Sura Kaiba
(Petoia 90–106)
Pue Ala iami peongaa manusia
90
1 Idemi pekakaena Musa, tuduana Pue Ala.
O Pue, oiomi peongaangki
mepongka i ulu bubungki hawe i pemuleangki.
2 Hangko bara manihe bulu Nupopewali,
hangko damani tampo hai langi Nubabehi,
Oiomi Pue Ala au monono
au bara ara pepongkana hai kahopoana.
3 MampopesuleKo manusia
mewali awu tampo, hai mololitaKo, Nuuli,
“Ee manusia, mesulemokau i karateruami!”
4 Lawi i peitaMu hasabu parena himbela pea hai poliuna alo imaindi,
himbela pea kamahaena gilirana hadua topekampai kaindi.
5 MoilihaKo manusia; nodo peahe pangipi,
nodo hehi au motumbe,
6 ane madondo tuwo hai memboka,
agaiana ane kalumba, mempogo hai malaumi.
7 Anti karumpuMu wulungangkai;
anti karumihina pehukuMu, maropungkai.
8 Nupailalu liliu kamasalangki i lindoMu,
dosangki au tewuniangi tongawa Irio.
9 Tou, tinuwungki sosoe anti karumpuMu
katuwongki hampalai pea nodo pewusi inao.
10 Kamahaena tuwongki pitu pea pulona parena;
ane marohongkai peisa hawe ualu pulona parena.
Agaiana batenami kapari hai pantodiha au kilambi,
lawi holiga poliuna hai tunamongkai.
11 Hema au moisa amimi kamarohona karumpuMu
hai langa i pehukuMu?
12 Nupopaingaangkai noumba
kasosoena tinuwungki ide
bona mewalingkai tauna au matopa.
13 O Pue, hangkia mani haena karumpuMu?
Nuhaile wongkamia; Nupokaahi wongkamia tuduaMu.
14 Madondo Nupamabuhu wongkamia hai ahiMu,
bona matanangkai hai monani liliungkai hawe i kahopoana katuwongki.
15 Kiharunga Nuweingkai tempo katana hintoto hai alo-alo kapari
au kipolumaongimi i lalu katuwongki.
16 Kiperapi Nupopaita wuana bagoMu irikami tuduaMu
hai peawaMu au mahile i pemuleangkihe.
17 O Pue, Pue Ala au kipenombai,
Nuwati hinangka bagongki bona maroa powuana.