara au motawu.
4 Rakakabosaingkai to handarena,
rapopowoo-woo hai rapapakoingkai tauna ntanina.
5 O Pue Ala, hangkia mani kamahaena, karumpuMu irikami?
Hangkia mani kamahaena, hiri laluMu rore nodo api?
6 Bumbuha karumpuMu
i humalele tauna au barahe moisaKo;
hai i ope-ope kadatua au barahe menomba Irio;
7 lawi mopaonemohe pemuleana Yako
hai rageromi paidaanda.
8 Inee wongkamia Nupahaleangia dosanda toiorungki,
agaiana kiharunga polo maahi laluMu moampungingkai
lawi malede gagamongkai.
9 Tulungingkai, O Pue Ala, Topehoremangki,
bona hangaMu rapopeawa.
Kabahangkai hai ampungi hinangka dosangki,
bona hangaMu rapomahile.
10 Moapari hai humalele tauna hangko i ngamba ntanina mekunehe, rauli,
“Iumbami Pue Ala au rapenombai?”
Pogiangaangkai moita pehurungiMu i ope-ope tauna au maida i ngamba ntanina
au mopapatemohe tuduaMu.
11 Pehadingi peraroanda tauna au ratawani;
anti kamakuasaMu, patuwohe
lawi rapakanotomi kaina rapapatenda.
12 O Pue Ala! Hurungi babehianda to handarena
au maidahe hungku irikami;
hurungihe pitu belana hangko i pekakabosainda
au rapahawe Irio.
13 Mewali ikami, taunaMungkai, dimba au Nuporewu,
ina kipomahileKo i hae-haena
hai kitoiaKo hawe-hawe i pemuleangki.