Lintu i pekampaina Pue
125
1 Idemi nani polumaonda tauna lao i Yerusale.
Ope-ope tauna au mepoinalai i Pue,
nodohe bulu Sion au bara modua,
au tetida i hae-haena.
2 Nodo hinangka bulu au motoleliki Yerusale,
nodomi Pue mokampai taunaNa,
mepongka ide-ide hawe i hae-haena.
3 Tokadake bara ina makuasa liliu
i tampo sosorandaa tauna manoto,
bona tauna manoto iti
barahe kaula-ula mobabehi dake.
4 O Pue, Nubabehi apa au maroa i ope-ope tauna au manoto,
hai i ope-ope tauna au malelaha lalunda.
5 Agaiana tauna au mopalehimohe Pue
kuperapi bona napatunahe Pue hihimbela hai ope-ope tauna
au mobabehi dake.
Roa ngkatuwo i to Isaraeli!