Cetáma 24

Ìsáákì potóóma

¹ Yè de hɔ̰́tà Àbààhám̀ kpɛ̰́ń-ma dɛ́dɛ́í, kà Kɔ́yɔ̀ɔ Weèdi ò kónà bá mìì dɛ̀ɛ̀-sa wɛǹni hḭ́ǹka. ² Daadí yènì, k'ó yíí o núndehàpa kpɛ̰́ǹn, mɛ̀ǹǹ de nihí-ko o hɔ̰́ɔ̰̀ta kpɛ́ɛsá wɛǹni hḭ́ǹka, óò caka è yɔ̀: Baá n hakàma24:2 Ìsìdàyɛ́dì yam̀ma pesá mii de yòǹ wɛ̰́hàdi-dà. K'à baá nìdo hakàma mɛhɛká é hḭ́n a kó pa̰á̰-sa ká̰ńweǹni daadí, a baà yònà éè pa̰á̰-ma. Tṵ́má dentá Cetáma 47:29-31 mɛhɛká, ³ é wɛ̰́ha nà Kɔ́yɔ̀ɔ Weèdi yèdi, Weèdi mɛ̀nì tee-dí teǹka nà hḭ́ǹka, è yɔ̀ a pú kó pɛha Kànàáà tenkà ti péé-kà kú bíipoòta, é kɔ̰́ɔ̰́ n bíitá kà tá kádá poòo. ⁴ Wɛ̰́ha è yɔ̀ a kó taá háá nà n teǹka, é taá pɛha-ní poòo n bíitá Ìsáákì n hɔ̰́ɔ̰́tà-kpɛ́ɛpá mɛhɛká. ⁵ K'yèe dapàǹn óò tɛ̰́ná è yɔ̀: K'yè púdí ye poòo kó yeda-á-ma è yɔ̀ ò pú kó n tṵṵ̀na-ní tenkà mɛnkà kú mɛhɛká. Ye wɔ̀ni n kó nɛɛ́ tódá-dà a bíitá é tà tɛ̰́ná teǹka a yɛɛ̀ni-ká-ní kú mɛhɛká? ⁶ K'ò yɔ̀: Á̰à̰, a dá yetá tódá n bíitá é tà tɛ̰́ná ka bɛ́ka. ⁷ Kɔ́yɔ̀ɔ Weèdi, Weèdi mɛ̀nì tee-dí hḭ́ǹka, dà n dènà-ní n báàa hɔ̰́ɔ̰̀ta mɛhɛká, nà n yɔtí pà n pɛdà-ti kú mɛhɛká. Mɛní-dà de wɛ̰́háà, é n hḭ́ná nùdi, è yɔ̀ nì kó pa̰a̰ tenkà mɛnkà n yaàbíiká. Nì kó tɔn-ń-ma-ní ni tɔntɔndikó k'ó a nihí cɔ̀ku, k'yé teha k'á dɛ́tá-ní poòo n bíitá ka bɛ́ka. ⁸ K'yèe bíipoòta yedáà tà k'áa tṵṵ̀na-má-ní, fɔ̰́ń kó n'kɔ́ɔ́ màcɔ̰́mà nùdi a kó n hḭ́ná-di kú hḭ́ǹka. Àmá a dá teha é tɛ̰́ná n bíitá ka bɛ́ka. ⁹ Ye wɔ̀ni k'ó baá o nɔ̀ku dakpɛ̰́ǹn hakàma mɛhɛká, é wɛ̰́ha è yɔ̀ ò kó pa̰ná-ma ò hḭ́mpú wɛǹni. ¹⁰ K'ó tódá o dakpɛ̰́ǹn bɔnamáti24:10 Kàyeń bɛ́ka pà yúu ye nɔtì è tonà yòyóti-dà, páàti tɔɔ̀ti kà pà tì tonà sa̰máti mɛhɛká, bɔnamáti píta, nà niìya̰ suusá o dakpɛ̰́ǹn de káá-sa wɛǹni, é cɛ̰ɛ̰́ Nàhɔ́ɔ̀24:10 Àbààhám̀ ya̰ǹn yèdi-dà. Dentá é kaàn Cetáma 22:20 yɔtí cɔ̀ku bɛ́ka, Pàdáḿ-Àdám̀ teǹka mɛhɛká.

