Pue iami Datu au meawa
97
1 Pue iami Datu!Tampo hangangaa monani-nani
hai ope-ope lewuto matana-tana.
2 Ia nabalungkuhi gawu au marimbongo;
kanoto hai kahintimba iami pepangkaa poparentaNa.
3 Api mangulele i lindoNa
hai mopampupuhe iwaliNa au motoleliki.
4 KilaNa mopamabaa dunia,
moringkimi tampo moita.
5 I lindona Pue, Pue au makuasa i humalele dunia
hinangka bulu magonu, nodo taru au radedai.
6 Langi mobambari notoNa
hai humalele tauna i dunia moita kameawaNa.
7 Ope-ope tauna au menomba i anitu ina molambihe ea,
tauna au mampampemahileihe penombaanda i anitu ina rapapakoihe.
Ope-ope anitu ina molingkuduhe menomba i lindona Pue.
8 O Pue, tauna au maida i Sion
hai ope-ope wanua i Yehuda matanahe
anti pohadinda kamanotona pobotusiMu.
9 Lawi Oiomi, Pue Au Makuasa i humalele dunia,
Oio au melumbu karapomahileMu hangko i ope-ope anitu.
10 Ee ikamu au mampokaahikau Pue, nikahihimi dake
lawi Ia au mokadipura tuwonda tauna au Napokaahi,
ina Nakabahahe hangko i taienda tauna au kadake.
11 Pewangka tongawa i tauna au manoto,
hai katana lalu mentumbu i tauna au bula laluna.
12 Ee tauna au bula laluna, matanamokau
anti apa au Nababehi Pue,
hai nioremi wamba pepomahile i Pue Ala au malelaha.