Petoia i Pue au bula laluNa
145
1 Idemi nani pepomahile hangko i Daudi.
Ina kupomahileKo, O Pue Ala, Datungku;
kutoia liliu hangaMu i hae-haena.
2 Alo-alona ina kutoiaKo,
hai kupolinga liliu hangaMu i hae-haena.
3 Peawana Pue mahile hai rumihi katetoiaNa;
kamakuasaNa bara peisa tapekiri.
4 Lapi-lapina pemulea ina mopatolelehe
kamaroana hinangka au Nubabehi
hai mobambarihe kamarohona bagoMu.
5 Peraena peawaMu au masuku ina rapahawe,
hai ope-ope bagoMu au mewulii ina kupepekiri.
6 Hinangka bagoMu au mahile ina rabambari,
hai kamahileMu ina kupololita.
7 Tauna ina mopatolelehe hinangka kamaroaMu,
matana-tanahe mamponani kana i kamanotoMu.
8 Pue mepokaahi hai mepokakaia,
handa kasabara hai mahile ahiNa au bara mokahopoa.
9 Pue maroa i ope-ope tauna,
hai maahi laluNa i ope-ope au Napopewali.
10 O Pue, hinangka au Nupopewali
ina mopahawehe katana lalunda Irio,
hai ope-ope tauna au Nupokaahi ina motoiaKo.
11 Peawana kadatuaMu ina rabambari,
hai kamarohoMu ina rapololita,
12 bona kamarohoMu hai peraena kadatuaMu
raisa ope-ope tauna.
13 KadatuaMu iami kadatua au bara mokahopoa,
hai poparentaMu tetida i hinangka pemulea.
Pue mopabukei ope-ope dandiNa;
hai i hinangka pobagoNa, tongawa ahiNa au bara mokahopoa.
14 Pue moharongi tauna au manawo,
hai mopatogo ope-ope tauna au motumpa.
15 O Pue, hinangka au tuwo meharungahe Irio,
hai Nuweihe paandenda i tempona.
16 Oio mokiraiaKo tauna hinangka au raparaluu,
hai ope-ope au tuwo Nuweihe paandenda.
17 Pue manoto i hinangka pobotusiNa,
hai i ope-ope pobagoNa,
tongawami ahiNa au bara mokahopoa.
18 Pue hungku i tauna au meraroa Iria,
i hadua-hadua tauna au meraroa
hangko i kabulana lalunda.
19 Ia mohanai peraroanda tauna au mebila Iria;
perapi tulunginda Napehadingi hai Nahoremahe.
20 Pue mokampai ope-ope tauna au maahi Iria,
agaiana ope-ope tauna kadake ina Napatunahe.
21 Humengku mohowara hinangka petoia i Pue.
Pogiangaa hinangka au tuwo
mampolingahe hangaNa au malelaha i hae-haena.