Cetáma 1

Aujourd'hui, le 11 avril 02, Martin et/ou Pascal vont taper la version de Genèse 1-11 qui a été vérifiée à Kara en février 2002 dans cet ordinateur Satellite 330CDS. Cet ordinateur n'est pas l'ordinateur mère. Il faudra transférer ces chapitres 1-11, et avant nouvel ordre, ces chapitres UNIQUEMENT, dans l'ordinateur 'mère' (T1640) quand il sera réparé. Les chapites 12 - 50 se trouvent également dans cet ordinateur MAIS Bibi NE PENSE PAS que ce sont les dernières versions, donc, il ne faut surtout pas copier 12-50 dans l'ordinateur mère. SI ON A TOUT PERDU dans l'ordinateur mère, alors nous reconsidererons le transfert des données ici présentes dans cet ordi 330CDS.18 avril.martin BONDE.Le verset 20 est le début d'un paragraphe.

Cetáma

Weèdi pa̰nà-ma kú bookú fòùku

¹ Nà cetáma, Weèdi de pa̰nà teǹka-dà nà hḭ́ǹka. ² Teǹka de kɔ́ɔ́ yòma, yècḭ́ḭ̀ mɛ̀ɛ de kɔ́ɔ́ ka hḭ́ǹka. Yḭ́ḭ̀pu-dà de dádí nɛ́ɛsàma^a cecemá, kà Weèdi sèèdi mà cḭ̀n è nampú ma hḭ́ǹka.

³ Kà Weèdi yɔ̀: Wenikú é pa̰ná! Ye wɔ̀ni kà kú pa̰ná. ⁴ Kà ní dɛ́há n'hɔ̰́tà wenikú sudi-í-ma, ye wɔ̀ni kà ní baàta é cená wenikú nà yḭ́ḭ̀pu. ⁵ Kà ní yíí wenikú è yɔ̀ wèǹku, é yídá yíí yḭ́ḭ̀pu è yɔ̀ yèǹka. Kà yohokú é yodá, kà ká̰ńyɛ̰̀ǹfa é pa̰ná, k'yé hḭn dacecedí.

⁶ Kà nì tṵ́mà yɔ̀: Màmàkèdi é pa̰ná ye nɛ́ɛ́mà ma cɔhɔ̀ka é mà totá cɛ̰má màdɛ́ɛ́. ⁷ Ye wɔ̀ni k'yèe niìya̰ é pa̰ná. Mɛmá kú bookú-dà nì pa̰nà-ma ye màmàkèdi, kà nì tookú teǹka (kú) nɛ́ɛmá nà hḭ́ǹka kpɛ́ɛmá. ⁸ Kà ní yíí ye màmàkèdi è yɔ̀ hḭ́ǹka. Kà yohokú é yodá, kà ká̰ńyɛ̰̀ǹfa é pa̰ná, k'yé hḭn dadɛ́ɛ̀di.

⁹ Mii kú dàhàka, kà Weèdi tṵ́mà yɔ̀: Nɛ́ɛmá mɛ̀mà péé-ma hḭ́ǹka fɔ̰̀di é tíká kàdèdi nìcɔ̰́, k'yé teha kà kpeèdi é fodá-ní! Nì wɛdà-ma mɛma, k'yèe niìya̰ mɛ̀ɛ é pa̰ná. ¹⁰ Kà ní yíí ye kpeèdi è yɔ̀ teǹka, é yíí ye nɛ́ɛmá títíkadí è yɔ̀ dàmɛ́dì. Kà ní dɛ́há é n'hɔ̰́tà yè yòǹ suusá-dà. ¹¹ Kà nì tṵ́mà yɔ̀: Niìya̰ dɔ́ɔ́di é yɛɛ̀ni teǹka hḭ́ǹka: Míti nà ti bíící, é yídá teená na bodú na bodú kà ná n'toó na bíiká nà ka yɛ̀ɛ̀sa. K'yèe niìya̰ mɛ̀ɛ é pa̰ná é n'yònà nì hḭ́mpú. ¹² K'yèe niìya̰ dɔ́ɔ́di é yɛǹni teǹka: Míti ti bodú ti bodú, bá mɛ̀ǹtì dɛ̀ɛ̀ nà ti bíící, é yídá teená na bodú na bodú, bá mɛ̀nà dɛ̀ɛ̀ kà nà toó na bíiká nà ka yɛ̀ɛ̀sa. Kà Weèdi é dɛ́há é n'hɔ̰́tà yè sudi-í-ma. ¹³ Kà yohokú é yodá, kà ká̰ńyɛ̰̀ǹfa é pa̰ná, k'yé hḭn data̰á̰di.

¹⁴ Kà nì tṵ́mà yɔ̀: Wenikú kɔ̰́ɔ̰́sa é pa̰ná hḭ́ǹka, mìì kó m'baàku-sá wèǹku nà yèǹka. Mií-dà kó m'bɛkú benní, nà daàka, nà kúùka wɔ̀ka. ¹⁵ Ye kú wenikú kɔ̰́ɔ̰́sa-dà té kó tiìda-ní nà hḭ́ǹka é wekàna teǹka. Nì wɛdà-ma mɛma, k'yé pa̰ná. ¹⁶ Mɛmá kú bookú-dà nì pa̰nà-ma wenicí kɔ̰́ɔ̰́sa ye dɛ̰́ɛ̀ka, wèǹku nà cḭ̀ma. Kà wèǹku yòǹ wenikú sàku è kó n'tee wèǹku, kà cḭ̀ma yòǹ sàmɔ́ǹku è kó n'tee yèǹka. Kà ní yídá é tuɛ̀ha é pa̰ná hà̰hi. ¹⁷ Kà ní tṵná ye wenicí kɔ̰́ɔ̰́sa hḭ́ǹka, è yɔ̀ cí n'tìi teǹka. ¹⁸ Mɛncí-dà kó n'tee wèǹku nà yèǹka, é tṵ́má m'baàku wenikú nà yḭ́ḭ̀pu. Kà Weèdi é dɛ́há é n'hɔ̰́tà yè suu-ú-ma. ¹⁹ Kà yohokú é yodá, kà ká̰ńyɛ̰̀ǹfa é pa̰ná, k'yé hḭn danàhidí.