¹¹ K'ó tɛ̀i é dóńtá ye yɔtí cɛ̰́ma, é dɔdá bíńtadá tàcɔ̰́tà kú fɔ̰̀di, kà tà péé ye yɔtí bɛ́ɛ́kú, é tɛ̀i é hiùwa o bɔnamáti. Yè de yòǹ yohokú-dà, poòpa de hɔ̰́ yɛɛ̀ni tḭ́ń wɔ̀ni é tɛ̀ni é yúéí nɛ́ɛmá. ¹² K'ó cɔhà Weèdi è yɔ̀: Kɔ́yɔ̀ɔ Weèdi, fɔ̰́ń mɛ̀ǹǹ yòǹ-ko n dakpɛ̰́ǹn Àbààhám̀ Weèdi, mm'a cɔɔ̀hu è yɔ̀ á n tempa-nà yenì, ká n peèta-nà n pɛnti-sá. Bɛka a pa̰á̰suumá n dakpɛ̰́ǹn Àbààhám̀ hḭ́ǹka é n'yònà a de ò hḭ́mpú. ¹³ Ǹtɛ mmí kà n nɛɛ̀hi bíńtadá fɔ̰̀di, k'yèe yɔtí bíípohí kó yɛɛ̀ni é tɛ̀ni é yúéí nɛ́ɛmá. ¹⁴ Kà hì tɛ̀ni, n kó cɔhà hi tàcɔ̰́-dà è yɔ̀ tá n pa̰a̰ nɛ́ɛmá ká n yà̰à̰. K'yè yònà tà n tɛ̰́nà è hḭ́n: Yà̰à̰, ká n tṵ́má é taá yúéí-ní é niìa-nà a bɔnamáti, k'yèe bíipoòta é n'yòǹ a ta̰kadà-ta è yɔ̀ tá n'yòǹ a dapàǹn Ìsáákì poòo. Ye kú pa̰á̰mà-dà kó n'tee ká n dɛ́há a pa̰á̰suumá n dakpɛ̰́ǹn hḭ́ǹka.

¹⁵ Bá o nùdi de mum pú nɔ́dà, kà Hèdèbèkáà é yɛɛ̀ni ye yɔtí mɛhɛká, è toó o cɔ̀ta o bakayudí hḭ́ǹka, é tɛ̀ni ye pesá nɛ́ɛmá yúépu. O báàa-dà de dɛɛ̀ Bètúɛ́dì, Àbààhám̀ ya̰ǹn bíitá, Mììkáà de ò pɛɛ̀-nà-ta. ¹⁶ Ò há̰ de yòǹ sepàǹsudó mɔ́nń-dà. Ò de mum pú yá̰á̰ dɔù. K'ó tɛ̀ni é cútá bíńtadá mɛhɛká, é yúéí nɛ́ɛmá, é tón é yɛɛ̀ni. ¹⁷ Ye wɔ̀ni, k'yèe Àbààhám̀ dapàǹn é cocí-ho o pesá é taá ò pèta-nà, óò caka è yɔ̀: Diìda Weèdi é n pa̰a̰ a cɔ̀ta nɛ́ɛmá cɛ̰́ma ká n yà̰à̰. ¹⁸ K'óò tɛ̰́ná è yɔ̀: N báà! Ǹto