Kutoia Pue hangko i lalungku
103
1 Nanina Daudi.
Toiami Pue, O tuwongku,
toiami hangaNa au malelaha, O lalungku.
2 Toiami Pue, O tuwongku,
hai inee naliu inaongku hinangka kamaroaNa.
3 Ia moampungi hinangka kamasalangku,
hai mopakaoha ope-ope hakingku.
4 Nahoremana hangko i paidaa tomate,
hai Nawatina hangko i kabulana laluNa.
5 Ia mopabukei peundeaku hai apa au maroa
bona maroho liliuna nodo tadasi ngkaia.
6 Pue mampopolumao kanoto hai kahintimba,
i ope-ope tauna au narumpa kapari.
7 Ia mampotudoa rara au manoto i Musa,
hai babehia au maroa i to Isaraeli.
8 Pue buke kamaahi hai kabula lalu,
kasabaraNa hai pepokakaiaNa bara tehoka.
9 Pue bara mepailalu,
hai karumpuNa bara i hae-haena.
10 Barake Nahuku hintoto hai dosanta;
barake Nahurungi hintoto hai salanta.
11 Agaiana noumba olo tampo hai langi,
nodo wori kamahilena ahina Pue
i tauna au mengkoru Iria.
12 Nodo kakaraona Mata alo hai Katampua alo,
nodo wori kakaraona dosangki Nuweiha.
13 Nodo uma mampokakaia anana,
nodo wori pepokaahina Pue i tauna au mengkoru Iria
14 lawi Ia haduduaNa moisa katuwonta,
Nakatuinao ikita awu tampo peake.
15 Katuwo tauna nodo pea hehi;
nodo bunga i tanga mpada.
16 Ane narumpa himburu, barapi ara,
mogalori paidaana barapi moisa.
17 Agaiana ahina Pue au bara mokahopoa
tongawa i tauna au mengkoru Iria
hangko i nguru-nguruna hawe i hae-haena;
kamaroaNa bara ina tebali hawe i pemuleanda
18 i tauna au maroho pokingkinda dandiNa,
hai au mampeulai liliuhe parentaNa.
19 Pue mopatogo kadatuaNa i suruga,
poparentaNa makuasa i paka-pakana.
20 Ee ope-opekau malaeka, nitoiami Pue.
Ee ope-opekau au maroho au mampeulai parentaNa,
hai au mohadi wotuNa, nitoiami Pue.
21 Ee ope-opekau surodadoNa au i suruga, nitoiami Pue.
Ee tuduaNa au mampopolumao peundeaNa, nitoiami Pue.
22 Ee hinangka au Napopewali, toiami Pue
i humalele poparentaNa, toiami Pue,
toiami Pue, O katuwongku!