Cetáma 16

Ìsìmàyɛ́dì pɛdáma

¹ Sàdàyíì, Àbádám̀ poòo de yɛ̰dí-ma. Ò de p'óò pɛɛ̀-nà bíitá. È hɔ̰́tà ò káá núnsepàǹn òcɔ̰́ǹ kà p'òò tonà Àkáà, k'ò yòǹ Èsípútì yaǹn. ² K'ó caka o dɔɔ̀o Àbádám̀ daadí yènì è yɔ̀: Kɔ́yɔ̀ɔ-dà n kpanà è yɔ̀ n dá pɛdá bíitá. Taá n núnsepàǹn bɛ́ka, k'yè púdí nà mɛnn kú nɔɔ̀ti, n kó dɛ́tá-ma bíitá. Kà Àbádám̀ é teha o poòo de hḭ́mpú. ³ Ye wɔ̀ni, k'ó tódá o núnsepàǹn óò kɔ̰́ɔ̰́ o dɔɔ̀ɔ Àbádám̀ k'ó hḭn o poòo. Ye kú niì wɛnnì de pa̰kú, kà Àbádám̀ yɔ̀a pa̰á̰pu-dà beeká píta Kànàáà teǹka mɛhɛká. ⁴ K'ó múná dɔɔdí nà ye núnsepàǹn, k'ó póń. Ò hɔ̰́tà-ma ò póń, ye wɔ̀ni k'ó diìda o hɔ̰́ɔ̰́tà màa hécí. ⁵ K'yèe kú pa̰á̰ma é tɔ̰dí Sàdàyíì dɛ́dɛ́í, k'ó caka o dɔɔɔ̀ Àbádám̀ è yɔ̀: Fɔ̰́ń-dà tee kà n núnsepàǹn n teù cɔ̀kà mɛnkà-ní. Mmí mɔ́nń-dà ò hɛ̀dà óò n'à kɔ̰́ɔ̰́ k'ò yòǹ a poòo. Ò hɔ̰́tà-ma sá̰mà ò póń, k'ò há̰ dìi mmí hécí. Kɔ́yɔ̀ɔ Weèdi-dà kó ti sída ye wɛɛmà mɛmà-ní, é dɛ́há ti mɛ̀ǹǹ pa̰à̰-ko k'yè coó mmí nà fɔ̰́ń. ⁶ Kà Àbádám̀ óò tɛ̰́ná è yɔ̀: Fɔ̰́ń-dà tee a núnsepàǹn o tààka n'ɔ̀ɔ yuudí. Ò pa̰ná fɔ̰́ń yàma sɛkáàma. Ye mɛmá-dà, kà Sàdàyíì mɛ̀ɛ ò diá náńkú dɛ́dɛ́í, háá k'ó yó yɛ̀ɛ̀ hɔ̰́ɔ̰̀ta. ⁷ Kà Weèdi tɔntɔndikó^a óò pèta-nà bíńtadá tàcɔ̰́tà kú fɔ̰̀di, càwenkú mɛhɛká, k'yèe bíńtadá hɛ́dí-nà Súúdì cɔ̀ku. ⁸ K'óò béka è yɔ̀: Àkáà, Sàdàyíì núnsepàǹ, a yɛɛ̀ni-nà ya-dà-ní? A kɔ́dí ya? K'óò tɛ̰́ná è yɔ̀: N cocí-ní n hɔ̰́ɔ̰́tà màa-dà. ⁹ Kà Weèdi tɔntɔndikó óò caka è yɔ̀: Tón a hɔ̰́ɔ̰́tà màa pesá é tɛ̀i óò n'you-nà toòka. ¹⁰ N kó ya̰dá wɛ́kàna-á-ma a yaàbíiká kà ká n'wɔ̰ǹti, bá nìdo pú kó nɛɛ́ kà kàn. ¹¹ Ǹtɛ múńdìkaà k'à póń è kó pɛdá bíídatá. K'à tà pɛdà, k'á tà yíí è yɔ̀ Ìsìmàyɛ́dì, mìì tee-sá Kɔ́yɔ̀ɔ Weèdi yeèkaà-á-ma a náńkú dawòni. ¹² Ye bíítà kó ya̰dá n'yònà yɛ̀ɛ̀di sa̰mmùǹta-dà. Tà kó ya̰dá n'kɔ́ɔ́ tà naa-nà-ko, òcɔ̰́ǹ mɛ̀ɛ pú kó ya̰dá tà n'naa-nà. Tà kó ya̰dá n'ceń-ma ta cɔ̰́ɔ̰̀di, tà pú kó pɛ́ɛ́-nà nììdì. ¹³ Weèdi wɛi-má mɛma é yɔ̀a, kó béka o cɔ̰́ɔ̰̀di è yɔ̀: Hó! Mɔ́masí-dà n dɛ́hà-ma Weèdi mɛ̀nì n dìi-dí è há̰ káà fòù? K'ó pa̰a̰ yèdi ye Weèdi mɛ̀nì de ò wɛɛ̀-nà-di è yɔ̀: Ɛ́ɛ́-Hòdóì, mìì cakú-sa è yɔ̀ Weèdi mɛ̀nì n dìi-dí. ¹⁴ Mɛmá-dà tee kà pá pa̰a̰ ye bíńtadá yèdi è yɔ̀: Bɛ̀ɛ́-Dàháì-Hòdóì, mìì cakú-sa è yɔ̀ Weèdi mɛ̀nì n dìi-dí bíńtadá. Ye bíńtadá de péé Kàdɛ́sì nà Bèdɛ́tì cɔhɔ̀ka-dà, ye cɔ̀ku bɛ́ɛ́kú. ¹⁵ Kà Àkáà é pɛdá Àbádám̀ bíídatá, k'ó tà yíí è yɔ̀ Ìsìmàyɛ́dì. ¹⁶ Ìsìmàyɛ́dì pɛdá benní, kà Àbádám̀ káá beeká púniì nà kà kɔ̀ɔ̀-dà.