Pekakae i lalu pekelo
141
1 Nanina Daudi
O Pue, meraroana Irio, gaguna holiga;
pehadingi wotungku i tempoku meraroa Irio!
2 Holigami Nudoko pekakaengku nodo kaNudokona popenomba dupa;
taiengku au kupatubala Nudokomi nodo popenomba kalumbaa.
3 O Pue, kampai dilangku,
Nupodena humengku.
4 Nupakarao lalungku hangko i babehia au da maroa;
ineena Nupogiangaa mobabehi dake,
hihimbela hai tauna au masurokoa
hai ineena Nupalikangaa maande sambela i lalu posusanda.
5 Ane tauna au manoto mokambaroa hai mopahaina, itimi ahi iriko;
agaiana ineena rawalugaingia lananda tauna kadake;
mekakae liliuna moewa hinangka dakenda.
6 Ane rahuhuhe i topebotusinda,
ina raisa katouna mpuu hinangka lolitangku mepakatana.
7 Nodo watu au rapengka hai rarupu-rupu i tampo
nodomi kamahawuna buu rangkanda i baba talumba.
8 Agaiana Pue, Pue au kupenombai, Irio peana meharunga;
ineena Nupogiangaa rapapate, lawi Irio peana meonga.
9 Nukampaina hangko i peromo hea au rataa i rarangku,
hai hangko i tilobunda tauna au mobabehihe dake.
10 Ope-ope tauna kadake ina kanahe heanda haduduanda,
agaiana iko, hea iti kulingkai pea.