Pekakae merapi petulungi hai pepaturo
143
1 Nanina Daudi
O Pue, pehadingi pekakaengku
Nuhaile perapingku!
Nuhanaina i lalu kamaduduMu,
anti kamanotoMu.
2 Ide iko tuduaMuna, ineena Nuparesa,
lawi i olonda tauna au tuwo
bara huba hadua au manoto i lindoMu.
3 Rawulaimona iwali;
radungkana hai raihe-ihekimona,
ratendena i kakaindiana
nodo tauna au mahaemi mate.
4 Peharungangku matalami,
wuli gagami lalungku.
5 Kukatuinao alo-alo au hangkoia,
mampekirina ope-ope bagoMu,
kubuhuinao hinangka au Nubabehi.
6 Kupatubala taiengku Irio;
nodo tampo au bangi mokabilai uda,
nodo wori tanoanangku mokabilaiKo.
7 Hanai wongkoia holiga, O Pue,
peharungangku matalami!
Inee Nuwuni lindoMu hangko iriko,
datina nodo tauna au mendaulumohe i paidaa tomate.
8 Madondo Nupopahadia wongkoia ahiMu au bara mokahopoa,
lawi mepoinalaina Irio!
Tudungiana rara au hangangaa kupolumaongi,
lawi katuwongku kupaisaremi Irio.
9 O Pue, kabahana hangko i ope-ope iwalingku
Iriomona meonga!
10 Paturona mampeulai peundeaMu,
lawi Oiomi Pue Ala au kupenombai!
Kuperapi InaoMu au Malelaha,
moninina i rara au manoto!
11 Patuwona anti hangaMu, O Pue,
horema tuwongku hangko i kapari anti kamanotoMu.
12 Patunahe iwalingku anti ahiMu au bara mokahopoa;
paonehe ope-ope tauna au mohuhulina,
lawi iko tuduaMuna.