Nani Petoia i powouki podandi
81
1 Idemi nani petoia au nakarahi Asaf au napahawe i tadulako toponani moula nani: Gitit.
2 Monani-nanimoke motoia Pue Ala, rohonta;
matana-tanamoke mampomahile Pue Ala au napenombai Yako.
3 Ponanimide hampaka nani petoia, kalea rebana,
kawi kecapi maoni-oni hihimbela hai gambusu.
4 Tawue torompe i wula wou
hai i wula kabadaa i alo mahilenta.
5 Lawi itimi au mewali hambua atura i to Isaraeli,
hampaka parenta hangko i Pue Ala au napenombai Yako.
6 Hai Napakanotomi mewali hampaka pepopainga i Yusupu,
i tempona Pue Ala lao mobungka Masiri.
Mohadimona wotu au bara kukaisanga au manguli:
7 “Kuahomi haleami hangko i owangami
hai antiami Kuingihimi hangko i taiemi.
8 I lalu kamaparimi, meraroakau
mewali Kuhoremamokau;
Kuhanaikau hangko i lalu gumpata.
Kupetandakamokau i owai Meriba*.
9 Ikamu taunaNgku nipehadingiNa,
ina Kuweikau pepopainga;
ikamu to Isaraeli,
Kupeinao bona nipehadingiNa!
10 Inee ara anitu i olomi
hai ineekau mampenombai apa pea
au rapenombai tauna ntanina.
11 Ikomi Pue, Pue Ala au nipenombai
au moninikau mesuwu hangko i tampo Masiri.
I tempomi marimi Kupaimpohikau.
12 Agaiana taunaNgku barahe mampehadingi wotuNgku
hai to Isaraeli barahe mehadi Iriko.
13 Idomi hai Kupogiangaamohe matua lalunda;
Kupalikangaamohe mampeulai peundeanda haduduanda.
14 Ane kerapehadingiNa taunaNgku
hai to Isaraeli mampeulaihe rara au Kuuliangaahe.
15 I tempo iti peami iwalinda ina Kuhuhuli hai timalinda Kunangihe.
16 Ope-ope tauna au mokahihiNa,
Iko Pue, ina Kupopengkoruhe Iriko;
itimi hukuanda i hae-haena.
17 Agaiana taunaNgku ina Kuweihe pare au tepamaroa
hai ina kupamabuhuhe hai tinaha hangko i pandulu.”