Cetáma 25

Àbààhám̀ bííhí tɔɔhí

¹ Sàdáà kṵ́mú dàhàka, kà Àbààhám̀ é tódá poòo tɔɔ̀o k'òo yèdi tonà Kètùdáà. ² K'óò pɛɛ́-nà bííhí kà hi yèèka tonà: Sìm̀dánì, Yòkùsánì, Mɛ̀dánì, Màdíánì, Ìsèbákì, nà Súwáà. ³ Kà Yòkùsánì é yídá pɛdá Sèbáà nà Dèdánì. Dèdánì yaàbíiká boocí-dà de dɛɛ̀ Àsùdím̀pa, nà Dètùsím̀pa, nà Dèùmím̀pa. ⁴ Kà Màdíánì mɛ̀ɛ té pɛdá bííhí, kà hi yèèka tonà: Èfáà, Èfɛ́ɛ̀, Hànɔ́kì, Àbìdáà nà Ɛ̀ɛ̀dáà. Mɛmpá kú wɛǹni-dà de yòǹ Kètùdáà fɔ̰̀di kpɛ́ɛpá.

⁵ Há̰kà, Àbààhám̀ de káá-ma kááma wɛǹni, Ìsáákì cɔ̰́ɔ̰̀di-dà ò de mà kɔ̰́ɔ̰̀-ma. ⁶ Mìì héé-sa o podɛ́ɛ̀pa bííhí, mɛnhi k'ó hì pa̰a̰ pa̰a̰ pa̰ká, é hì dèna hɔ̰́ɔ̰̀ta è káà fòù, é hì bɔ̀hà dɛùma è yɔ̀ hí nátá-nà o bíitá Ìsáákì. K'ó hì bɔ̀hà, kà hí ka̰há wèǹku yɛɛ̀hu-ká-ní bɛ́ka.

Àbààhám̀ kṵ́mú

⁷ O fòùmu beeká wɛǹni de yòǹ beeká kɔ̀ta nà púyehì nà kànùm̀-dà, ⁸ k'ó nɛɛ́ é kpíí. K'ó kpíí é hɔ̰́tá o yààpa, è kpɛ̰́ń è dɛn kpɛ̰́ǹti sukú. ⁹ K'òo bííhí, Ìsáákì nà Ìsìmàyɛ́dì óò dáná Màkpèdáà tá̰a̰beèdi fɔ̰̀ɔ̰kú mɛhɛká, kà kù péé Èfùnɔ́ɔ̀ yɛ̀ɛ̀di mɛhɛká è hɛ́dí-nà Màmùdéè. Ye Èfùnɔ́ɔ̀ báàa yèdi-dà de dɛɛ̀ Sòhádì, k'ò yòǹ Hítìpa bookú. ¹⁰ Àbààhám̀-dà de dontà ye yɛ̀ɛ̀di Hɛ́tì yaàbíiká pesá. Mií-dà pà de ò dánà-ma n'ɔ̀ɔ poòo Sàdá. ¹¹ Àbààhám̀ kṵ́mú dàhàka, kà Weèdi é kóná o bíitá Ìsáákì. Ò de kaàdi è hɛ́dí-nà bíńtadá pà toò-ta-dà *Dàháí-Hòdóì.