k'á yà̰à̰. Ye wɔ̀ni, k'ó todá-ní fen-fem̀ma o cɔ̀ta o nɔ̀hi mɛhɛká, óò pa̰a̰ k'ó yà̰à̰. ¹⁹ Òò pɛ̰ḭ-má k'ó yà̰à̰ é yɔ̀a, k'ò yɔ̀: N kó tṵ́má é taá yúéí-ma-ní, é tɛ̀ni é niìa a bɔnamáti wɛǹni, háá kà tí dɛn. ²⁰ K'ó kódá-ho fen-fem̀ma o cɔ̀ta nɛ́ɛmá mɛ̀mà sɔ̰́ńtà-ma nɔtí caanììdi mɛhɛká, é tón é taá yúé-ní, é tɛ̀ni é kɔ̰́ɔ̰́ ye bɔnamáti wɛǹni kà tí nìì háá é yó dɛn. ²¹ K'yé dii ye nìdo k'ò nɛ̀hi òò wáń, ò p'óò hḭ́n màcɔ̰́mà, è màhu o yàma mɛhɛká è kó dɛ́há kà Kɔ́yɔ̀ɔ Weèdi dá ò m'bɛkú poòo ò pɛnti-kó. ²² Ò nìì-ma bɔnamáti é yɔ̀a, k'yèe nìdo é tódá wúdó mámú, kà mu yṵṵ̀humú yòǹ kàámùpa pàkɔ̀dì óò pa̰a̰, é tódá-nà wúdó nɛ́ɛhí hìdɛ́ɛ́, bá mɛ̀ǹtà dɛ̀ɛ̀ kà ta yṵṵ̀humú ha̰tà Kàámùpa kɔ̀ta, é fḭ́á̰ o nɔ̀hi. ²³ Ye wɔ̀ni óò béka è yɔ̀: Woò kú bíipoòta-dà a héé? N caka m'a síɔ́kú-ma: Bòdi péé-dà a báàa hɔ̰́ɔ̰̀ta kà ti kó bátá yèǹkà mɛnkà? ²⁴ K'óò tɛ̰́ná è yɔ̀: N yòǹ Bètúɛ́dì bíipoòta-dà, Mììkáà pɛdà-ko nà Nàhɔ́ɔ̀. ²⁵ K'ó tuɛ̀ha è yɔ̀: Ti káá-ma míti nà nɔtí dipú sàma hɔ̰́ɔ̰̀ta. Bòdi mɛ̀ɛ péé-dà kà nɛ kó nɛɛ́ bátá. ²⁶ K'yèe nìdo é hìu o dúùka é dɔɔ́ háá nà teǹka, é sɛda Kɔ́yɔ̀ɔ Weèdi, ²⁷ è yɔ̀: M'a sɛdí Kɔ́yɔ̀ɔ Weèdi, fɔ̰́ń mɛ̀ǹǹ yòǹ-ko n dakpɛ̰́ǹn Àbààhám̀ Weèdi, òò bɛkú daàka wɛǹni a pa̰á̰suumá n'àa coóma. A túdí n tààka ye cà̰ǹkù mɛnkù kú mɛhɛká, háá nà n dakpɛ̰́ǹn hɔ̰́ɔ̰́tà-kpɛ́ɛpá hɔ̰́ɔ̰̀ta mɛhɛká-dà.

