I lalu pekampaina Pue Ala
91
1 Tauna au meonga i Au Makuasahai au maida i lalu pekampaiNa,
2 ina mololita i Pue, nauli,
“Oiomi peongaangku hai topekampaingku,
Pue Ala au kupoinalai.”
3 Iami au ina mokabahako hangko i kapari au tewuni
hai hangko i haki tangga au moanti kapate.
4 Ina Nataobokiko, hai ina meongako i woi kapiNa;
kamaduduNa nodo laba au mokampaiko.
5 Ineemoko langa i tokadake i tempo kaindi
ba pebungka i tempo mabaa,
6 i haki tangga au melelehi i tanga kaindi,
hai haki melimba-limba au merumpa tanga pualo.
7 Nauri hasabu tauna mate i holamu
hai hampulo sabuna tauna madampa ntanda i koanamu,
agaiana oio haduduamu barako ina marugi.
8 Ina nutotoki pea hai matamu haduduamu,
ina moitako tauna kadake molambi pehurungi,
9 lawi Pue iami topekampaimu,
Au Makuasa nupopewalimi peongaamu.
10 Mewali barako ina narumpa kapari
hai haki bara ina hungku i bambarumu,
11 lawi Pue Ala motuduhe malaekaNa
mokampaiko iumba pea kalaoamu.
12 Ihira au ina motangkeko,
bona datiko tehube i watu.
13 Ile hai singa ina nulingkai,
ina motampaidokiko ana singa hai panawui.
14 Nauli Pue,
“Tauna au mentaka lalunda Iriko ina Kuhoremahe
tauna au mepoinalai i hangangKu ina Kukampai.
15 Ane meraroa Iriko, ina Kuhanai
i tempo kapari ina Kutulungi,
ina Kuhorema hai Kupopewali raadai.
16 Ina Kupamatana hai kamatinuwu
hai ina Kupopaitaa pehorema au hangko Iriko.”