²⁰ Kà nì tṵ́mà yɔ̀: Niìya̰ fòùsa dɔ́ɔ́di é wɔ̰ntà nɛ́ɛmá mɛhɛká, é yídá kà nɛ̀hi é pa̰ná é m'putì hḭ́ǹka. ²¹ Mɛmá-dà kà ní pa̰ná nɔsàti mɛ̀ǹtì péé-ti nɛ́ɛmá mɛhɛká ti bodú ti bodú, nà mìì fòù-sa wɛǹni è wɔ̰̀ǹti nɛ́ɛmá mɛhɛká, é yídá nà nɛ̀hi hi bodú hi bodú. Kà ní dɛ́há é n'hɔ̰́tà yè yòǹ suusá-dà. ²² Kà ní yè kóná è yɔ̀: Mìì fòù-sa wɛǹni nɛ́ɛmá mɛhɛká, é wɛ́dá é sṵ́ná kóńcí, kà nɛ̀hi mɛ̀ɛ té wɛ́dá é sṵ́ná teǹka wɛǹni. ²³ Kà yohokú é yodá, kà ká̰ńyɛ̰̀ǹfa é pa̰ná, k'yé hḭn danùntí.

²⁴ Kà Weèdi tṵ́mà yɔ̀: Mìì fòù-sa wɛǹni è fohí é pa̰ná teǹka hḭ́ǹka ye bodú ye bodú: Hɔ̰́ɔ̰́tà nɔtí nà yɛ̀ɛ̀di kpɛ́ɛtí ti bodú ti bodú, nà mìì kú wɛnnì fudì-sa^b ye pɛutí hḭ́ǹka ye bodú ye bodú. Nì hḭ́n-má mɛma, k'yèe niìya̰ mɛ̀ɛ é pa̰ná ye wɛǹni. ²⁵ Ma kú bookú-dà Weèdi pa̰nà-ma yɛ̀ɛ̀di nɔtí ti bodú ti bodú, hɔ̰́ɔ̰́tà kpɛ́ɛtí ti bodú ti bodú nà mìì fudì-sa wɛǹni ye pɛutí hḭ́ǹka ye bodú ye bodú. Kà ní dɛ́há é n'hɔ̰́tà yè yòǹ suusá-dà. ²⁶ Kà Weèdi é deǹta è yɔ̀: Yàà tí pa̰á̰-nà nìdo k'ó ti n'yònà sɛ̰́ɛ̰́ɛ̰́, k'ó n'tee nim̀bííhí nà nɛ̀hi, é yídá n'tee-nà teǹka nɔtí wɛǹni: Hɔ̰́ɔ̰́tà kpɛ́ɛtí nà yɛ̀ɛ̀di kpɛ́ɛtí, nà mìì kú wɛnnì fudì-sa ye pɛutí hḭ́ǹka.

²⁷ Mɛmá-dà kà ní pa̰ná nìdo k'ò nì yònà sɛ̰́ɛ̰́ɛ̰́. Kà n'ɔ́ɔ̀ pa̰ná k'ò yònà nì yòma.

Kà ní pà pa̰ná dɔɔ̀ɔ nà poòo. ²⁸ Kà ní pà kóná é pà caka è yɔ̀: Wɛ́dá-nà é sṵ́ná teǹka wɛǹni. Nɛ́ kà teeka, é pɛ́ɛ́-nà nɛ́ɛmá nim̀bííhí wɛǹni, nà nɛ̀hi wɛǹni, é yídá teeka-nà nɔtí mɛ̀ǹtì cèǹtì-ti wɛǹni teǹka hḭ́ǹka.

²⁹ Kà ní tṵ́má tuɛ̀ha è yɔ̀: Ǹtɛ mìì kó n'yòǹ-sa nɛ dipú. N nɛ kɔ̰́ɔ̰̀ mìì yɛ̀dì-sa wɛǹni teǹka hḭ́ǹka è yòǹ míti^c yoo teená è pɛní diití, è yɔ̀ yè pɛní-sa ní n'yòǹ nɛ dipú. ³⁰ Kà nì tṵ́mà yɔ̀: N kɔ̰́nì mɛ̀ɛkà míibóhití, nɔtí mɛ̀ǹtì péé-ti wɛǹni teǹka hḭ́ǹka, nà nɛ̀hi wɛǹni, nà nɔtí mɛ̀ǹtì fudì-ti wɛǹni ti pɛutí hḭ́ǹka, mìì baà fòù-sa wɛǹni teǹka hḭ́ǹka è yɔ̀ tí n'yòǹ ye dipú. K'yèe niìya̰ mɛ̀ɛ é hḭn mɛma. ³¹ Kà Weèdi é dɛ́há é n'hɔ̰́tà nì pa̰à̰-sa wɛǹni yòǹ suusá mɔ́nyá̰-dà dɛ́dɛ́í. Kà yohokú é yodá, kà ká̰ńyɛ̰̀ǹfa é pa̰ná, k'yé hḭn dakɔɔ̀dí.