Cetáma 6

Kpákpààma nììpa de pa̰kú-ma

¹ Nììpa de cetà ma wɛ́dápu teǹka hḭ́ǹka, é bíipohí, ² kà Weèdi bííhí6:2 Pàcɔ̰́ tonà Sɛ́tì bííhí-dà de dɔɔ́-nà Kàyɛ̰́ɛ̰̀ kpɛ́ɛhí. Mii kú bààsí, kà tɔɔ̀pa tonà Wɛɛ̀kupá-dà de pèǹtà-ní é hḭn nììpa é tɛ̀ni é dɔɔ́-nà nììpa bíipohí é dɛ́há é n'hɔ̰́tà ye bíipohí suu-ú-ma sàma ye wɔ̀ni kà pá taá ta̰si pa poòpa hi mɛhɛká é pà kádá. ^3-4 Yè de hɔ̰́tà dasàsàti-dà péé teǹka hḭ́ǹka, Weèdi bííhí de tɛ̀ni tḭ́ń wɔ̀ni é kádá nììpa bííhí é hì pɛha-nà bííhí. Ye dasàsàti mɛ̀ɛ baà de péé-ma bá nà mii kú dàhàka. Mɛntí-dà de yòǹ niìkpeépa mɛ̀m̀pà kú yèèka de yún-pá sukú dekáà wɔ̀ni. Kà Kɔ́yɔ̀ɔ é caka o cɔ̰́ɔ̰̀di è yɔ̀: N pú kó yédá n fòùmu sèèdi kà n'ní m'péé-nìdo mɛhɛká k'yé kɔ́ɔ́ yɔ̀ɔmá, mììtee-sá ò yòǹ nìdo mɛ̀ǹǹ kó kpíí-ko-dà. O fòùmu beeká wɛǹni koò pú kó ha̰tá beeká kɔ̀ta nà púdɛ́ɛ́.

⁵ Kà Kɔ́yɔ̀ɔ é cɔ́dí é n'hɔ̰́tà nììpa baà sɔ̰ncí è pa̰kú kpákpààma cɔ̰́ɔ̰̀di-dà teǹka hḭ́ǹka. Daàka wɛǹni pa yam̀màhàka de péé kpákpààma pa̰á̰ma hḭ́ǹka-dà. ⁶ K'òo yàma é cɔ̰ha dɛ́dɛ́í, k'ó baá mìì tee-sá k'ó yɔ̀ɔ é m'pa̰à̰-nà nìdo. ⁷ K'ò yɔ̀: N kó fíɔ́-ma nììpa n pa̰à̰-pa teǹka hḭ́ǹka. N kó yè fíɔ́wá-ma é pɛ́ɛ́ fíɔ́wá-nà nɔtí mɛ̀ǹtì fudì-ti ti pɛutí hḭ́ǹka, é pɛ́ɛ́-nà nɛ̀hi. N yàma cɔ̰háà-á-ma nà mìì tee-sá ká n yó éè m'pa̰nà-nà. ⁸ Àmá, kà Nɔ̀wéè mɛnn é dɛ́tá Kɔ́yɔ̀ɔ pa̰á̰suumá.

Weèdi kpɛ̀i é fḭ́hìna Nɔ̀wéè

⁹ Ǹtɛ Nɔ̀wéèhɔ̰́ɔ̰́tà wɛmá. Ò de tṵ̀n Weèdi-dà sukú. O wɔ̀ǹku kpɛ́ɛpá wɛǹni mɛhɛká, mɛnń-dà de coó è kɔ́ɔ́ kpákpààma màcɔ̰́mà Ǹtɛ bííhí ò de pɛdà-hi yèèka: ¹⁰ Hì de yɔ̀ǹ hìta̰a̰-dà: Sɛ́mù, Kámù nà Sàfɛ́tì. ¹¹ Há̰kà, teǹka nà ka nùdi hḭ́ǹka, nììpa pa̰á̰kpákpààma de wɛhikáà sàma-dà Weèdi yìhìka. Páàti wɛǹni, yikàǹfɔ̀ùka pa̰á̰ma-dà de sṵ́nà. ¹² Kà Weèdi é dɛ́há é n'hɔ̰́tà teǹka de pɛ̰̀ḭ-ḭ́-ma dɛ́dɛ́í. Nììpa wɛǹni baà de fòù kpákpààma pa̰á̰ma mɛhɛká-dà.