²⁸ K'yèe bíipoòta é cocí é kòǹ ta màa hɔ̰́ɔ̰̀ta, é tɛ̀i é pà caka mìì pa̰à̰-sa-ní. ²⁹ Hèdèbèkáà há̰ de káá datɔ̰ɔ̰̀ɔ̰ òcɔ̰́ǹ-dà kà p'òò tonà Dàbánì. Ò yèkaà-ma mɛma, é cemá yɛɛ̀ni, é cocí é taá o peètanàpu ye bíńtadá pesá. ³⁰ Ò de dɛ́hà-á-ma mámú nà nɛ́ɛhí o potɔ̰ɔ̰̀ɔ̰ de fḭ́ḭ́-hi o nɔ̀hi, é tṵ́má yekà-nà o potɔ̰ɔ̰̀ɔ de hḭ́n ye nìdo ò hḭ́mpú-ní. K'ó tɛ̀ni ye nìdo pesá, é tɛ̀ni óò hɔ̰́tá ye bíńtadá fɔ̰̀di k'ò nɛ̀hi n'ɔ̀ɔ bɔnamáti. ³¹ K'óò caka è yɔ̀: Yídá kà tí kòǹ hɔ̰́ɔ̰̀ta. A yòǹ nìdo-dà Weèdi kónà-ko. Badà tee k'à nɛ̀hi tapaàdi? N dɔɔ̀haà-á-ma-ní nàmɔ̀ni hɔ̰́ɔ̰̀ta, nà bɛ̀m̀bɛ̀ni a bɔnamáti kó dɔɔ́-di. ³² K'yèe nìdo óò tṵ̀na kà pá kòǹ o hɔ̰́ɔ̰̀ta, é tɛ̀i kà pá todá ye bɔnamáti totoòka, é pɛha míti nà nɔtí dipú é tì kɔ̰́ɔ̰́. Kà pá yídá é ya̰ntá-ní nɛ́ɛmá, mɛnń nà mɛ̀m̀pà de ò nɔɔ̀-pa kà pá pɔkàda pa tààka. ³³ Mii kú dàhàka, kà pá tóó-ní dipú é tɛ̀ni óò kɔ̰́ɔ̰́ è yɔ̀ ó dii, k'ó yeda è yɔ̀: Kà n pú nɛ cakáà mìì n toó-sa-ní, n mum pú kó nɛɛ́ é dii. Ye wɔ̀ni, kà Dàbánì óò tɛ̰́ná è yɔ̀: Toò, kà mɛmá-dà k'á wɛɛ́-ní. ³⁴ K'ò yɔ̀: N yòǹ Àbààhám̀ dapàǹn-dà. ³⁵ Kɔ́yɔ̀ɔ Weèdi kónà n dakpɛ̰́ǹn sàma-dà, k'ó hḭn nɔɔ̀ti yaǹn. N'ɔ̀ɔ̀ pɛ̰ḭ-ḭ́-ma sàma hɔ̰̀ci, nà bɔɔhí, nà nɛ̀ci, nà bɔnamáti, nà sa̰mmùǹhi, nà díící, nà wúdó, nà núndehàpa daapá nà poòpa. ³⁶ O poòo Sàdá, o kpɛ̰́ǹti yèǹka, ò pɛɛ̀-nà bíidatá tàcɔ̰́-dà. Mɛntá-dà mɛ̀ɛ dɛɛ̀ ò kɔ̰́ɔ̰̀-ma o kááma wɛǹni. ³⁷ Ò há̰ de yɔ̀ n hḭ́ná nùdi-dà nà wɛ̰́hàdi o yìhìka, è yɔ̀ n pú kó wáńtá tódá Kànàáà yam̀ma bíipoòta ò péé-pà kú tenkà-ní é kɔ̰́ɔ̰́ o bíitá kà tá kádá. Ká n teha é mà hḭn. ³⁸ Ò de yɔ̀: N taá o báàa hɔ̰́ɔ̰̀ta mɛhɛká é tɛ̀i é pɛha-ní poòo o bíitá o kpɛ́ɛpá cɔhɔ̀ka. ³⁹ Ye wɔ̀ni ká ò béka è yɔ̀: K'yè há̰ yònà ye poòo yedáà è pú n tṵnà-ní tá? ⁴⁰ K'ó n tɛ̰́ná è yɔ̀: Kɔ́yɔ̀ɔ Weèdi ò tṵ̀nà-di kú wɛmá o fòùmu wɛǹni mɛhɛká, kó tɔn-ń-ma-ní ni tɔntɔndikó, k'ó n nihí cɔ̀ku ye