Pekakae i Pue Ala au moisa paka-pakana
139
1 Idemi nanina Daudi au napahawe i tadulako toponani.
O Pue, Oio moparesa hai moisana.
2 Nuisa, pohudangku hai peangkaku;
Nuisa ngkarao pekiringku.
3 Nuita polumaongku hai paturungku;
hinangka rarangku Nuisa haha.
4 Lawi hangko barana mohowara lolita,
Nuisa hahatomi, O Pue.
5 Nukampaina hangko i lindo hai i taleu,
hai taieMu Nuona i wongkoku.
6 Kaladu gaga kuasaMu iriko,
bara kulambi pekiri.
7 Iumbana pae hou bona karaona hangko i InaoMu?
Iumbana pae melangka hangko i lindoMu?
8 Ane mengkahena i langi araKo indora;
ane maturuna i paidaa tomate, ara woriKo indo.
9 Ane membarona lao i pembetoa sowea
ba maidana karao i hambali tahi,
10 indo woriKo ina motetena
hai taie koanaMu moninina.
11 Ane kuuli, “Pogiangaamide kamakaindi mobalungkuhina
hai baa au motolelikina mewali makaindi,”
12 agaiana kamakaindi iti bara ina motupa Irio,
lawi Irio kaindi himbela pea hai pualo;
kamakaindi himbela pea hai baa i peitaMu.
13 Oiomi au motampolo watangku
hai Nuteruna i kanakantimiangku inangku.
14 Mopahawena katana lalungku Irio
lawi kaNuterungku melumbu kamaroana;
hinangka au Nubababehi mewulii,
hai tou-tou naisa tuwongku.
15 Hinangka buungku bara terero Irio
i karaterungku i paidaa au mawuni,
i tempoku napaiwata inangku.
16 Nuitana i tempoku mani nakantimia inangku;
ope-ope teukimi i lalu suraMu,
alo-alo katuwongku tepatokami
hangko damanina mesupa.
17 O Pue Ala, kaladu mpuu pekiriMu
bara kuhumba pekiri,
imbana mahile gaga.
18 Ane kuimba, melumbu kangkaiana hangko i wungi;
ane mengkaroona moimba mia-mia maniKo ara i pekiringku.
19 O Pue Ala, ane rapana peisa, Nupatunahe tauna kadake;
Nupakaraohe topepapate hangko iriko,
20 au mohowarahe dongko Irio,
hai mbero-mbero posumpanda i lalu hangaMu.
21 Barahe pae kukahihi tauna au mokahihiKo, O Pue?
Hai barana pae maluta i tauna au meewahe Irio?
22 Rumihi kakukahihinda
hai kupoiwalihe.
23 O Pue Ala, paresana, Nupeita lalungku.
Petandakana hai Nupetampa pekiringku;
24 Peitamide ba ara mani dake i tuwongku;
hai Nuninina i rara au manoto i hae-haena!