Cetáma 15

Weèdi pa̰à̰ múnáma nà Àbádám̀

¹ Kà miya̰ é ka̰há̰, kà Kɔ́yɔ̀ɔ Weèdi é tɛ̀ni é wɛɛ́-nà Àbádám̀ daadí yènì dɔhɔ̀ti mɛhɛká, è yɔ̀: Dá n'wani Àbádám̀. N kó n'à m'púsí-ma, sḭ̀ǹya̰ yècḭ́ḭ̀ pú k'áa dɛ́há. Sɛdàma pa̰dí n kó ya̰dá a pa̰a̰-dí, k'ó n'wɛhi sàma-dà. ² Kà Àbádám̀ é nì tɛ̰́ná è yɔ̀: N Weèdi n Bateù, mmɔ́ńya̰-dà a kó tṵ́má n pa̰a̰-má k'yé n tempa-nà? A pú n pɛ̰ḭ bíitá háá kà n yɔɔ̀ kɔ́dí kṵ́mú. Mɛ̀ǹǹ kó kpàa-kó n kpàtìdi kà n kpíi, mɛnń-dà héé Èdìyèsɛ́ɛ̀ Dàmásì kóoó. ³ Ò yòǹ n núǹn-dà, n bíída dɔ. A pú n pɛ̰ḭ-má kpɛ́mú bíitá, mɛnń-dà kó kpàdi n kpɛ́ɛsá wɛǹni. Kà Kɔ́yɔ̀ɔ Weèdi óò tɛ̰́ná è yɔ̀: Á̰à̰, mɛnn pú kó kpàdi a kpàtìdi. Bíitá a mɔ́nń kó pɛdá-ta-dà kó kpàdi a kpàtìdi. Kà n'ɔ́ɔ̀ dèna-ní tapaàdi, óò bɛka hḭ́ǹka hà̰hi è yɔ̀: Cɔ́dí hḭ́ǹka hà̰hi sá̰ma, hì kàn k'à kó nɛdá. Hi dɔ́ɔ́dì sá̰mà, a yaàbíiká kú dɔ́ɔ́di kó ya̰dá n'sá̰á̰-ma-dà. ⁴ Kà Kɔ́yɔ̀ɔ Weèdi óò tɛ̰́ná è yɔ̀: Á̰à̰, mɛnn pú kó kpàdi a kpàtìdi. Bíitá a mɔ́nń kó pɛdá-ta-dà kó kpàdi a kpàtìdi. ⁵ Kà n'ɔ́ɔ̀ dèna-ní tapaàdi, óò bɛka hḭ́ǹka hà̰hi è yɔ̀: Cɔ́dí hḭ́ǹka hà̰hi sá̰ma, hì kàn k'à kó nɛdá. Hi dɔ́ɔ́dì sá̰á̰-mà, a yaàbíiká kú dɔ́ɔ́di kó ya̰dá n'sá̰á̰-ma-dà. ⁶ Kà Àbádám̀ taàa o dandaní Kɔ́yɔ̀ɔ Weèdi de ò cakáà-sa hḭ́ǹka. Ye kú kpɛ́mú, kà n'ɔ́ɔ̀ dìda nìdo mɛ̀ǹǹ coó-ko. ⁷ Kà ní tṵ́má óò caka è yɔ̀: Mmí-dà Kɔ́yɔ̀ɔ mɛ̀ǹǹ a dènà-ko-ní Údì yɔtí, Sàdìdéèpa teǹka mɛhɛká, è k'áa pa̰a̰ heedì mɛnì k'á nì teeka. ⁸ K'ó nì béka è yɔ̀: Weèdi, n Bateù, ntɛ́ n kó hḭmà é n'yá̰á̰ nà mɔ́ma è yɔ̀ ye heedì, mmí-dà kó nì teeka? ⁹ Kà nì yɔ̀: Taá n pɛha-ní naàsɛɛ̀di beé kàta̰a̰ kpɛ́ɛdí, nà bɔɔnitá beé kàta̰a̰ kpɛ́ɛtá, nà hɔ̰ɔ̰̀daadí beé kàta̰a̰ kpɛ́ɛdí, nà nàńkpetadá, nà pàǹdɔ̀pàǹni, éè nà n ya̰à̰ní miì. ¹⁰ K'ó taá pɛha-ní ye niìya̰ wɛǹni éè tɛɛ̀ní ni pesá, é tɛ̀ni éè kɔ̀ù, é tódá nɔtí kú wɛǹni é tì fìhà ti cɔhɔ̀ka cɛ̰má màdɛ́ɛ́ màdɛ́ɛ́, é tódá ye fììka é kà tun-tunkaná nà ka tɔɔ̀ka. Nɛ̀hi mɛnhi, ò de pú hì fìhaà. ¹¹ Kà yòti é tɛ̀ni è kó dii ye nɔtí màǹci, k'ó tì bɔ̀hà. ¹² Weèdi dɔti tḭ́ń wɔ̀ni, kà nuǹdɔsàmu óò tódá. Ye nuǹdɔmú mɛhɛká, k'yé ò hḭn-nà bìḿbìni sàdi, kà wantafɔ̰̀di óò cɛ̰ɛ̰́ sàma. ¹³ Kà Kɔ́yɔ̀ɔ óò caka è yɔ̀: Á n'yá̰á̰ è yɔ̀ a yaàbíiká kó ya̰dá wèe tɔɔ̀pa teǹka mɛhɛká-dà, kà pá pà núná, é pà diá náńkú háá beeká kɔ̀ɔnà nàhì. ¹⁴ Há̰kà, n kó ya̰dá yɔ̰́ń-ma toòka yɔtí mɛ̀ǹtì kú nììpà kó pà kpáhìna-pá pa núm̀ma. Ye kú dàhàka, kà pá tì n'yɛ̀tì è káá kááma sàma. ¹⁵ Fɔ̰́ń mɛ̀ɛkà, a kó kpɛ̰́ń-ma sàma é nɛɛ́ kpíí é hɔ̰́tá a báàpa kpííku mɛhɛká nà wɛ̀ɛ̀di. ¹⁶ A yaàbíiká nàhiká kú *wɔ̀ǹku mɛhɛká-dà kà kó ya̰dá tóní-ma-ní miì, mìì tee-sá, Àmɔ́dìpa sḭ̀ḭ̀ma mum pú pɛtà-ní, kà n kó pà bɔ̀hà yɔɔtì mɛntì kú mɛhɛká. ¹⁷ Weèdi dɔdi tḭ́ń wɔ̀ni k'yé biikà hɛ̰́ṵ̀, k'ó dɛ́há kà ha̰sàmu yúudaadí, nà ha̰-dencí é yɛ̀dì ye nɔtí fììka cɔhɔ̀ka. ¹⁸ Ye kú daadí-dà, Kɔ́yɔ̀ɔ Weèdi pa̰à̰-ma múnáma nà Àbádám̀, óò caka è yɔ̀: A yaàbíiká-dà n kó ya̰dá kɔ̰́ɔ̰́-ma tenkà mɛnkà-ní é tódá kóńdafá mɛ̀ǹfà kpɛ̰́dí-fa Èsípútì teǹka, háá nà kónsàku pà toò-ku Èfáátì. ¹⁹ Ye tenkà-ní, boocí dɔ́ɔ́di-dà kà tee: Kénìpa, nà Kènísìpa, nà Kàdìmɔ́nìpa, ²⁰ nà Hítìpa, nà Fèdésìpa, nà Hèdèfátìpa, ²¹ nà Àmɔ́dìpa, nà Kànàáà yam̀ma, nà Kìdìkásìpa, nà Sèbúsìpa.