Mokabilai paidaana Pue Ala
84
1 Idemi nani petoia au rakarahi to Korah au rapahawe i tadulako toponani moula nani Gitit.
2 Rumihi mpuu karakagoengina souMu Pue Ala
O Pue au makuasa i humalele dunia!
3 Lalungku rumihi mpuu pokabilaina souMu;
tuwongku hai watangku matana-tana
motoia Pue Ala au tuwo.
4 O Pue au makuasa i humalele dunia,
O Datungku, Pue Ala au kupenombai,
mogalori dena molambi womi hambua paidaa
hai balolae molambi haogu hara, pamboliana ananda
hungku i meja watu pohuwea popenomba Irio.
5 Morasimohe tauna au maida i souMu,
au motoia liliuhe hangaMu.
6 Morasi hai matanahe tauna au rohonda hangko Irio,
au ara tangara lalunda lao i bulu Sion.
7 Ane moliuhe i lembo Baka,
ina rapopewali paidaa au napoilii owai;
hai uda au nguru-nguruna i tempo keuda
ina mopaara pewati au ngkaia.
8 Kamahae-haea karoho-rohoarahe molumao
duuna hawehe i lindona Pue Ala i bulu Sion.
9 O Pue, Pue Ala au makuasa i humalele dunia,
pehadingi pekakaengku,
O Pue Ala au napenombai Yako,
Nuhaile peraroangku.
10 O Pue Ala, Nuwati datungki au mamperuruingkai;
kamata tauna au Nutawimi.
11 Maroa mani hangaloa i tabangaa souMu
pane hasabu alona i paidaa ntanina;
maroa mani meangka i baba souna Pue Ala au kupenombai
panena maida i sounda tauna au kadake.
12 Lawi Pue Ala iami alo hai labanta
Nakiraiake ahi hai pebila;
Ia bara motaha kamaroaNa
i tauna au malelaha katuwonda.
13 O Pue au makuasa i humalele dunia,
morasimohe tauna au mepoinalai Irio!