Pue Ala, Datu au manoto i humalele dunia
96
1 Ponanimide nani au wou i Pue;ee tauna i humalele dunia, monanimokau i Pue!
2 Monanimoke motoia Pue, tapomahilemi hangaNa,
alo-alona tabambari pehoremaNa.
3 Tabambarimi peawaNa i olonda humalele tauna;
tapatolelemi tanda kuasa au Nababehi i ope-ope tauna,
4 lawi Pue makuasa ntepuu, masuka ratoia;
Ia rapokalanga melumbu hangko i ope-ope anitu.
5 Hinangka anitu au rapenombai humalele tauna
iami anitu au bara ara kuasana,
agaiana Pue mampopewali langi.
6 Ia natoleliki kameawa hai kamasuku;
souNa au malelaha buke kamakuasa hai peraea.
7 Ee humalele tauna i dunia, toiami Pue,
nipolingami peawaNa hai kamarohoNa!
8 Maimokau motoiake hangana Pue au meawa,
hai niantimi popenomba i tabangaa souNa.
9 Menombakau i Pue i lalu kamalelaha.
Ee humalele dunia, hangangaa mengkorukau Iria.
10 Nibambarimide i humalele tauna i dunia, “Pue iti Datu!
Dunia maroho, bara moenggo.
Ia ina moparesa humalele tauna hai kanoto.”
11 Ee hinangka au ara i langi hai i tampo, matana-tanamokau!
Ee tahi hai ihina, mogumurumokau.
12 Ee pada hai hinangka tuda-tudana, matana-tanamokau,
hinangka kau i pandulu ina monani-nani.
13 Ina monani-nanihe i lindoNa Pue,
lawi Ia mai moparenta dunia;
hai ina mobotusi humalele tauna i lalu kanoto.