Pekakae i lalu kapari
88
1 Idemi nani petoianda to Korah au rapahawe i tadulako toponani moula nani: Mahalat Leanot. Idemi nani pepaturona Heman to Ezrahi.
2 O Pue, Pue Ala au mohoremana,
mabaa meraroana;
kaindi mekakaena Irio.
3 Kuperapi pekakaengku hawe Irio;
pehadingi peraroangku,
4 lawi watangku buhumi hai kapari
hai tuwongku hungkumi i dunia tomate.
5 Nodomona tauna au ina mendaulu i kalolu talumba,
nodona tauna au barapi ara rohona.
6 Rapalehimona i olonda tomate
nodohe tauna au rapapate au tedampahe i lalu talumba;
nodohe tauna au Naliumohe inaoMu,
lawi tebotukimohe hangko i kuasaMu.
7 Nupopaidamona i kalolu talumba au malobu,
i lalu kamakaindi i paidaa au kaladu.
8 Terimbikina hai kamasodoMu au rumihi,
hai hinangka balumba karumpuMu Nupoporumpingina.
9 Nupakaraomohe hangko iriko ope-ope himadangku;
Nupopewalimona rapokarika,
tetahana hai barapona peisa mesuwu.
10 Lurumi matangku anti kapari;
O Pue, meraroana alo-alona,
kutandoami taiengku Irio.
11 MobabehiKo pae au metingkarai i tomate?
Mearo hulehe pae tomate motoiaKo?
12 Peisa pae ahiMu rabambari i lalu talumba?
Rapahawe pae kamaduduMu i paidaa tomate?
13 Raisa pae tauna kamakuasaMu au melangaki i lalu kakaindiana?
Peisa pae kamanotoMu rapahawe i lalu paidaanda tauna au barapohe rakatuinao?
14 Agaiana ide iko, O Pue, meraroana Irio merapi tulungi,
madondo pekakaengku kupahawe Irio.
15 O Pue, apari pongkana hai Nuaena?
Moapari hai Nugoli lindoMu hangko iriko?
16 Hangko koi-koipona mapari hai nakulele liliuna kapate,
maparimi pehadingku mohalea pehukuMu,
ido hai barapi ara peharungangku.
17 KarumpuMu au rumihi morumpana;
pehukuMu au melangaki mopakarugina.
18 Hahangaloa nalaboana karumpuMu
nodo owai meumbala mobalumbangina.
19 Hihimadangku au makei, Nupakaraomohe hangko iriko,
kamakaindi pearai au kupohimada.