Pue iami topebotusi au manoto
92
1 Idemi nani petoia au raponani i Alo Pengkarooangaa.
2 Maroa mpuu mamponaningkai katana lalu Irio Pue
hai motoiangkai hangaMu,
O Pue Ala Au Makuasa,
3 ahiMu au bara mokahopoa kibambari i tempo madondo,
hai kamaduduMu i tempo kaindi,
4 hai mokawi ngkulele,
gambusu hai kecapi
5 lawi hinangka au Nubabehi mopamatana lalungku O Pue,
monanina matana-tana anti babehiaMu au maroa.
6 Mahile mpuu bagoMu, O Pue,
kaladu mpuu hinangka tangara laluMu,
7 bara ina naisa tauna au ntuli
hai tauna membongo bara ina mongilo.
8 Nauri tauna kadake motumbe nodo tuda-tuda
hai tauna au mobabehi dake tetambai kapebukunda,
ihira batena ina rapatuna i hae-haena.
9 Agaiana Oio, Pue, makuasaKo i hae-haena.
10 Kiisa Pue, iwaliMu ina rapatunahe;
ope-ope tauna au kadake ina rahawu-hawuhe.
11 Agaiana Nurohongina nodo karoho baula,
Nuwatina hai katuwo au maroa.
12 Kamananginda iwalingku kuitami,
kuhadimi hinangka peraroanda, tauna kadake au moewana.
13 Tauna manoto ina tuwo maroa nodo handutu,
katuwonda ina marudu nodo kau himburu i Libanon.
14 Nodohe kau au ratuda i souna Pue;
motumbehe i tabangaa souna
Pue Ala au tapenombai.
15 Nauri saemohe, mowua manihe,
malewau liliu hai maruduhe.
16 Ope-ope iti, mopatongawa kamanotona Pue.
Iami bulu watu pentabungiangku;
Iria bara ara dake.