Cetáma 12

Àbádám̀ yííma

¹ Daadí yènì kà Kɔ́yɔ̀ɔ caka Àbádám̀ è yɔ̀: Yídá a teǹka é hédá a yɛm̀ma n'àa báàa hɔ̰́ɔ̰́tà-kpɛ́ɛpá, é taá yɔtí n k'áa bɛka-tí kú mɛhɛká. ² A pesà-dà n kó deèna-má-ní bookú sàku. N k'áa kóná-ma é wɛkàna a yèdi. Fɔ̰́ń-dà kó n'yòǹ nììpa wɛǹni kónáma yudí. ³ Mɛ̀m̀pà k'áa kóná-pa wɛǹni, n kó pà kóná-ma, mɛ̀m̀pà mɛ̀ɛ k'áa nɔda-pá wɛǹni, n kó pà nɔda-á-ma. Teǹka heèka wɛǹni kó ya̰dá dɛ́tá kónáma nà fɔ̰́ń kú yèdi-dà. ⁴ Kà Àbádám̀ é teha é yídá Hàdánì yɔtí, é n'yònà Weèdi de ò hḭ́mpú, k'òo ya̰ǹn bíitá Dɔ̀ɔ́tì óò nɛ̀ǹta. Ò de káá ye wɔ̀ni beeká púyehì nà kànùm-dà. ⁵ Kó tódá o poòo Sàdàyíì, nà Dɔ̀ɔ́tì, nà pa kááma wɛǹni, nà núm̀ma pà de dontà-pa Hàdánì, kà pá ka̰há̰ háá nà Kànàáà teǹka mɛhɛká. ⁶ Pà tɛ̀i-má Kànàáà teǹka, kà Àbádám̀ é kà dèta é yòǹ mɛma háá nà teesàku pà toò-ku Mɔ̀déè pesá, kà kù péé bɛ̀m̀bɛ̀ni pà toò-di Sìsɛ́m̀. Ye kú wɔ̀ni, è hɔ̰́tà Kànàáà nììpa-dà péé ye teǹka. ⁷ Kà Kɔ́yɔ̀ɔ é fodá-ní Àbádám̀ óò caka è yɔ̀: Tenkà mɛnkà, n kó wáńtá kà pa̰a̰ a yaàbíiká-dà. Kà Àbádám̀ é madí ye pesá dɔ̀hɔ̀di cɔ̰̀ǹcɔ̰̀ni, Kɔ́yɔ̀ɔ mɛ̀ǹǹ de ò fodà-ko kpɛ́mú. ⁸ K'yé m'péé, k'ó yídá ye pesá é taá ta̰à̰ka mɛhɛká, Bètɛ́dì yɔtí hḭ́ńkà-bɛ́ka. K'ó tɛ̀i ye pesá é kpɛ̰́ḭ́ o fḭ́ḭná è wáń Bètɛ́dì yɔtí fɔ̰̀-bɛ́ka, Àyíì kpɛ́ɛtí hḭ́ńkà-bɛ́ka. K'ó tṵ́má madí ye pesá dɔ̀hɔ̀di cɔ̰̀ǹcɔ̰̀ni Weèdi kpɛ́mú, é nì yíí è yɔ̀: Kɔ́yɔ̀ɔ. ⁹ K'ó yídá ye pesá, é pɛ̰ɛ̰̀a̰ cúɛ́cúɛ̀di, Nɛ̀kɛ́bù teǹka bɛ́ka, è kàtì kàtì-ho cɔ̀ku.

Àbádám̀ taá Èsípútì teǹka mɛhɛká

¹⁰ Ò tɛ̀i-má ye pesá, kà kòni dúní ye teǹka mɛhɛká è tohi dɛ́dɛ́í, kà Àbádám̀ é yídá ye pesá é taá Èsípútì teǹka mɛhɛká, è kó taá pa̰á̰ daàka cɛ̰́ma. ¹¹ Kà pá m'patì-ho ye teǹka, kà Àbádám̀ é caka o poòo Sàdàyíì è yɔ̀: Wáńtá! N yá̰á̰-ma è yɔ̀ a yòǹ poosudó mɔ́nń. ¹² Èsípútì yam̀ma k'áa dɛ́há tḭ́ń wɔ̀ni, pà kó n'yɔ̀ a yòǹ n poòo-dà. Ye wɔ̀ni pà kó n kɔ̀ù-ú-ma, é hédá fɔ̰́ń kà ní n'fòù. ¹³ Á pà caka é n'yɔ̀ a yòǹ n potɔ̰ɔ̰̀ɔ̰-dà, k'yé teha kà pá n púsí sukú ká n tṵ́má n'fòù n'àa kú nɔɔ̀ti. ¹⁴ Ò tɛ̀i-má Èsípútì teǹka mɛhɛká, kà Èsípútì yam̀ma é dɛ́há é n'hɔ̰́tà o poòo sudi-í-ma sàma. ¹⁵ Kà wódo sɔ̰̀kànɔ̀ti mɛ̀ɛ té ò dɛ́há, é táá caka wódo o suukú sá̰pu. Kà wódo yɔ̀ p'óò ya̰à̰ní o nahà̰ku mɛhɛká. Kà pá mà hḭn. ¹⁶ Kà wódo é púsí Àbádám̀ sukú nà Sàdàyíì kpɛ́mú. K'óò pa̰a̰ hɔ̰̀ci, nà bɔhí, nà nɛ̀ci, nà sa̰mmùǹhi dahí nà nihí, nà bɔnamáti, nà núm̀ma poòpa nà daapá. ¹⁷ Àmá kà Kɔ́yɔ̀ɔ é wɛ́í-ní wèéwèdo sào, *Fàdàɔ̰́ɔ̰̀ n'ɔ̀ɔ hɔ̰́ɔ̰́tà-kpɛ́ɛpá hḭ́ǹka, nà Àbádám̀ poòo Sàdàyíì kú nɔɔ̀ti. ¹⁸ Kà Fàdàɔ̰́ɔ̰̀ é yíí-ní Àbádám̀ è yɔ̀: Badà tee k'á n pa̰á̰ miya̰? Badà tee k'à pú n cakáà è yɔ̀ a poòo-dà? ¹⁹ Yè cèǹkaà k'à yɔ̀ a potɔ̰ɔ̰̀ɔ̰-dà, é hédá ká n ò tódá k'ó hḭn n poòo? Ǹtɛ a poòo sá̰mà-ní, ò tódá kà nɛ́ ka̰há̰. ²⁰ K'ó yídá kɔ̰́ɔ̰́ nùdi o dapàm̀ma, è yɔ̀ p'óò túha óò dèna pa yɔtí, mɛnń, n'ɔ̀ɔ poòo, n'ɔ̀ɔ kpɛ́ɛsá wɛǹni.