Cetáma 5

22 Avril. Martin BONDE. Le conseiller nous avait proposé de faire une note en bas de page pour le nom "Nɔ̀wéè" (vt29)

Àdám̀ yaàbíiká fùdi yɛɛ̀kaàma háá nà Nɔ̀wéè kpɛ́ɛká

¹ Ǹtɛ Àdám̀ yaàbíiká yèèka: Weèdi pa̰nà tḭ́ń daadí nìdo, óò pa̰ná k'ò nì yònà-á-ma. ² Nì de pà pa̰nà dɔɔ̀ɔ nà poòo-dà é yɔ̀ɔ é pà kóná. Nì mɛ̀ɛ pà pa̰nà tḭ́ń daadí mɔ́nní é pà yíí è yɔ̀ nììpa-dà. ³ Kà Àdám̀ ní n'káá beeká kɔ̀ta nà púta̰di é pɛdá bíidatá kà t'òò yònà dɛ́dɛ́í, k'ó tà pa̰a̰ yèdi è yɔ̀ Sɛ́tì. ⁴ Sɛ́tì kú pɛdáma dàhàka kà Àdám̀ é tṵ́má pa̰ná fòùku mɛhɛká beeká kɔ̀ɔnà nìì-dà. Ò de tṵ́mà pɛɛ̀-ɛ́-ma bííhí tɔɔhí, dahí nà pohí. ⁵ O fòùmu beeká wɛǹni de yòǹ beeká kɔ̀ɔnà wɔ́ì nà púta̰a̰-dà k'ó nɛɛ́ kpíí.

⁶ Kà Sɛ́tì é n'káá beeká kɔ̀ta nà kànùm̀ é pɛdá bíidatá kà ta yèdi tonà Ènɔ́sì. ⁷ Ènɔ́sì kú pɛdáma dàhàka, k'ó tṵ́má pa̰ná beeká kɔ̀ɔnà nìhì nà kàyehì-dà. Ò de tṵ́mà pɛɛ̀-ɛ́-ma bííhí tɔɔhí, dahí nà pohí. ⁸ O fòùmu beeká wɛǹni de yòǹ beeká kɔ̀ɔnà wɔ́ì nà píta nà kàdɛ́ɛ́-dà k'ó nɛɛ́ kpíí.

⁹ Kà Ènɔ́sì ní n'káá beeká púwɔ́ì é pɛdá bíidatá kà ta yèdi tonà Kènásì. ¹⁰ Ta kú pɛdáma dàhàka, k'ó tṵ́má pa̰á̰ fòùku mɛhɛká beeká kɔ̀ɔnà nìì nà píta nà kànùm̀-dà. Ò de tṵ́má pɛɛ̀-ɛ́-ma bííhí tɔɔhí, dahí nà pohí. ¹¹ O fòùmu beeká wɛǹni de yòǹ beeká kɔ̀ɔnà wɔ́ì nà kànùm̀-dà k'ó nɛɛ́ kpíí. ¹² Kà Kènánì é n'káá beeká púyehì é pɛdá bíidatá é tà yíí è yɔ̀ Màhàdèyɛ́dì. ¹³ Ò tà pɛdà-ma é yɔ̀ɔ é tṵ́má pa̰ná fòùku mɛhɛká beeká kɔ̀ɔnà nìì nà púnàhì-dà. Ò de tṵ́mà pɛɛ̀-ɛ́--ma bííhí tɔɔhí, dahí nà pohí. ¹⁴ O fòùmu beeká wɛǹni de yòǹ beeká kɔ̀ɔnà wɔ́ì nà píta-dà k'ó nɛɛ́ kpíí.

¹⁵ Kà Màhàdèyɛ́dì é n'káá beeká púkɔdì nà kànùm̀ é pɛdá bíidatá kà ta yèdi tonà Yèdɛ́tì. ¹⁶ Yèdɛ́tì kú pɛdáma dàhàka, k'ó tṵ́má pa̰ná fòùku mɛhɛká beeká kɔ̀ɔnà nìì nà púta̰a̰-dà. Ò de tṵ́má pɛɛ̀-ɛ́-ma bííhí tɔɔhí, dahí nà pohí. ¹⁷ O fòùmu beeká wɛǹni de yòǹ beeká kɔ̀ɔnà nìì nà púwɔ́ì nà kànùm̀-dà k'ó nɛɛ́ kpíí.

