Hadua towawine hai hambaa naga
12
1 Roo indo, kuita i langi hambua tanda au mewulungai: ara hadua towawine au hampina nodo pewangka alo hai i woi bitina ara wula. I waana ara songko au rababehi hangko i hampulo hai roogu betue. 2 Towawine iti tangana mantimi. Ia monganga-nganga anti kamaparina lawi ina moana.3 Ara mani hambua tanda au raita i langi. Ara hambaa naga au malei. Naga iti, mahile ntepuu, mowaa pitu hai motandu hampulo. I ope-ope waana ara songko datu au koi. 4 Naga iti mowentoka ikuna, modii hangkira talu hangko i betue i langi hai natendehe i wongko dunia. Naga iti meangka i lindona towawine au ina moana bona moame Anana towawine iti au ina mesupa. 5 Moana mpuumi towawine iti, hadua tobalilo. Anangkoi itimi au ina moparenta humalele dunia hai rohoNa au nodo kamaroho lai besi. Hangko da tepaka Anangkoi iti naame naga, Ia raala hai raanti lao i Pue Ala bona moparenta sambela hai Ia i lalu suruga. 6 Roo indo, melangkami towawine iti lao i pada wungi, hai maida i paidaa au napasilolongaami Pue Ala. I paidaa iti, ia rakadipura i lalu hasabu rongatu hai ini pulona alona kamahaena.
7 Hangko inditi, moitana pombeala mahile i suruga. Tadulako malaeka au rahanga Mikael hai hangka malaekana moewahe naga iti, hai naga iti radurei wori malaekana. 8 Agaiana naga iti hai malaekanahe ranangi; ido hai barapohe rapaliu maida i suruga. 9 Mewali, naga au mahile iti, ratende hangko i suruga hawe i dunia hihimbela hai malaekana. Iami ile au arami hangkongkoia*, au rahanga Datu Tokadake ba Tadulako Seta. Ia au mopakanawo tauna au maida i humalele dunia.
10 Roo iti, kuhadi hambua wotu i suruga au mololita masisimbuku, nauli,
“Hawemi tempona Amputa Pue Ala
mowei katehorema i taunaNa,
mopatongawa kuasaNa,
hai mepongkami moparenta.
Hawemi tempona Datu Topehompo au Napilei Pue Ala
ina mopatongawa kamakuasaNa.
Lawi Datu Tokadake rapopelohomi hangko i suruga;
iami au mosalai liliuhe halalunta hampepepoinalai i lindona Amputa Pue Ala.
11 Halalunta au hampepepoinalai iti monangimohe Datu Tokadake.
Menangihe hai kuasa wahena Ana Dimba au mate mohoremahe hangko i huku dosanda.
Menangihe lawi mopangaku liliuhe ka Ana Dimbana Ampunda.
Menangihe lawi kehapirihe rapopeahi-ahi ba rapapate,
barahe mousuli hangko i pepoinalainda.
12 Ido hai matanamokau, ikamu au maida i suruga.
Agaiana hurewumokau, ikamu au maida i humalele dunia,
lawi Datu Tokadake mendaulumi lao irikamu.
Rumihi kamasodona,
lawi naisa, tempona barapi mahae.”
13 Kanaisana naga iti karatendenami i dunia, ia mowulai towawine au mampopesupa Anangkoi tobalilo iti. 14 Agaiana towawine iti rawei rombua kapi au mahile, nodo kapi tadasingkaia. Ido hai peisa membaro lao i pada wungi i paidaa au rapasilolongaa, dati napakarugi naga. Inditi, ia rakadipura i lalu talu parena hantanga. 15 Hangko indo, naga iti mohoparaka owai au ngkaia mototoi towawine iti bona maili. 16 Agaiana dunia motulungi towawine iti: unga pea tebungkahi nganga tampo moame owai au nahoparaka naga iti. 17 Masodo ntepuumi naga i towawine iti. Ido hai laomi mampombealaa pemuleanahe towawine iti au ntanina, iami tauna au mampeulaihe hawana Pue Ala hai au mopangaku kaYesuna Ampunda. 18 Naga iti meangka i wiwi ntahi.a