Pue Ala iami Topebotusi au manoto
94
1 O Pue Ala, Oiomi Pue au mohurungi dake;Peangkamide mehurungi, O Pue Ala.
2 Pearomide, O, Topebotusi humalele dunia;
hukuhe tauna au mampemahile
hintoto hai babehianda.
3 O Pue, hawe impira tauna kadake ina matana-tanahe?
Hangkia mani kamahaena, O Pue?
4 Mohowarahe lolita au makasara,
hai mampampemahileihe kakadakenda.
5 O Pue, taunaMu rapopeahi-ahihe,
hai taunaMu au Nupilei rapohawihe.
6 Tobemba hai tohandarena rasambalehe,
hai anangkoi au ilu puha rapapatehe.
7 Mololitahe, rauli,
“Babehianta ide bara naita Pue,
hai bara napailalu Pue Ala au napenombai Yako.”
8 Nipeita, ikamu au bara mebaa,
Moapari barakau mampopobundu pekirimi?
9 Ia au mobabehi talinga,
ara mbulimi pae bara mehadi?
Ia au moteru mata,
ara mbulimi pae bara meita?
10 Ia au mokambaroa humalele tauna,
ara mbulimi pae barahe Nahuku?
Ia au mopaturo ope-ope tauna
ara mbulimi pae bara mapande i hinangkana?
11 Pue mangisa hinangka tangara lalu manusia;
katouana, ope-ope iti mbero-mbero pea.
12 O Pue, morasimi tauna au Nukambaroa,
hai tauna au Nupaturoahe aturaMu.
13 I alo-alo kamasusa Nupatinda laluna,
alana kalolu rakae, rapotawui tauna kadake.
14 Lawi Pue bara ina mokalambahi taunaNa,
hai taunaNa haduduaNa bara ina Napalehi.
15 Atura ina rapopolumao hule mepangka i kanoto,
ina raula ope-ope tauna au bula lalunda.
16 Hema au mamperuruina hangko i tauna au kadake?
Hema au mamporangaina moewa tauna au mobabehi dake?
17 Ane bara Pue au motulungina,
manoto kematemona.
18 I tempoku mampekiri kaina manawongku,
ahiMu au bara mokahopoa mopakaroho peangkaku, O Pue.
19 Ane lalungku masusa hai wiora,
pepalindoMu mopamatanana.
20 BaraKo mampohintuwua topebotusi au motengko,
au motangara dake hai moewa atura.
21 Hintuwuhe moewa tauna manoto,
hai mohuku matehe tauna au bara masala.
22 Agaiana Pue iami benteku,
hai Pue Ala au kupenombai iami bulu watu pentabungiangku.
23 Ia ina mohurungi tauna kadake hintoto hai babehianda;
anti kakadakenda, ina Napatunahe.
Pue, Pue Ala au tapenombai, ina moropuihe.