¹⁸ Kà Yèdɛ́tì é n'káá beeká kɔ̀ta nà púkɔdì nà kàdɛ́ɛ́ é pɛdá bíidatá kà ta yèdi tonà Hènɔ́kì. ¹⁹ Hènɔ́kì kú pɛdáma dàhàka, k'ó tṵ́má pa̰ná fòùku mɛhɛká beeká kɔ̀ɔnà nìì-dà. Ò de tṵ́mà pɛɛ̀-ɛ́-ma bííhí tɔɔhí, dahí nà pohí. ²⁰ O fòùmu beeká wɛǹni de yòǹ, beeká kɔ̀ɔnà wɔ́ì nà púkɔdì nà kàdɛ́ɛ́-dà k'ó nɛɛ́ kpíí.

²¹ Kà Hènɔ́kì é n'káá beeká púkɔdì nà kànùm̀ é pɛdá bíidatá kà ta yèdi tonà Màtùsàdɛ́mù. ²² Màtùsàdɛ́mù pɛdáma dàhàka, kà Hènɔ́kù é tṵ́m, pa̰á̰ fòùku mɛhɛká beeká kɔ̀ɔnà ta̰a̰-dà è tṵ̀n Weèdi sukú. Ò de tṵ́mà pɛɛ̀-ɛ́-ma bííhí tɔɔhí, dahí nà pohí. ²³ O fòùmu beeká wɛǹni de yòǹ, beeká kɔ̀ɔnà ta̰a̰ nà púkɔdì nà kànùm̀-dà k'ó nɛɛ́ kpíí. ²⁴ Ò de tṵ̀n Weèdi cɔ̀ku-dà dɛ́dɛ́í, háá kà pá yɔ̀ɔ óò mɔnka-ho mìì tee-sá Weèdi-dà d'oò tódà óò̀ dìkàna ni pesá.

²⁵ Kà Màtùsàdɛ́mù é n'káá beeká kɔ̀ta nà púniì nà kàyehì é pɛdá bíidatá kà ta yèdi tonà Dèmɛ́kì. ²⁶ Dèmɛ́kì pɛdáma dàhàka, k'ó tṵ́má pa̰ná fòùku mɛhɛká beeká kɔ̀ɔnà yehì nà púniì nà kàdɛ́ɛ́-dà. Ò de tṵ́mà pɛɛ̀-ɛ́-ma bííhí tɔɔhí, dahí nà pohí. ²⁷ O fòúmu beeká wɛǹni de yòǹ beeká kɔ̀ɔnà wɔ́ì nà púkɔdì nà kàwɔ́ì-dà k'ó nɛɛ́ kpíí.

²⁸ Kà Dèmɛ́kì é n'káá beeká kɔ̀ta nà púniì nà kàdɛ́ɛ́ é pɛdá bíidatá. ²⁹ K'ó tà pa̰a̰ yèdi è yɔ̀ Nɔ̀wéè. Ò de tà pɛ̰ḭ ye kú yèèdì è màhu o yàma mɛhɛká è tonà: Mɛntá-dà kó (wáńtá) ti kɔń ti wéékú nà náńkú ti yon-kú tɔmú hḭ́ǹka, mìì tee-sá Kɔ́yɔ̀ɔ nɔdáà teǹka. ³⁰ Ò pɛdà-ma Nɔ̀wéè é yɔ̀ɔ é tṵ́má pa̰á̰ fòùku mɛhɛká beeká kɔ̀ɔnà nùm̀ nà púwɔ́ì nà kànùm̀-dà. Ò de tṵ́mà pɛɛ̀-ɛ́-ma bííhí tɔɔhí, dahí nà pohí. ³¹ O fòùmu beeká wɛǹni de yòǹ beeká kɔ̀ɔnà yehì nà púyehì nà kàyehì-dà k'ó nɛɛ́ kpíí. ³² Kà Nɔ̀wéè é n'káá beeká kɔ̀ɔnà nùm̀ é pɛdá Sɛ́mù, nà Kámù nà Sàfɛ́tì.