cà̰ǹkù mɛnkù kú mɛhɛká, k'yé teha ká n taá o báàa hɔ̰́ɔ̰̀ta, é tɛ̀i é dɛ́há-ní poòo o hɔ̰́ɔ̰́tà-kpɛ́ɛpá cɔhɔ̀ka é tɛ̀ni é kɔ̰́ɔ̰́ o bíitá. ⁴¹ Ò yɔ̀ kà n teháà è hḭn mɛma, è tɛ̀i kà pà yedáà bíipoòta aa n tṵṵ̀na-má-ní, ye wɔ̀ni mmí kó n'kɔ́ɔ́ màcɔ̰́mà n wɛ̰́hàdi hḭ́ǹka, o nɔdàdi nìcɔ̰́nì mɛ̀ɛ pú kó n dɛ́há. ⁴² N mɛ̀ɛ tɛ̀ni-má-ní yenì bíńtadá fɔ̰̀di, é tɛ̀i é pa̰á̰ Weèdi dɔɔ̀pu-dà, è yɔ̀: Kɔ́yɔ̀ɔ Weèdi, fɔ̰́ń mɛ̀ǹǹ yòǹ-ko n dakpɛ̰́ǹn Àbààhám̀ Weèdi, n nihí cɔ̀ku ye cà̰ǹkù mɛnkù kú mɛhɛká. ⁴³ Ǹtɛ kà n péé sá̰mà bíńtadà mɛntà kú fɔ̰̀di. Bíipoòta mɛ̀ǹtà kó tɛ̀ni-tá-ní nɛ́ɛmá yúépu, ká n tà cɔ̀hà è yɔ̀ tá n pa̰a̰ ta cɔ̀ta nɛ́ɛmá ká n nìì, ⁴⁴ kà tá n tɛ̰́ná è yɔ̀: Ǹto k'á nìì ká n tṵ́má taá é yúé-ní é niìa a bɔnamáti, mɛma n kó n'yá̰á̰-ma è yɔ̀ mɛntá-dà Kɔ́yɔ̀ɔ Weèdi ta̰kadà-ma, kà tà kó n'yòǹ n dakpɛ̰́ǹn bíitá poòo. ⁴⁵ Bá n nùdi mum pú nɔ́dà, kà Hèdèbèkáà tɔ̀ɔ̀-ní è toó-ní o cɔ̀ta o bakayudí hḭ́ǹka. K'ó tɛ̀ni é cútá ye bíńtadá mɛhɛká é taá ya̰ntá-ní nɛ́ɛmá, ká n ò cɔ̀hà è yɔ̀: Diìda Weèdi é n pa̰a̰ nɛ́ɛmá ká n nìì. ⁴⁶ K'ó todá-ní o cɔ̀ta fen-fem̀ma o bakayudí hḭ́ǹka, é n caka è yɔ̀: Yà̰à̰, k'à yɔ̀ɔ ká n niìa a bɔnamáti. Ká n nìì, k'ó yúéí é niìa-nà bɔnamáti. ⁴⁷ Ká n ò béka è yɔ̀: A yòǹ wodà kú bíída-dà? K'ó n caka è yɔ̀ ò yòǹ Bètúɛ́dì bíitá-dà. O báàkpɛ̰́ǹn yèdi-dà Nàhɔ́ɔ̀, k'òo màa kpɛ̰́ǹn héé Mììkáà. Ye wɔ̀ni ká n tódá mámú é tɔ̰hiná o wɔ̰ǹni, é tódá nɛ́ɛhí é fḭ́á̰ o nɔ̀hi. ⁴⁸ Ká n yídá é hìu dúùka é dɔɔ́ háá nà teǹka, é dɔa Kɔ́yɔ̀ɔ Weèdi mɛ̀nì yòǹ-di n dakpɛ̰́ǹn Àbààhám̀ Weèdi. N nì sɛdáà nà nì n nihí-ma kpɛ́mú-dà cɔ̀ku, ká n cèn é ta̰ntá-ní nà naakú é tɛ̀ni è kó tódá n dakpɛ̰́ǹn ya̰ǹn yaàbíidí é táá kɔ̰́ɔ̰́ o bíitá kà tá kádá poòo. ⁴⁹ Sá̰mà-ní, n caka-nà kà nɛ teháà-á-dà ò hḭ́mpú-ní, è kó bɛka nɛ nììma nà nɛ coóma o hḭ́ǹka. Kà nɛ mɛ̀ɛ yedáà-á-dà, kà nɛ́ n caka kà n ní n'yá̰á̰, kà n kó yɛ̀ɛ̀-ka bɛ́ka ká n yɛ̀ɛ̀.

