Pepomahile i Pue
111
1 Toiami Pue!Hangko i lalungku mpuu mopahawe kamatanangku i Pue,
i lalu pohintuwunda tauna au manoto hai i olonda taunaNa.
2 Mahile mpuu hinangka bagona Pue,
masuka rapetampa ope-ope tauna au mounde.
3 Meawa hai tetoia pobagoNa,
notoNa monono i hae-haena.
4 Hinangka bagoNa au metingkarai Napopewali pepopainga.
Pue iti, mepokaahi hai mepokakaia.
5 Ia mokiraiahe paande ope-ope tauna au matundu Iria.
DandiNa Nakatuinao liliu.
6 Ia mopatongawa kuasaNa i taunaNa
i kaNakiraianda tamponda humalele tauna rapososora.
7 Pue manoto hai hintimba i hinangka pebotusiNa,
ope-ope parentaNa peisa raharunga.
8 ParentaNa maroho i hae-haena
Napopolumao i lalu kanoto hai kahintimba.
9 Pue mokabaha taunaNa
hai mopaara dandi au monono irihira.
Iami au malelaha hai maroho.
10 Pongka kapande iami kalanga i Pue,
ope-ope tauna au mampeulai parentaNa molambihe kamatopa au manoto.
Petoia Iria mia-mia hawe i hae-haena.