Petoia i hinangka au napopewalimohe Pue Ala
105
1 Nipahawemi katana lalumi i Pue,nibambari kamahilena kuasaNa;
popaisaahe humalele tauna hinangka au Nababehi.
2 Niponanimi petoia i Pue, molingamokau Iria;
nibambarimi hinangka au Nababehi au melangaki.
3 Nipomahilemi hangaNa au malelaha;
kuharunga bona tauna au mohaoki Pue, matana lalunda.
4 Pesulekau i Pue, niperapimi rohoNa;
laomokau menomba Iria.
5 Katuinao hinangka au Nababehi au melangaki;
buhuinao ope-ope tanda kuasa hai pehuku au Nahowara.
6 Ee pemuleana Burahima, tuduaNa;
hai anana Yako, tauna au Napileimi.
7 Iami Pue, Pue Ala au tapenombai
pehukuNa mewali i humalele dunia.
8 Nakatuinao podandiNa hawe i hae-haena;
au Nahowarami Napabukei hawe i pemuleanta.
9 PodandiNa Natotowimi i Burahima
hai Nasumpami i Isaki.
10 Hangko indo, Napakaroho hai Yako,
mewali podandi au bara tebali
hawe i hae-haena i to Isaraeli.
11 Nauli Pue, “Tampo Kanaa ina kuweikau,
mewali sosorami au Kupatokaamokau.”
12 I tempo iti, bara manihe gaga bosa,
haodi manihe, hai mewalihe tohandarena i tampo Kanaa.
13 Molilohe hangko i hangamba laohe i hangambana,
hangko i kadatua hambua laohe i kadatua ntanina.
14 Agaiana barahe Napogiangaa rapopeahi-ahi;
anti kaihiranda, ope-ope datu Nakontohe,
15 Nauli, “Ineekau mopakapari tauna au Kupilei,
ineekau mobabehi dake i nabiNgkuhe!”
16 I tempona Pue mopaara rimi i tampo Kanaa
Napopewali hinangka paande au rawoli-woli bara ina handa.
17 Natudumi hadua moioru lao i tampo Masiri;
iami Yusupu au rapobalumi mewali hawi.
18 Bitina rataka hai rante;
tambolona rabararangi rante.
19 Kahopoana tepabukeimi lolitana Yusupu*;
hai Pue mopatongawami notona hintoto hai dandiNa.
20 Roo nodo, datu Masiri mampohawaahe topobagona mokabaha Yusupu,
tomakuasanda mampopesuwu hangko i tarunggu.
21 Yusupu rapopewali tua i sou kadatua,
hai rawei kuasa i hinangka kapebukuna;
22 rahuhua wori kuasa moatoro topobagonahe datu,
hai motadulakoihe totosae.
23 Nodomi kahawena Isaraeli i tampo Masiri,
Yako maida nodo torare i tampo Ham.*
24 Pue mampopemulehe taunaNa alanda bosa,
hai Napamarohohe hangko i iwalinda.
25 Pue mobaliki lalunda to Masiri
alanda mokahihihe taunaNa
hai mobabehihe dake i tuduaNa.
26 Roo indo, Pue motudumi Musa, tuduaNa,
hai Haruni au Napileimi.
27 TaunaNa au rodua iti mopaara tanda-tandaNa i olonda,
hai tanda-tanda kuasa i tampo Ham.
28 Napamakaindi tampo Masiri, mewali makaindi mpuumi,
agaiana moewa manihe NgkoraNa.
29 Owainda Nabaliki mewali wahe,
alana matehe ikanenda.
30 Seo mobukehi tamponda,
duunda mesua i sou kadatua
hawe-hawe i lincuna datu.
31 Mongkorami Pue;
mewali hawemohe dale
hai hani i humalele tamponda.
32 Nabumbuha uda mowua, pahuruna uda,
hai kila Napaara i tamponda.
33 Ia modungka kau anggoro hai kau ara,
ope-ope kau i tamponda Napokahe.
34 Mongkorami Pue, mewali hawemohe kakomba;
kakomba au barapi teimba kabosanda
35 au mokuku hinangka tuda-tuda i bondenda,
au moande ope-ope wua tuda-tuda i tamponda.
36 Ope-ope anangkoi tobalilo au towutu Napapatehe;
tunamohe ananda to Masiri au rapokakaia.
37 Roo nodo, to Isaraeli Naninihe mesuwu;
moantihe bulawa hai salaka;
maroa-roa hahahe, barahe ara au tetehube.
38 Matanahe to Masiri i pesuwunda to Isaraeli,
lawi to Masiri langahe i to Isaraeli.
39 Pue Ala mobinihi gawu
Napopobambaongakihe taunaNa,
hai api mopamabaahe i tempo kaindi.
40 Merapihe paande, hai Napaaraamohe tadasi pipiko;
Naweihe roti hangko i suruga alanda mabuhu.
41 Nabikami bulu watu,
mewali motimburumi owai
alana moili i pada wungi nodo halu.
42 Lawi Pue mokatuinao dandiNa
au malelaha i Burahima, tuduaNa.
43 Naninimohe taunaNa mesuwu i lalu katana,
tauna au Napilei Naporangaihe padu i katana-tana.
44 Tamponda tauna ntanina Naweihe,
ido hai molambihe wua tuda-tuda
au bara rapolenge taunaNa.
45 Ope-ope ide mewali bona matunduhe i aturaNa,
hai mokingki liliuhe hinangka pepaturoNa.
Toiami Pue!