⁵⁰ Kà Dàbánì nà Bètúɛ́dì óò tɛ̰́ná è yɔ̀: Miì kú wɛnnì yɛ̀ni nà Kɔ́yɔ̀ɔ Weèdi pesá-dà. Ti pú káá màcɔ̰́mà kà mà yòǹ sḭ̀ḭ̀mà yoo suuma è kó wɛdá ye hḭ́ǹka. ⁵¹ Hèdèbèkáà-dà miì, a yìhìkà. Ò tódá k'ó táá hḭn a dakpɛ̰́ǹn bíitá poòo é n'yònà Kɔ́yɔ̀ɔ Weèdi mà hḭ́mpú.

⁵² Àbààhám̀ dapàǹn yeèkaà-ma kà pà yɔ̀ mɛma, k'ó hìu dúùka háá nà teǹka é sɛda Kɔ́yɔ̀ɔ Weèdi. ⁵³ K'ó yídá é baá o pɛ̀kadí mɛhɛká, é deèna-ní sepàǹku nɛǹti24:53 Yè de yòǹ nɛ́ɛhí-dà, nà too-mána, nà dákáti, nà mána, nɔ̀hi kpɛ́ɛná nà wɔ̰ɔ̰̀ka kpɛ́ɛná, nà tɔɔ̀sa tɔɔ̀sa, wúdó kpɛ́ɛtí nà díimáàka kpɛ́ɛtí, nà nɛmbááti é pa̰a̰ Hèdèbèkáà. K'ó tṵ́má deèna-ní pa̰ká sàma, díikpeecí kpɛ́ɛká é pa̰a̰ Hèdèbèkáà datɔ̰ɔ̰̀ɔ̰ n'ɔ̀ɔ màa. ⁵⁴ Mii kú dàhàka-dà, ye nìdo nà mɛ̀m̀pà d'oò bɛ́hìnà-pa-ní há̰ nɛdà é dii-má, é yà̰à̰, é yɔ̀ɔ é weń-nà. K'yé ya̰dá weka ká̰ńyɛ̰̀ǹfa, kà pá yɛɛ̀ni, k'ó pà caka è yɔ̀: Nɛ́ hédá ká n tón é kòǹ n dakpɛ̰́ǹn hɔ̰́ɔ̰̀ta. ⁵⁵ Kà Hèdèbèkáà datɔ̰ɔ̰̀ɔ̰ n'ɔ̀ɔ màa é tɛ̰́ná ye nìdo è yɔ̀: Héé kà bíipoòta é tṵ́má ti pa̰á̰-nà daàka cɛ̰́masí, daàka píta kpɛ́mà-ní, ye wɔ̀ni é nɛɛ́ a tṵùna. ⁵⁶ K'ò yɔ̀: Nɛ dá n yókàna, Kɔ́yɔ̀ɔ Weèdi n yɔ̀ɔ nihípu-dà cà̰ǹkù mɛnkù é dɔ̀hà niìi wɛǹni. N héé-nà ká n tón é kòǹ n dakpɛ̰́ǹn hɔ̰́ɔ̰̀ta. ⁵⁷ Kà pà yɔ̀: Yàà tí yíí-ní bíipoòta é tà béka é yekà ta kpɛ́ɛmá.