¹³ Kà ní caka Nɔ̀wéè è yɔ̀: Nììpa kpákpààma hédà kà teǹka é sṵ́ná kpeèti pa̰á̰ma sàma. N koò pú kó hédá ka pá n'fòù. N kó pà fíɔ́wá-ma pɛ́pɛ́í pa wɛǹni teǹka hḭ́ǹka. ¹⁴ Há̰kà fɔ̰́ń, pɛha teepú pà toò-pu *Kòfɛ́ɛ̀ dɛcí, é kpɛ̰́ḭ́ a cɔ̰́ɔ̰̀di nɛ́ɛmá dawɛ́ɛ̀ku sàku. Á kù pa̰ná kà kú n'káá nàmɔ̀ka dɔ́ɔ́di. K'à yɔ̀ɔ miya̰, k'á pɛha kùtìnɔ́ɔ̀ tá̰à̰ti mɔ̀mu\fr é kɔdá ku mɛhɛká nà ku dàhàka. ¹⁵ Ǹtɛ mɛ̀ɛkà a kó kù pa̰kamá kú bookú: Ku dɛumú kó n'yòǹ mɛ́tídìpa kɔ̀ta nà púnùm̀-dà, kà ku pɛɛ̀kamú ní n'yòǹ mɛ́tídìpa púdɛ́ɛ́ nà pànùm̀. É yídá kà ku dɛumú hḭ́ńkà kpɛ́mú ní n'yòǹ mɛ́tídìpa píta nà pànùm̀. ¹⁶ Á kù pḭ́ná é hédá kà boòma é m'péé ku pḭ́ḿpḭ́ǹti nà hḭ́ǹka bɛ́ɛ́cí ye cɔhɔ̀ka. Ye boòma pɛɛ̀kamú ní n'yòǹ mɛ́tídì yàhakú. Á pa̰á̰ há̰ńnùdi ku pḭ̀ǹdikú kùcɔ̰́ hḭ́ǹka. Á kù sɔ̰kapa hɔ̰́ɔ̰́hí kà hí n'yòǹ hìta̰a̰, hɔ̰́dìdìkàta kpɛ́ɛmá. ¹⁷ Mmí mɛ̀ɛkà n kó wɛ́í-ní nɛ́ɛsṵ́náku sàku-dà kà kú dii mìì fòù-sa wɛǹni. Mìì péé-sa wɛǹni teǹka, yè kó kpíí-ma. ¹⁸ Há̰kà, nà fɔ̰́ń-dà n kó pa̰á̰-ma n múnáma. Kà wɔ̀ni tɛ̀i k'á dúú ye nɛ́ɛmá dawɛ́ɛ̀ku mɛhɛká n'àa poòo, n'àa bííhí nà hi kú poòpa. ¹⁹ Á pɛ́ɛ́ é dúù-nà nɔtí ku mɛhɛká. Á tódá tìdɛ́ɛ́ tìdɛ́ɛ́ bookú bá mɛ̀ǹkù dɛ̀ɛ̀-ku mɛhɛká é dúùwa k'yé teha kà tì mɛ̀ɛ té dempa. Á tì hɛ̀da datá nà nitá. ²⁰ Nɔtí boocí wɛǹni-dà kó tɛ̀ni a pesá: mɛ̀ǹtì cèǹtì-ti ti tààka hḭ́ǹka, mɛ̀ǹtì fudì-ti ti pɛutí hḭ́ǹka, é pɛ́ɛ́-nà nɛ̀hi. Tì kó tɛ̀ni é n'yòǹ tìdɛ́ɛ́ tìdɛ́ɛ́-dà datá nà nitá k'yé teha kà tí dɛ́tá fòùmu. ²¹ Pɛha diití wɛǹni pà yon-tí, é hutá ye nɛ́ɛmá dawɛ́ɛ̀ku mɛhɛká, k'yé teha kà nɛ́ n'káa nɛ kó n'yon-sá fɔ̰́ń nà mɛntí. ²² Kà Nɔ̀wéè é tṵṵ̀na Weèdi de ò hḭ́mpú, é pa̰ná nì de ò cakáà-sa wɛǹni.