Petoia i Topeteru
104
1 Toiami Pue O tuwongku!O Pue, Pue Ala au kupenombai, makuasa mpuuKo!
MampowaruKo kameawa hai kamasuku.
2 MampokomoKo pewangka;
moteruKo langi nodo bambaru.
3 MoaroKo souMu i wongko owai i langi,
gawu Nupopewalihe nodo karetaMu;
mampesawiiKo kapi himburu.
4 Himburu Nupopewali tuduaMu,
kila Nupopewali topekadipuraMu.
5 Nuhua tampo i pohudaana,
ido hai bara ina modua hawe i hae-haena.
6 Nubobongi hai tahi maemba,
owaina buke hawe i ope-ope wowo bulu.
7 I tempona Nuparenta owai iti moili,
matio poilina anti kakebuuna wotuMu nodo gumpata.
8 Owai mengkahe i bulu, mendaulu i lembo
i paidaa au Nupakanotoahe.
9 Tampana poilianda Nupakanoto,
datihe moili hule molaboa tampo.
10 Oio au mampopoili hinangka mata owai i lembo-lembo,
moili i olona ope-ope bulu
11 mopaenu hinangka binata i pada
hai mopamaoha dounda kalide i pandulu.
12 I wiwi owai iti maidahe tadasi i laerawa,
momonihe i olo tawengkau.
13 Hangko i langi Nupopendaulu mai uda i bulu;
mabuhumi tampo hai hinangka au Nupopewali.
14 Oio au mopatuwo hehi bona raande binata,
hai mampopengaa tuda-tuda au rakadipura tauna
au mopaara paande hangko i tampo,
15 hai anggoro au mopamatana lalunda tauna.
Nupaara wori lana saitun au mampopewangka lindo tauna,
hai paande au mopaara roho.
16 Kaunahe Pue molambihe uda au ngkaia;
marudumohe kau himburu Libanon au Natuda haduduaNa.
17 I kau iti moharamohe tadasi;
tadasi kowao mohara i kau himburu;
18 Hinangka bulu au mapangka iami paidaana towau mpandulu
hinangka bulu watu mewali pentabungianda palandu.
19 Oio moteru wula bona mopakanoto tempo;
alo moisa kaina tampuna.
20 Ane mopaaraKo kaindi, makaindi mpuumi.
I tempo itimi molumaohe hinangka binata au i pandulu mohaoki paandenda.
21 Singa-singa au mangura melolo-lolohe mampeinao mehaka,
mohaokihe paande au napasilolongaahe Pue Ala.
22 Ane membetomi alo, padumohe,
hai molukuhe i pentabungianda.
23 Roo nodo, mesuwumohe tauna lao i pobagoanda,
i paidaanda mohaoki tuwonda hawe kalumba.
24 O Pue, ngkaia mpuu au Nubabehi;
hinangkana Nuteru moula kamanotona laluMu,
dunia buke hai au Nupopewali.
25 Peita tahi iti, mahile hai maemba paidaana,
inditi maidahe binata mahile hai kokoi
au bara teimba kangkaianda.
26 Kapala-kapala tahi mosumombahe inditi,
inditi worimi Lewiatana au Nuteru mowadi-wadihe.
27 Ope-ope meharungahe Irio,
bona molambihe paande i tempona.
28 Ane Nupasilolongaamohe paandenda, ragulumi;
ane Nuweimohe, maandemohe alanda mabuhu.
29 Ane mowuniKo lindoMu, langahe;
ane Nualami inaonda, matemohe
hai mesulemohe mewali awu tampo.
30 Agaiana ane Nuweimohe inaoMu, tuwomohe;
hai tampo Nupawoumi.
31 Kuharunga peawana Pue bara tebali hawe i hae-haena;
kuharunga hinangka au Napopewali Napokatana Pue.
32 Ia mototoki dunia, moenggomi;
Ia moiho bulu, morambumi.
33 Ina monanina motoia Pue, liangku mani tuwo;
ina mamponanina nani pepomahile i Pue Ala au kupenombai
hungkaku mani ara.
34 Kuharunga naningku Napokana,
lawi Iami au mopamatana lalungku.
35 Pogiangaahe tauna madosa tuna hangko i dunia;
palikangaahe tauna kadake maropu.
Kutoiami Pue, hangko i kabulana lalungku!
Toiami Pue!