⁵⁸ Kà pá yíí-ní Hèdèbèkáà, óò béka è yɔ̀: A teháà-á-dà è kó tṵṵ̀na nìì mɛnǹ? K'ò yɔ̀: À̰à̰, n teháà-á-ma. ⁵⁹ Ye wɔ̀ni kà p'óò cɔa, óò hédá, k'ó tṵṵ̀na ye Àbààhám̀ dapàǹn nà mɛ̀m̀pà de ò bɛ́hànà-pa-ní, kà pá ka̰há. Kà poòo mɛ̀ǹǹ de ò yɔ̀daà-ko o bíkáḿbíikú, é pà nɛ̀ǹta. ⁶⁰ K'ò há̰ de nɛɛ́ ka̰há, pà de ò kónà-á-ma è yɔ̀:

Fɔ̰́ń ti potɔ̰ṵ̀ Hèdèbèkáà,

Weèdi é hédá k'á hḭn nìku dɔ́ɔ́di dɔ́ɔ́di màa.

A yaàbíiká é ya̰dá n'nɔn ka kà̰à̰tɔɔ̀pa wɛǹni.

⁶¹ Ye kú dàhàka, kà Hèdèbèkáà é tódá o yoǹyṵpá kà pá dìsi bɔnamáti hḭ́ǹka, é tṵṵ̀na ye nìdo kà pá ka̰há. ⁶² Yè há̰ de hɔ̰́tà Ìsáákì koò pú péé-ní bíńtadá pà toò-ta Dàháí-Hòdóì pesá. Ò de yè yídà-á-ma-ní, é tɛ̀ni é kaàdi *Nɛ̀kɛ́bù càwenkú mɛhɛká. ⁶³ Daadí nìcɔ̰́nì yohokú, k'ó yɛɛ̀ni é taá cèmu yɛ̀ɛ̀di mɛhɛká, é tɛ̀i é n'centì, é yɔ̀ɔ é yoòda o nɔ̀ǹci é wáńtá é dɛ́há-ní bɔnamáti kà tì fɔ̀di-ní. ⁶⁴ Kà Hèdèbèkáà mɛ̀ɛ té yoòda o nɔ̀ǹci óò dɛ́há-ní, ye wɔ̀ni é cɛɛ̀da-ní bɔnamáku hḭ́ǹka, ⁶⁵ é béka Àbààhám̀ dapàǹn è yɔ̀: Wodà mɛnǹ, k'ò cèǹtì-ní yɛ̀ɛ̀di mɛhɛká è pení ti peètanàpu? K'óò tɛ̰́ná è yɔ̀: N dakpɛ̰́ǹn-dà. Ye wɔ̀ni nà ye wɔ̀ni, k'ó cemá tódá o pɛ́ndánáku é dáná o yìhìka24:65 Ìsìdàyɛ́dì bíipohí de hɔ̰́ dáná-ma hi yìhìka nà pɛ́ńkú, k'ò kó peèta-nà cà̰ma yoo o dacɛ̰ǹni mɛ̀nì k'óò kádá-di. ⁶⁶ Kà pá tɛ̀i é peèta, k'yèe Àbààhám̀ dapàǹn é caka Ìsáákì, ò pa̰à̰-sa wɛǹni o cà̰ǹku mɛhɛká. ⁶⁷ Ye kú dàhàka, kà Ìsáákì é kònà Hèdèbèkáà, é tɛ̀i óò dúùwa o màa Sàdá fḭ́ḭkú mɛhɛká, k'ó hḭn o poòo. K'óò dɔ́ka sàma mɔ́ma, n'ɔ̀ɔ kú kpɛ́mú, k'òo yaǹcɔ̰hàma é yɔ̀ɔ o màà kṵ́mú hḭ́ǹka.