Pekakae bona to Isaraeli tehorema
80
1 Idemi nani petoia au nakarahi Asaf hai napahawe i tadulako toponani moula nani: Bunga Bakung.
2 O Pue Ala, au mamporewu to Isaraeli,
Oio au mokambi pemuleana Yusupu nodo hambanguna dimba;
Oio au mohuda i Peti Podandi i wongkonda Kerub
patongawamide peawaMu,
3 i lindonda Epraim, Benami hai Manase.
Petudungia kamakuasaMu irikami
hai maimoKo mohoremangkai.
4 O Pue Ala, pamaroa hule katuwongki;
pokaahi wongkamia, bona tehoremangkai.
5 O Pue, Pue Ala Au Makuasa,
hangkia mani kamahaena karumpuMu rore,
hai baraKo mohaile pekakaenda taunaMu?
6 Nuweingkai poteria mewali paandeki;
owai mata au bara botu mewali paenungki.
7 Nupogiangaahe to handarena mampomberampai tampoki,
hai raele-elengkai iwalingki.
8 O Pue Ala Au Makuasa, pamaroa hule katuwongki;
pokaahi wongkamia, bona tehoremangkai.
9 Nodo hampoa anggoro
taunaMu Nulimba mai hangko i Masiri;
humalele tauna Nuwuraga
bona tamponda Nupantudai anggoro iti.
10 Nupasilolongami paidaana,
mewali mouakami kakaladu
hai mendele i humalele paidaa iti.
11 Anggoro iti mobambaongaki ope-ope bulu,
hai penga-pengana motabungi kau himburu au mapoa.
12 Daana mendele hawe i tahi,
hai ope-ope lolona hawe i owai Eprat.
13 O Pue Ala, moapari hai Nupoka walana
alana hema pea au moliu peisa mopupu wuana?
14 Nahui-hui boe kakau hawe marugi
hai raande ope-ope binata i pada.
15 O Pue Ala au makuasa, mesulemoKo mai;
petiro mai hangko i langi, hai Nupeita!
Kadipura hule hampoa anggoro ide
16 au Nutudami hai taie koanaMu
hai Nuharongimi haduduaMu
17 Ratiwingi hai rahuwemi iwali;
kiperapi karumpuMu mopatunahe.
18 Kampai tauna au Nupileimi,
ana manusia au Nurohongimi haduduaMu.
19 Ikami barapongkai ina metaleu Irio.
Kiperapi Nupatuwo pea wongkamia
bona motoiangkai hangaMu.
20 O Pue, Pue Ala au makuasa, pamaroa hule katuwongki;
pokaahi wongkamia, bona tehoremangkai.