Pekakae merapi tulungi
Pekakaena Daudi
86
1 O Pue, pehadingi pekakaengku hai Nuhanaina,lawi tuwo maparina hai meahi-ahina.
2 Nukampai katuwongku, lawi iko tauna au Nupokaahi;
horema tuduaMu ide au mepoinalai Irio.
3 Oiomi Pue Ala au kupenombai,
O Pue, pokaahi wongkoia,
lawi hahangaloana mekakae Irio.
4 O Pue, pamatana laluna tuduaMu
lawi tuwongku kupaisare Irio.
5 O Pue, maroa laluMu hai Nuunde meampungi
ahiMu bara mokahopoa i ope-ope tauna au meraroa Irio.
6 O Pue, pehadingi pekakaengku;
Nuhaile wongkoia peraroangku.
7 I alo kaparingku meraroana Irio, lawi Nuhanaina.
8 Bara ara au himbela hai Oio hangko i olonda anitu;
O Pue, bara ara au nabuku mobabehi nodo au Nubabehi.
9 O Pue, humalele tauna au Nupopewali ina maihe motumpa menomba Irio,
hai ina motoiahe hangaMu.
10 Lawi mahile kuasaMu
hai mobabehiKo au mewulungai;
batena pea Oio Pue Ala.
11 Tudungiana raraMu O Pue,
bona tuwona moula ngkoraMu
pamoleogu lalungku
bona mengkoruna Irio.
12 O Pue, Pue Ala au kupenombai,
kutoiaKo i sukana kabulana lalungku,
hai kamahilena hangaMu
ina kupolinga i hae-haena.
13 Lawi ahiMu au bara mokahopoa mahile iriko,
hai Nuoremona hangko i paidaa tomate au kaladu.
14 O Pue Ala, tauna au mampempemahilehe, ina mobungkana,
hai tauna au masilaka hirampumohe
ina mopapatena hai barapoKo rapoinalai.
15 Agaiana Oio Pue, Pue Ala, mepokaahi hai mepokakaiaKo,
sabaraKo, bukeKo kamaahi hai maduduKo.
16 Pembalilingina hai pokaahi wongkoia,
Nuweina rohomu hai Nuhoremana
lawi ide iko ananana tuduaMu au towawine.
17 Nukiraiana hampaka tanda kamaroa,
bona raita ope-ope tauna au mokahihina alana maeahe;
lawi Oio, O Pue, Nutulungi hai Nupalindomona.