Cetáma 13

Àbádám̀ nà Dɔ̀ɔ́tì pa totáma

¹ Kà Àbádám̀ é yíí-ní Èsípútì teǹka, é tón Nɛ̀kɛ́bù bɛ́ka, mɛnń, n'ɔ̀ɔ poòo, n'ɔ̀ɔ kpɛ́ɛsá wɛǹni, è nɔɔ̀-nà Dɔ̀ɔ́tì. ² Ò de káá kááma-dà sàma: Nɔtí, nà díi-máàti, nà wúdó. ³ K'ó yídá Nɛ̀kɛ́bù é n'katì kàtì-ho cɔ̀ku, háá é yó ta̰ntá Bètɛ́dì, é táá kaàdi bɛ̀m̀bɛ̀ni ò de cetá m'péé-di, kà nì péé Bètɛ́dì nà Àyíì cɔhɔ̀ka. ⁴ Ye pesá-dà ò de maá-ma dɔ̀hɔ̀di cɔ̰̀ǹcɔ̰̀ni, é yíí Weèdi è yɔ̀ Kɔ́yɔ̀ɔ. ⁵ Dɔ̀ɔ́tì de ò tṵ̀n è mɛ̀ɛ té káá-ma nɔtí sàma: Bɔɔhí, nà hɔ̰̀ci, nà nɛ̀ci. Ò de tṵ́mà káá-ma fḭ́ḭná o cɔ̰́ɔ̰̀di kpɛ́ɛná. ⁶ Pa nɔtí de wɛhi sàma mɔ́ma-dà. Bɛ̀m̀bɛ̀ni pà de kaàdi-dí de pú pɛsì, è kó nɛɛ́ pà tà̰ǹta pa dɛ́ɛ̀ka. ⁷ Ye kú kpɛ́mú, kà kɔ̰ɔ̰̀ni é yɔ̀a dúní pa hɔ̰ɔ̰̀-cɛ̰má cɔhɔ̀ka. Yè de tṵ́mà hɔ̰́tà, Kànàáà yam̀ma nà Fèdésìpa-dà mɛ̀ɛ té péé ye teǹka. ⁸ Kà Àbádám̀ é caka Dɔ̀ɔ́tì è yɔ̀: M'a síɔ́kú-ma. Yè pú yònà kɔ̰ǹni ní m'péé mmí nà fɔ̰́ń ti cɔhɔ̀ka, yoo n hɔ̰ɔ̰̀-cɛ̰má n'àa kpɛ́ɛpá cɔhɔ̀ka, mìì tee-sá ti yɛń-ma. ⁹ Teǹka-dà dɔɔ́ a dìi-sà wɛnnì a yìhìkà. Hédá kà tí totá. K'à ka̰hà̰ cà̰ǹkamá n kó ka̰há̰ hiòma-dà, k'à mɛ̀ɛ ka̰hà̰ hiòma ká n ka̰há cà̰ǹkamá. ¹⁰ Kà Dɔ̀ɔ́tì é wáńtá Sùùtɛ̰́ɛ̰̀ kóńkú bɛ́ka, é n'hɔ̰́tà ku nùma nà ku kpeèdi de bóhi-í-ma. É tódá ye pesá háá nà yɔtí pà toò-ti Sòwáà, kà Weèdi nɛɛ́ pɔ́dá Sòdɔ́mù nà Kòmɔ́ɔ̀ yɔtí, ye bɛ̀m̀bɛ̀ni de sudi è yònà Èdɛ́nì yɛ̀ɛ̀di Weèdi de pa̰à̰-di-dà, è tṵ́mà sudi è yònà Èsípútì teǹka. ¹¹ Kà Dɔ̀ɔ́tì é baàta ka bɛ́ka, é cɔ́á. Ma kú bookú-dà pà de totà-ma. ¹² Kà Àbádám̀ é cá̰ńtá é kaàdi Kànàáà teǹka mɛhɛká. Kà Dɔ̀ɔ́tì mɛnn é ka̰há̰ é táá kaàdi è hɛ́dí-nà yɔtí mɛ̀ǹtì de péé-ti ye Sùùtɛ̰́ɛ̰̀ kóńkú nùma. K'yé m'péé k'ó fudí o fḭ́ḭná, é taá kaàdi è hɛ́dí-nà Sòdɔ́mù yɔtí. ¹³ Sòdɔ́mù nìpa de fòù sḭ̀ḭ̀ma mɛhɛká-dà dɛ́dɛ́í. Pa pa̰á̰ma de pú teháà Weèdi pépédí.

Weèdi hḭ́nà Àbádám̀ nùdi è yɔ̀ nì k'óò pa̰a̰ teǹka

¹⁴ Dɔ̀ɔ́tì nà Àbádám̀ totà-ma é yɔ̀a, kà Kɔ́yɔ̀ɔ Weèdi é caka Àbádám̀ è yɔ̀: Nɛɛ̀hi bɛ̀m̀bɛ̀nì a péé-dì kú hḭ́ńkà, é wáńtá-ho pɛ̰̀pɛ̰̀-yúńyúùma háá nà pɛ̰̀pɛ̰̀-cúɛ́cúɛ̀ma, é yídá wáńtá-ho hḭ́ńkà-bɛ́kàma nà fɔ̰̀-bɛ́kàma. ¹⁵ Tenkà a dìi-kà wɛnnì-ní, n kó wáńtá kà pa̰a̰ fɔ̰́ń-dà n'àa yaàbíiká, kà nɛ́ kà teeka k'yé n'kɔ́ɔ́ yɔ̀amá. ¹⁶ N kó wɛ́kàna a yaàbíiká kà ká ya̰dá n'wɔ̰ǹti é n'yònà tá̰pùdùmu tá̰dící-dà. Mɛ̀ǹǹ kó nɛɛ́ kaàn-kó tá̰pùdùmu tá̰dící, ye yaǹn-dà kó nɛɛ́ ya̰dá kaàn a yaàbíiká. ¹⁷ Yídá é cèn, é dɛ́há ye tenkà ka wɛhimú sá̰ma. Mɛnká-dà n kó wáńtá áa pa̰a̰-má. ¹⁸ Kà Àbádám̀ é yídá é tuùta ye pesá n'ɔ̀ɔ fḭ́ḭná, é táá kaàdi Màmùdéè teesàna cɔhɔ̀ka, è hɛ́dí-nà Èbùnɔ́ɔ̀. K'ó maá ye pesá dɔ̀hɔ̀di cɔ̰̀ǹcɔ̰̀ni, è kó n'dɔń Kɔ́yɔ̀ɔ.