Cetáma 3

19 Avril. Martin BONDE.

Niìcecedó n'ɔ̀ɔ poòo yetà-nà Weèdi

¹ Yɛ̀ɛ̀di nɔtí Kɔ́yɔ̀ɔ Weèdi de pa̰nà-ti wɛǹni mɛhɛká, wàfa-dà de káá yàma nìdo yehènamá hḭ́ǹka. Kà fá tɛ̀ni daadí yènì é béka poòo è yɔ̀: Hó, pooò! Mɔ́masí-dà Weèdi hḭ́n-má è yɔ̀ nɛ dá dii ye yɛ̀ɛ̀dì tee-bíikà wɛnnì? ² Kà poòo é fà tɛ̰́ná è yɔ̀: Á̰à̰, Weèdi yɔ̀ ti kó nɛɛ́ dii-í-ma tee-bíikà mɛ̀ǹkà péé-kà wɛnnì ye yɛ̀ɛ̀dì mɛhɛkà. ³ Àmá, teepù mɛ̀mù péé-pù ye yɛ̀ɛ̀dì cɔhɔ̀kà, nì yɔ̀ ti dá yetá pḭ́ń mu bíidí k'yàá bá sííka-nà t'aa nì dii-ma. Kà ti nì dii, ti kó kpíí-má. ⁴ Kà wàfa yɔ̀: Fɔ́ú! Nɛ pú kó kpíí, ⁵ mìì tee-sá Weèdi mɔ́nní yá̰á̰-ma sukú è yɔ̀ kà nɛ dii tḭ́ń daadí ye tee-bíidì, nɛ nɔ̀ǹci kó diìda-á-ma, kà nɛ́ n'yònà nì yòma, ye wɔ̀ni é m'bahiní mìì yòǹ-sa suusá nà mìì yòǹ-sa sḭ̀ǹya̰. ⁶ Kà poòo é cɔ́dí é n'hɔ̰́tà ye tee-bíiká suu-ú-ma wáńtáma hḭ́ǹka è kó tṵ́má n'nadi dipú. K'òo bìnɔ é dɔdi ka hḭ́ǹka nà w'aa kà dii-má é dɛ́tá yá̰á̰ma sàma. Ye wɔ̀ni k'ó kà tɔ̰ɔ̰̀ta é dii é pa̰á̰-nà o dɔɔ̀ɔ nà mɛ̀ǹǹ pà pɛ́ɛ̀ péé-ko, k'ò mɛ̀ɛ té dii. ⁷ Pà yɔ̀ɔ-má dipú, kà pa nɔ̀ǹci é diìda pa dɛ́ɛ̀di kà pá bantá è yɔ̀ pà de foó foó-dà. Kà pá taá pɛha-ní teepú pà toò-pu *fìkìyéè fa̰à̰ti, é tɛ̀ni é tì dɛ̀i nayà-mɛ̀kù kpɛ́ɛmá, é yèe pa dɛ́ɛ̀di é sɔɔ̀na pa fɛ̀ci.

⁸ K'yé hḭn yohokú, yoku-yanaamú hɔ̰́ n'heu tḭ́ń wɔ̀ni, kà pá yekà Kɔ́yɔ̀ɔ Weèdi nampàta, kà nì cèǹtì ye yɛ̀ɛ̀di mɛhɛká. Kà pá cocí é taá sɔ̀di teená mɛhɛká ye yɛ̀ɛ̀di cɔhɔ̀ka è pú kpɛ̀i ní pà dɛ́há. ⁹ Kà Kɔ́yɔ̀ɔ Weèdi é yíí dɔɔ̀ɔ óò béka è yɔ̀: A péé ya? ¹⁰ K'ó nì tɛ̰́ná è yɔ̀: N yeèkaà-ní a nampàta-dà yɛ̀ɛ̀di mɛhɛká, k'yé n hḭn-nà wantafɔ̰̀di mìì tee-sá n foó-dà, mɛmá-dà tee ká n cocí é taá sɔ̀di. ¹¹ Kà Kɔ́yɔ̀ɔ Weèdi yɔ̀: Wodà a cakáà è yɔ̀ a foó-dà? A dá yetá n'dii-í-ma ye tee-bíidí n de hḭ́n a dá dii-dí? ¹² K'ó nì tɛ̰́ná è yɔ̀: Ye poòo a n kɔ̰́ɔ̰̀-ko è yɔ̀ tí pɛ́ɛ́ m'péé, mɛnń-dà nì nà n kɔ̰́ɔ̰̀ ká n dii. ¹³ Kà ní béka poòo è yɔ̀: Badà a pa̰à̰-ma ye pesà-ní? K'ò yɔ̀: Wàfa-dà n báńtáà é n yehèna ká n nì dii.

