Hambaa binata au kadake mesuwu hangko i tahi
13
1 Roo indo, kuita hambaa binata au mesuwu hangko i tahi. Tanduna hampulo mbuana, hai waana pitu oguna. I ope-ope tanduna, ara songko datu, hai i ope-ope waana, teuki hanga-hanga pekakabosai i Pue Ala. 2 Binata au kuita iti, lenggena nodo lengge binata macan tutul, agaiana bitina nodo biti berua hai humena nodo hume singa.a Hai naga mowei binata au kadake iti poparentana, kamarohona hai kuasana au mahile. 3 I haogu waa au pitu iti, kuita ara bela au kenapomate, agaiana maohami. Tauna i humalele dunia, mampomakarahe binata iti, ido hai meulahe iria. 4 Menombamohe i naga, lawi ia au mowei kuasa i binata au kadake iti. Hai menomba worimohe i binata iti, rauli, “Hema au himbela hai kamakuasana? Hema au peisa moewa binata iti?”5 Binata au kadake iti rapalikangaa mohowara lolita au mantindora hai au mopakoi Pue Ala. Rapogiangaa wori moparenta hai mobabehi peundeana i lalu iba pulona hai rombula kamahaena. 6 Ia mopapakoi Pue Ala—hangaNa hai paidaaNa (paidaaNa iami ope-ope au maida i suruga). 7 Ia rapaliu wori mampombealaahe taunana Pue Ala hai nanangihe. Hai ia rapogiangaa mokuasai tauna i humalele dunia, ope-ope tauna hangko i ope-ope kadatua, ope-ope pemulea hai hinangka basa. 8 Ope-ope tauna au maida i dunia menomba iria. Au bara menomba iria, batena pearaihe tauna au teuki hanganda i lalu Sura Ngkatuwo hangko damani dunia rapopewali. Sura Ngkatuwo iti, iami surana Ana Dimba au rasambale. I lalu sura iti, teuki hanganda tauna au molambi katuwo maroa au bara mokahopoa.
9 Mewali, hemakau au motalinga, nipehadingi mpuu lolita ide:
10 Tauna au tepakanoto karatawaninda,
batenda ina ratawani.
Tauna au tepakanoto karapapatenda hai piho,
batenda ina rapapate hai piho.
Ido hai taunana Pue Ala hangangaa mantaha i lalu kapari hai hangangaa maroho pepoinalainda.
Binata karombaana mesuwu hangko i tampo
11 Roo iti, kuita mbulimi hambaa binata ntanina au mesuwu hangko i tampo. Binata iti motandu rombua, nodo tandu ana dimba, agaiana wotuna nodo wotu naga. 12 Hai ope-ope kuasa hangko i binata au hawe nguru-nguruna, napopolumao binata karombaana iti. Binata au karombaana iti mopasimbuku ope-ope tauna au maida i dunia bona menombahe i binata au nguru-nguruna au raita, hangkoia ara belana agaiana maohami. 13 Binata au karombaana iti mobabehi ngkaia tanda kuasa. I lindonda tauna bosa, ia mampopendaulu api hangko i langi toa i tampo. 14 Tanda kuasa iti, nababehi hangko i kuasa binata au nguru-nguruna. Hai kuasa iti, ia mopakanawomohe tauna au maida i dunia. Natudumohe moaro hambua watu molengge mewali tanda pebilanda i binata au nguru-nguruna. Binata au nguru-nguruna iti iami binata au rabata hai piho agaiana bara mate. 15 Watu molengge au rababehi iti, himbela hai lenggena binata au nguru-nguruna. Binata au karombaana rawei kuasa mowei inao i lengge binata iti alana peisa mololita. Hema pea au bara menomba i watu molengge binata iti batena rapapate. 16 Ope-ope tauna natudu bona modokohe tanda binata au nguru-nguruna. Tanda iti hangangaa rawoli i taie koananda ba i wingkenda. Mewali, ope-ope tauna, maroa au mahile ba au koi tuwonda, au pebuku ba au meahi-ahi, au hawi ba au bara hawi, ope-opehe napari-pari bona modoko tanda binata iti. 17 Bara ara hadua tauna au peisa meholo ba mobalu-balu ane bara ara tanda iti i taiena ba i wingkena. Tanda binata iti, iami hangana binata au nguru-nguruna ba angka au lempona hangana.
18 Hangangaa taperapi kanoto lalu hangko i Pue Ala bona taisa lempona lolita ide. Hema au mapande, peisahe moimba hai moisa lempona angka binata iti. Lawi angka iti, iami hangana hadua tauna. Hai angka iti iami ini atuna ini pulona hai ini.