Pekakae merapi pekampaina Pue Ala
140
1 Idemi nanina Daudi au napahawe i tadulako toponani.
2 O Pue, Nukabahana hangko i tauna kadake;
Nukampaina hangko i tomepopeahi-ahi,
3 au lalunda motunggai peami dake,
hai alo-alona mopaarahe pombembetie.
4 Dilanda mataru nodo ile mobisa,
humenda moipo nodo ipo ile dalimao.
5 O Pue, peparaina hangko i kuasa tauna kadake;
kampaina hangko i tauna au mepopeahi-ahi
hai au mohaokihe kamanawongku.
6 Tauna au mampemahile mampotangaana hea,
hai moonahe landa rapopokaputina;
hangkau rara mokaehe kalolu bona manawona.
7 Meraroana i Pue, kuuli,
“Oiomi Pue Ala au kupenombai,
pehadingi perapi tulungingku!”
8 Pue, Pue au kupenombai, rohongku hai topehoremangku,
Nukampaina i pombeala.
9 O Pue, inee Nupabukei peundeanda tauna au kadake;
tunggaianda inee Nupopewali!
10 Tauna au motolelikina mantindorahe;
Pogiangaamide lolita kadake au rahowara
morumpa watanda sadudua!
11 Pogiangaahe nakamburangi Pue hai awaa!
Pogiangaahe Nanawo i tabingke matindo
alana barapi rabuku mearo!
12 Tauna au mepakadake ineehe Nupalikangaa maida liliu i dunia;
tauna au mepopeahi-ahi Nupogiangaahe narumpa rugi silaka.
13 Kuisa, Pue ina mampopolumao notoNa i tauna au rapopeahi-ahi,
hai tauna au masusa tuwonda Napeparaihe i kara-karanda.
14 Tauna au malelaha tuwona, ina motoia hangaMu;
tauna manoto ina tindahe i lindoMu.