Pekakae i Pue Ala moewa iwali
83
1 Idemi nani petoiana Asaf.
2 O Pue Ala, moapari hai mandii-ndii peaKo,
moapari hai roo-roo peaKo;
moapari hai mangkalapui ponda peaKo O Pue Ala.
3 Peita! IwaliMu mogewo-gewomohe,
ihira au mokahihiKo mangewamohe.
4 Mopahintuwumohe pekirinda au kadake moewahe taunaMu,
hai mogombohe moewa taunaMu au Nukampai.
5 Rauli, “Tapatuna hahamohe to Isaraeli,
bona datipi rakakatuinao hanganda!”
6 Tou mpuu mogombomohe mopahintuwu lalunda,
modandimohe moewaKo:
7 to Edom, to Sumaila,
to Moabi, to Hagari,
8 to Gebal, to Amon, to Amale,
to Pilisitea hai to Tirus.
9 Nodo wori to Asyur, megulukimohe irihira
moharongihe pemuleana Looti.
10 Nupanodo peamohe to Midea,
nodo Sisera, nodo Yabin hungku i owai Kison,
11 au rapamaropumohe i En-dor,
hai watanda rapalikangaa magoro naporombu tampo.
12 Tadulakonda Nupanodohe Oreb hai Seeba;
tomakuasanda Nuhukuhe nodo Seba hai Salmunab,
13 au mangulihe,
“Maimokau tapaidaimi tampo paidaana Pue Ala.”
14 O Pue Ala, Nupanodohe lapa au tehimbaroka,
nodo deami au nawui himburu.
15 Nodo api au moande pandulu
hai rore api au mopapumpu ope-ope bulu,
16 wulaihe hai himburuMu au rumihi,
patingkarahe hai alimuruMu.
17 O Pue, pogiangaahe rakakabosai,
bona mopangakuhe kamakuasaMu.
18 Pogiangaahe maea hai wulunga i hae-haena
palikangaahe mantodiha i lalu kamaeanda.
19 Kuharunga, ina raisa kaOiona pea au mampohanga Pue
Au Makuasa i humalele dunia.