¹⁴ Ye wɔ̀ni kà ní caka wàfa è yɔ̀: Wàfà, mɔ̀ǹǹ hḭ́n-kó á hḭn mɛma, n k'áa nɔdá-á-ma nɔtí wɛǹni mɛhɛká. A kó n'yon tá̰mú-dà, é n'fudì a pɛutí hḭ́ǹka, é tódá yenì háá n'àa kṵ́mú fɔ̰̀ɔ̰kú. ¹⁵ N kó hédá kà kɔ̰ǹni-dà é dúú fɔ̰́ń nà poòo nɛ cɔhɔ̀ka. O yaàbíiká n'àa kpɛ́ɛká kó ya̰dá m'péé kɔ̰ǹni mɛhɛká-dà. O kpɛ́ɛká kó ya̰dá nàa a yudí é nì pɛ̰n-pɛ̰ntá-ma, k'àa kpɛ́ɛká é dɔntá o tacèǹcéǹni. ¹⁶ Kà ní tṵ́má caka poòo è yɔ̀: N kó hédá k'à té toó pɛutí nà náńkú-dà. A pɛdáma mɛ̀ɛ té kó n'dɔǹ-ń-ma dɛ́dɛ́í. A bìnɔ wɛǹni té kó m'péé a dɔɔ̀o hḭ́ǹka-dà. Mɛnń-dà mɛ̀ɛ kó n'à n'tee. ¹⁷ Kà ní yídá é fidí dɔɔ̀ɔ bɛ́ka óò caka è yɔ̀: Fɔ̰́ń dɔɔ̀ fɔ̰́ń, mìì tee-sá k'á teha a poòo wɛmá é dii tee-bíidí n de hḭ́n a dá dii-dí, n kó nɔda-á-ma teǹka n'àa pa̰à̰-sa kpɛ́mú. A fòùmu wɛǹni mɛhɛká, a màǹci-dà té kó bii k'á nɛɛ́ dɛ́tá a dipú. ¹⁸ Fɔ̰́ń nà míisḭ̀ǹti-dà té kó màa, a kó ká̰ńta-sá wɛǹni. Mìì yɛ̀hu-sá yɛ̀ɛ̀di mɛhɛká è yòǹ diisá-dà kó n'yòǹ a dipú.

¹⁹ A té kó ká̰tá a tḭ́ǹni wìku-dà é nɛɛ́ dɛ́tá a dipú.

A kó n'yòm̀pu-dà háá é yɔ̀ɔ é tón-nà teǹka a yɛɛ̀ni-ká-ní kú mɛhɛká.

M'a pa̰à̰ nà tá̰mú-dà, mu mɛhɛká-dà mɛ̀ɛ dɛɛ̀ a kó ya̰dá tón-má.

²⁰ Kà Àdám̀, ye dɔɔ̀ɔ é pa̰a̰ o poòo yèdi è yɔ̀: Ɛ́fù, mìì kpɛ̀i é n'yɔ̀-sa fòùmu, mìì tee-sá mɛnń-dà yòǹ nìku wɛǹni yṵṵ́. ²¹ Kà Kɔ́yɔ̀ɔ Weèdi é pa̰á̰ báatí nà nɔtí dɔɔcí é báná Àdám̀ n'ɔ̀ɔ poòo. ²² Mii kú dàhàka, kà nì yɔ̀: Ǹtɛ sá̰mà kà nìdo pentà è yònà t'oòcɔ̰́, è yá̰á̰ suumá nà sḭ̀ḭ̀ma. N koò pú kó teha k'ó pḭ́ń tee-bíidí mɛ̀nì kɔ̰́nì-di fòùmu, mìì tee-sá kà n ò hédà k'ò yɔ̀ɔ pḭ́ḿpu mɛni è nì dii, ò kó n'fòù-ú-dà k'yé n'kɔ́ɔ́ yɔ̀ɔmá. ²³ Ye Mɛmá-dà kà n'ɔ́ɔ̀ bɔ̀hà óò dèna Èdɛ́nì yɛ̀ɛ̀di mɛhɛká è yɔ̀ ó taá ká̰ńta teǹka ò yɛ̀ni-ká-ní kú mɛhɛká. ²⁴ N'ɔ̀ɔ̀ bɔ̀haà-ma mɛma é yɔ̀a, é tóó-ní Sèdìbɛ̰́ɛ̰̀pa-dà é hḭ́ná ye Èdɛ́nì yɛ̀ɛ̀di hḭ́ńkà bɛ́kàma è yɔ̀ pá n'ceí cɔ̀ku pà de hɔ̰́ tṵṵ̀na-kú é ta̰ntá-nà fòùmu teepú pesá. Nì de pà ceà é pɛ́ɛ́ é hḭ́ná-nà sepɛ̰ɛ̰̀dí-dà kà nì fiipú páàti wɛǹni è hɔ̰n pèdà pèdà è yònà ha̰dencí.