Tabila Pue hai tapeulai
95
1 Maimokau mampomahileke Pue,monani-nanike mampokatana bulu watu Topehoremanta.
2 Maikau laoke mampohidupaa Pue hai nani katana lalu;
tapomahilemi Ia hai nani petoia,
3 lawi Pue, iami Pue Ala au meawa,
Datu mahile au makuasa ntepuu hangko i ope-ope anitu.
4 Hinangka au i lapi tampo, arahe i lalu kuasaNa;
ope-ope wowo bulu Ia haha ampuna.
5 Tahi Ia ampuna, lawi Ia au mampopewali
hai lore Ia wori au moteru.
6 Maimokau motumpake menomba Iria,
molingkuduke i lindona Pue au mampopewalike.
7 Lawi Iami Pue Ala au tapenombai,
ikitami taunaNa au Nakadipura, nodo dimba au Naporewu.
Alo ide ane mohadikau wotuna Pue,
8 Inee nipamatua lalumi nodohe ulu bubumi temponda i Meriba
hai temponda i Masa i pada wungi.
9 I tempo iti toiorumi mampetandakaNa,
moleri raitami tanda kuasa au Kubabehi.
10 I lalu iba pulona parena malutamoNa irihira,
ido hai mololitaNa, Kuuli, “Ihira ide tauna au membatu
hai barahe mampeulai hinangka aturaNgku.”
11 “RumpuNa hai mosumpaNa, Kuuli,
Barahe ina mesua i paidaa maroa au Kudandiamohe.”