Katungkuna Pue i Daudi
89
1 Idemi nani pepaturona Etan, to Ezrahi.
2 O Pue, ahiMu au bara mokahopoa
ina kuponani i hae-haena,
katungkuMu ina kubambari i pemuleangku
3 lawi ahiMu au bara mokahopoa hawe i hae-haena
katungkuMu mantaha nodo langi.
4 MongkoramoKo, Nuuli,
“Kupakarohomi dandiKu hai tauna au Kupilei;
mosumpamoNa i Daudi, tuduaNgku:
5 Pemuleamu ina Kupatogo hawe i hae-haena,
hai ina mohuda liliuhe i kadera kadatuamu.”
6 O Pue, hinangka au maida i suruga motoia bagoMu au mewulii
hai katungkuMu rapolingahe malaeka i suruga.
7 Hema pae i langi au nodo Pue?
Hema pae au himbela hai Pue
i olonda topaida i suruga?
8 O Pue Ala, rabilaKo i olonda malaeka au malelaha,
hai rapokalanga mpuuKo,
meliu hangko i ope-ope au ara i suruga.
9 O Pue, Pue Ala Au Makuasa,
hema au himbela rohona hai Oio?
O Pue, tungkuKo i paka-pakana.
10 Oio moparenta balumba tahi;
ane mapangka balumbana
Oio au mopamaora.
11 Oiomi au mopapate Rahaba,
hai taieMu au maroho,
Nuhawu-hawuhe iwaliMu.
12 Langi hai tampo Oio ampuna
dunia hai hinangka ihina; Oio au mobabehi.
13 Oiomi au moteru hinangka au ara ntanda i Raa hai ntanda i Lau;
bulu Tabor hai bulu Hermon mampokatanahe hangaMu.
14 Mahile mpuu kuasaMu,
kamarohoMu bara ara kahimbelana!
15 Kanoto hai atura iami ariina kadatuaMu
ahi hai kamadudu molumao ioruMu.
16 Morasimi humalele tauna au motoiaKo i lalu katana-tana,
hai au tuwohe i pewangkaMu, O Pue.
17 Anti kamaroaMu, hahangaloahe matana-tana;
anti kamanotoMu, rapomahile liliuKo.
18 Lawi Oiomi rohonda au meawa,
hai anti kamaroaMu Nupopenangimongkai.
19 Lawi labanta iami tauna au napilei Pue
hai datunta iami au natawi Pue Ala
au malelaha au rapenombai to Isaraeli.
20 Hangkoia mololitaKo i lalu pangipi
i tuduaMu au madudu, Nuuli,
“Kuweimi roho i hadua tadulako pombeala;
Kuangkami hadua datu hangko i olonda tauna bosa.
21 Kulambimi Daudi tuduaNgku,
Kutawimi hai lanaNgku au malelaha.
22 Ia Kunini hai taiengku;
Kabuhuangku mewali rohona.
23 Ia bara ina ranangi iwali,
hai bara ina rapopeahi-ahi tauna au kadake.
24 Ope-ope iwalina ina Kuropuihe i lindona,
hai hema au mokahihi ina Kupapate.
25 KamaduduNgku hai ahiNgku mamporangai liliu,
hai ina Kutambai kamakuasana.
26 Kadatuana ina Kupamaemba hawe-hawe i tahi
hai i ope-ope owai.
27 Hai ia ina mololita Iriko, nauli,
‘Oiomi Umangku, Pue Ala au kupenombai,
bulu watu rohongku hai topehoremangku.’
28 Hai ia ina Kupopewali wori anaNgku au towutu,
au Kuwei kamakuasa melumbu i olonda datu i dunia.
29 Ia Kukadipura hai ahingKu au bara mokahopoa
hai dandiKu iria maroho.
30 Kadatuana Kupakaroho hungkana langi ara i wongko tampo,
hai ina rapohudai pemuleana i hae-haena.
31 Agaiana ane pemuleana moliungihe hawaNgku
hai barahe moula aturaNgku i lalu katuwonda,
32 hai ane popakanotoNgku ralingkai
hai barahe mampeulai hinangka hawaNgku,
33 ina Kuhukuhe hai pekandangi anti kamasalanda
hai Kupoparumpaahe kapari anti kamadosanda.
34 Agaiana Iko, ina mampokaahi liliuNa Daudi
hai baraNa moliungi dandiKu.
35 PodandiKu iria bara ina Kubaliki,
hai apa au Kuhowarami bara ina Kudii hule.
36 Anti kamalelahaNgku hambela peaNa mosumpa,
baraNa ina modongko i Daudi.
37 Kadatuana ina mantaha i hae-haena,
hai pemuleana ina mampohudai kadera kadatuana
hungkana ara mani alo.
38 Kadatuana ara i hae-haena nodo wula,
hambua sabi au mewangka liliu i wongko gawu.”
Poteria i kamanangina datu
39 Agaiana Oio haduduaMu rumpumoKo i tauna au Nupileimi,
moaemoko hai motendemoKo datu.
40 PodandiMu i tuduaMu Nubotuki,
songko kadatuana Nutende i lalu reta.
41 Ope-ope wala wanua Nudungkahe,
hinangka bentena Nupamarupu.
42 Ope-ope tauna au melempo i rara morampakihe anu-anuna,
hai rakakabosaimi hintonggina.
43 Nupopenangihe iwalina
hai Nuweihe katana-tana.
44 Mata mpihona Nupahulea,
hai barapi Nupamantaha i lalu pombeala.
45 Kuasana au maroho Nuhomboki;
kadera kadatuana Nuweduka i tampo.
46 Nupasosoe kamangurana,
Nubalungkuhi hai ea.
Pekakae merapi pehorema
47 O Pue, hangkia mani kamahaeMu mentabungi?
Hawe impira karumpuMu lolaa nodo api?
48 Nukatuinao kasosoena tinuwungku;
hampalai pea katuwonda tauna au Nupopewali.
49 Hema pae tauna au tuwo monono hai barapi ina mate?
Hema pae au nabuku mohorema watana hangko i paidaa tomate?
50 O Pue, iumbami ahiMu au hangkoia
au Nudandimi i Daudi hai sumpa?
51 O Pue, katuinao noumba karakakabosaina tuduaMu ide.
Mohaleana pepapakoinda humalele tauna i dunia
52 O Pue, iwaliMu mokakabosai Datu au Nupilei;
iumba pea kalaoana ia rapapakoi.
53 Tetoiami Pue, hawe i hae-haena.
Amin, amin.