Pue mooreki tauna au mengkaiwoi
113
1 Toiami Pue!Ee tuduanakau Pue, nitoiami;
nipomahilemi hangana Pue!
2 Hangana Pue ina rapatolele
ide-ide hawe i hae-haena.
3 Hangko i Mata alo hawe i Katampua alo
tetoiami hangana Pue.
4 Pue makuasa i humalele tauna
peawaNa melumbu hangko i langi.
5 Hema au nodo Pue, Pue Ala au tapenombai,
au moparenta hangko i paidaa au mapangka?
6 Ia motumpa mampetiro
langi hai tampo.
7 Ia moaro tauna au meahi-ahi hangko i awu
moore tauna au mapari hangko i lalu reta,
8 bona Napopohudahe hihimbela hai tomakuasanda,
hihimbela hai tuananda.
9 Towawine au lalo Nakiraia anangkoi,
Napopewali hadua ina au matana hai tebila i lalu sou.
Toiami Pue!