Ana Dimba hai topeulaNa
14
1 Roo indo, kuita Ana Dimba meangka i wongko Bulu Siona hihimbela hai topeulaNa au hangatu iba pulona hai iba sabuna. I wingkenda, teuki hangana Ana Dimba hai hangana UmaNa. 2 Ara kuhadi pomoni au mahile hangko i suruga, nodo powoo owai au ngkaia, hai karumihina nodo pogumuru gumpata. Pomoni au kuhadi iti, nodo wori pomoni kecapi au rakalea tauna. 3 Mamponanimohe hampaka nani au wou i lindo kadera kadatuana Pue Ala hai i lindonda pinatuwo au iba hai totosae au motolelikihe pohudaa kadatua iti. Naninda bara huba hadua au peisa mampegurui, batena pea ihira au hangatu iba pulona hai iba sabunda iti au moisa. Ihira iti tehoremamohe hangko i dunia, lawi dosanda nahompomi Ana Dimba. 4 Hai ihira iti barahe hambela modaihi watanda, malelahahe, nodo hadua towawine au bara mani hambela motambi. Iumba kalaoana Ana Dimba, indo wori kalaoanda. Ihira itimi au Nahompo Ana Dimba hangko i olonda ope-ope tauna i dunia. Nodo tauna mohuhu wua au nguru-nguruna hangko i tuda-tudanda i Pue Ala, ihira wori mewalimohe popenomba au nguru-nguruna i Pue Ala hai i Ana Dimba. 5 Barahe modongko, hai bara wori ara kamanawonda.Talu malaeka au mampopainga tauna kana i alo pebotusi
6 Moita worina hadua malaeka ntanina au membaro i laerawa. Malaeka iti mobambari Ngkora Marasa au bara ara katebaliana hawe i hae-haena. Ngkora Marasa iti nabambari i humalele tauna i dunia, i ope-ope kadatua, ope-ope pemulea hai i hinangkana basa. 7 Malaeka iti mololita masisimbuku, nauli, “Mengkorumokau i Pue Ala hai nitoiami peawana tuwoNa. Lawi hawemi tempo pehukuaNa. Menombamokau i Pue Ala au mampopewali langi, tampo, tahi hai ope-ope ulu owai.”
8 Hangko inditi, ara wori malaeka karoduana au meula boko i malaeka au nguru-nguruna, mololita, nauli, “Mageromi! Mageromi wanua Babelib au mahile ntepuu! To Babeli iti, mowawahahe tauna i humalele dunia moenu apa au melangui. Lempona, to Babeli mowawaha tauna ntanina bona mampeulaihe babehianda au bara hintoto.”
9 Roo indo, meusu mbuli malaeka au katalu, hai mololitami masisimbuku, nauli, “Hema-hema au menomba i binata au kadake hai i lengge binata iti, hai hema-hema au modoko tanda binata iti i wingkenda ba i taienda, 10 tauna iti ina napaenuhe Pue Ala hai paenu au mapai ntepuu. Lempona, ina nakarumpui mpuuhe Pue Ala, hai bara ara kamaluluna laluNa irihira. Tauna iti ina rapopeahi-ahihe i lalu api au mahile i lindonda malaeka au malelaha hihimbela hai Ana Dimba iti. 11 Rambu api au mampopeahi-ahihe ina mengkaore liliu hawe i hae-haena. Maroa mabaa ba kaindi, tauna iti ina rapopeahi-ahi liliuhe, lawi menombahe i binata au kadake hai i lengge binata iti, hai modokohe tanda hangana binata iti.”
12 Idomi hai taunana Pue Ala au matunduhe i hawaNa hai au mepoinalai liliuhe i Yesu, hangangaa mantahahe i lalu kapari.
13 Roo iti, kuhadi mbuli hambua wotu hangko i suruga au manguli, “Nuuki ide: mepongka ide-ide, morasimohe tauna au mate i lalu pepoinalainda i Yesu.”
Nahanai Inao Malelaha, “Tou mpuu! Lawi tauna iti, batenda ina mengkaroo hangko i pobagonda, hai batenda ina molambi wua pobagonda.”
Ihi dunia rapepare
14 Hangko indo, kuitami gawu au bula. Hai i wongko gawu iti, mohudami hadua tauna, lenggeNa nodo Ana Manusia. I waaNa ara songko bulawa, hai taieNa, mokingki hamata kandao au mataru. 15 Roo indo, ara hadua malaeka ntanina au hawe hangko i Souna Pue Ala. Ia mololita masisimbuku i tauna au mohuda i wongko gawu iti, nauli, “Nutewokami kandaoMu hai meparemoKo! Tempo mepare hawemi, lawi ihi dunia mangkami.” 16 Hangko inditi, tauna au mohuda i wongko gawu iti motewoka mpuumi kandaoNa, hai mampeparemi ihi dunia.
17 Roo indo, kuitami malaeka ntanina au mesuwu hangko i Souna Pue Ala au i suruga mokingki wori kandao au mataru. 18 Hai hawe worimi hadua malaeka au ntanina, iami au mokampai api i meja pointua dupa. Malaeka iti mololita masisimbuku i malaeka au mokingki kandao au mataru, nauli, “Nutewokami kandaomu hai nuhambekimi wua anggoro i dunia, lawi mangkami.” 19 Malaeka iti motewokami kandaona, mohambeki wua anggoro hangko i kauna, hai natende i lalu popiengaa anggoro au mahile. Popiengaa anggoro iti, lempona karumpuna Pue Ala i tauna au kadake. 20 Mewali, wua anggoro iti raupi i raoa wanua, hai hangko i popiengaa iti, moilimi wahe nodo poili owai au mahile. Kakaraona ba arato pae talu atuna kilo hai kakaladuna hampa i hume dara.