ÈSÀYÚÙ NÀ SÀKƆ́PÙ WƐƐMÁ

¹⁹ Ǹtɛ Ìsáákì hɔ̰́ɔ̰́tà wɛmá de yòm̀pu: Àbààhám̀-dà de pɛdà Ìsáákì. ²⁰ Kà Ìsáákì n'káá beeká púnàhì, é tódá Hèdèbèkáà, Dàbánì potɔ̰ɔ̰̀ɔ̰, k'ò yòǹ o poòo. Hèdèbèkáà báàa de yòǹ Pàdáḿ-Àdám̀ teǹka nìdo-dà, kà p'òò tonà Bètúɛ́dì, k'òo bookú yòǹ àdàmɛ̀yɛ̰́ɛ̰̀. ²¹ Hèdèbèkáà há̰ de pú pɛhí. Kà Ìsáákì é cɔhà Kɔ́yɔ̀ɔ è yɔ̀ ó tempa-nà o poòo k'ó póń. Kà Kɔ́yɔ̀ɔ é teha o cɔhàdi, kà Hèdèbèkáà póń sìkàpa. ²² K'yèe bííhí té n'kutìpu, è bòhu hi tɔɔhí hì màà pɛutí mɛhɛká. Ye wɔ̀ni, kà hi màa yɔ̀: K'yè hɔ̰́ n'yòǹ mɛmà-dà, yè cèǹkaà ká n póń? K'ó taá Kɔ́yɔ̀ɔ pesá bíkápu. ²³ É tɛ̀i, kà Kɔ́yɔ̀ɔ óò caka è yɔ̀: Heèka kàdɛ́ɛ́-dà péé a pɛutí mɛhɛká. A kó pɛdá niì-boocí cìdɛ́ɛ́-dà, kà kùcɔ̰́ ní n'kpenì-nà tɔɔkú. Kpɛ̰́ǹn kó ya̰dá é n'yòǹ Sàmɔ́ǹn núǹn-dà. ²⁴ O pɛdáma daadí tɛ̀i-má, kà pá n'hɔ̰́tà sìkàpa-dà ò de póń-ma nà mɔ́ma. ²⁵ Kà cecedó é yɛɛ̀ni è hṵɛ̰ḭ è yònà dɔní, kà kpìtìdi ò yòǹ pùdùdù è yònà tókesàdi kpìmu kpɛ́ɛdí. Kà p'óò pa̰a̰ yèdi è yɔ̀: Èsàyúù. ²⁶ O kú dàhàka, k'òo ya̰ǹn é yɛɛ̀ni. É n'yɛtì-ní è púsí-ní o kúpùèyo Èsàyúù tàcèǹcéǹni, kà p'óò yíí è yɔ̀: Sàkɔ́pù. Pa pɛdá benní, kà pa báàa Ìsáákì káá beeká púkɔɔ̀-dà.

ÈSÀYÚÙ YƐDÁÀ PƆ̀ƆMÁ Ò KƆ̰́NÌ-SA PA BÁÀ KṴ́MÚ, NÀ DIPÚ CAADÍ.

²⁷ K'yèe bííhí é kpɛ̰́ń hi dɛ́ɛ̀ka. Kà Èsàyúù é hḭn wanto mɔ́nń, é naaka-nà foǹni mɛhɛká. Kà Sàkɔ́pù mɛnn yòǹ niìyɔɔ̀ko, è naa-nà hɔ̰́ɔ̰̀ta kaàdipú. ²⁸ Ìsáákì de naa-nà Èsàyúù-dà é ha̰tá-nà Sàkɔ́pù, mìì tee-sá ò de kɔdì-ní yɛ̀ɛ̀di màǹci k'ò yon, kà Hèdèbèkáà mɛnn naa-nà Sàkɔ́pù.

²⁹ Daadí yènì, kà Sàkɔ́pù é m'bédí dipú, kà Èsàyúù é koní nà yɛ̀ɛ̀di k'yè ò wéè-ní dɛ́dɛ́í, ³⁰ k'ó tɛ̀ni è yɔ̀: Sàkɔ́pù! Yè yeé-ma-ní. Diìda weèdi é n hédá ká n dii ye diihṵɛ̰pù mɛmù-ní. Ye mɛmá-dà kà p'óò pa̰a̰-nà yèdi tɔɔ̀di è yɔ̀ Èdómù, mìì kpɛ̀i n'yɔ̀-sa niìhṵɛ̰yɔ̰. ³¹ Kà Sàkɔ́pù óò tɛ̰́ná è yɔ̀: Dɛnà é n yɛɛ-nà yeǹ-yenì, pɔ̀ɔmá a kɔ̰́nì-sa ti báà kṵ́mú, ká n nɛɛ́ a pa̰a̰ n dipú. ³² K'ò yɔ̀: Ǹtɛ, kòni-dà kpɛ̀i n kɔ̀ù mɛmà-ní, pɔ̀ɔmá n kɔ̰́nì-sa ti báàa kṵ́mú kó n pa̰á̰ ba? ³³ Ye wɔ̀ni, kà Sàkɔ́pù yɔ̀: Kà mɛmá-dà, k'á wɛ̰́ha̰ n yìhìka è yɔ̀ a yè nà n yɛɛ́-nà-á-dà. Kà Èsàyúù é wɛ̰́ha̰ è yɔ̀ òò yɛɛ́-nà-á-dà o pɔ̀ɔmá ò kɔ̰́nì-sa pa báàa kṵ́mú. ³⁴ Ye wɔ̀ni, kà Sàkɔ́pù óò pa̰a̰ pɛ̰́ɛ̰̀, nà tḭ̀ḭ̀ci ò de bénà-ci kà pà cì toò à̰ǹtíì, k'ó dii é yà̰à̰-nà, é yídá ka̰há̰. Mɛmá kú bookú-dà Èsàyúù pú didà-ma yècɛ̰́ɛ̰̀, o pɔ̀ɔmá de k'óò kɔ̰́ɔ̰́-sa pa báàa kṵ́mú.