Pekakae i Pue Ala bona to Isaraeli rahorema
85
1 Idemi nani petoianda to Korah au rapahawe i tadulako toponani.
2 O Pue, mowatimoKo taunaMu i tampoMu
Nupamaroa hulemi tuwonda pemuleana Yako.
3 Nuampungimi dakenda taunaMu;
Nuingihi hinangka dosanda.
4 Nurempekimi karumpuMu au rumihi;
Nupamalulumi laluMu au tangana rengke.
5 O Pue Ala topehoremangki,
pamaroa hule katuwongki;
ineemoKo rumpu irikami.
6 I hae-haenamoKo pae rumpu irikami?
Nupaliliumi pae karumpuMu hawe i pemuleangki?
7 Barapi pae Nupokana mopamaroa hule katuwongki
alana taunaMu matanahe anti petulungiMu?
8 O Pue, Nupopaitaa wongkamia ahiMu au bara mokahopoa,
hai pehorema hangko Irio Nukiraiangkai.
9 Ina mampehadingina apa au nauli Pue Ala,
Ia modandimi roa ngkatuwo irikita taunaNa,
tauna au matundu Iria, agaiana kantulita ineemi tahule-hule.
10 Tou mpuu, pehorema au hangko i Pue Ala, hungku i tauna au mengkoru Iria,
alana peawa tongawa i tampota.
11 AhiNa ina radoko tauna au matundu liliu Iria,
notoNa ina mopaara roa ngkatuwo.
12 Kamadudu ina mentumbu hangko i dunia
hai kamanoto ina mepetiro mai hangko i suruga.
13 Pue ina mokiraia worike au maroa,
hai tampota ina mokiraiake wuana.
14 Kamanoto ina molumao ioruna Pue,
hai ina mopasilolonga raraNa.