Nani katana laluna datu
Nanina Daudia
144
1 Tetoiami Pue, bulu watu rohongku.Ia au mopaturo taiengku mombetie
karawengku mombeala.
2 Iami pentabungiangku hai bente pantidaangku,
Iami rohongku hai Topehoremangku,
labangku hai peongaangku.
Ia mampopengkoruhe humalele tauna i kuasangku!
3 O Pue, apa woia pae manusia pane Nukambi?
Apa pae tauna panehe Nukadipura?
4 Manusia nodo pea pewusi inao,
katuwonda nodo pea poliu bao-bao.
5 O Pue, Nubikami langiMu hai mendauluKo,
hedohe bulu bona morambuhe.
6 Popombehangke kila bona mahawuhe iwali,
panakahe panaMu bona magunegohe!
7 Ona mai taieMu hangko paidaaMu au mapangka,
palohona hai kabahana
hangko i owai meumbala
hangko i taienda tohandarena,
8 au mohowara peahe peakalangi,
hai sumpanda dongko pea.
9 O Pue Ala, ina mampolingana linga au wou Irio,
ina mokawina gambusu hai monanina Irio.
10 Oio au mampopenangihe datu,
hai au mamperurui Daudi, tuduaMu!
11 Pelaena hangko i piho au mepakarugi,
peruruina hangko i taienda tohandarena,
au humenda mohowara pea peakalangi,
hai sumpanda dongko pea.
12 Tapeperapi anantahe tobalilo tuwo mahilehe
nodo tuda-tuda i tempona mangura;
hai anantahe towawine makarahe nodo arii
au rapaa mampoperae sou kadatua!
13 Taperapi bona ope-ope tambarunta buke
mampopengaa wua tuda-tuda;
taperapi towau hai dimbata mewalihe isabuna,
memule-mulehe duuna ipulona sabunda i lambara!
14 Tapeperapi bona japinta mewalihe bosa;
bara ara au lalo hai au moana ngkangura.
Tapeperapi bona boeanta lintu, bara ara perararoa i laluna!
15 Matanamohe tauna au nodo katuwonda!
Matanamohe humalele tauna au mampenombai Pue!