Cetáma 29

Sàkɔ́pù peètamá nà Hàdàsɛ́dì

¹ Ye kú dàhàka, kà Sàkɔ́pù é sɔ̰kadá o cɔ̀ku, é cɔ́á heèka mɛ̀ǹkà de péé-ka hḭ́ńkà-bɛ́ka, kú bɛ́kàma. ² K'ó n'yòǹ mɛma, é táá dɛ́há bíńtadá yɛ̀ɛ̀di mɛhɛká, kà hɔ̰̀ci nà bɔɔhí yè tísí è muhipú è yòǹ hòǹhòka kàta̰di. Nììpa de kɔ́dì-ní ye kú bíńtadà-dà è nìnì pa nɔtí. Há̰kà, tá̰à̰di mɛ̀nì de cḭ̀n-dí ye bíńtadá de wɛhi-í-ma sàma mɔ́ma. ³ Pà de hɔ̰́ pehèna pa nɔtí wɛǹni-dà è té nɛɛ́ nì bídí bɛ́ɛ́kú, é tì nìa, é yɔ̀a tṵ́má nì bídí é nì tɛ̰́ná ni kàdèdi. ⁴ K'ó tɛ̀ni é béka ye hɔ̰ɔ̰̀-cɛ̰má è yɔ̀: N dópàpa-nà, nɛ péé-nà-ní yadà mɛmà? Kà pà yɔ̀: Nà Hàdánì. ⁵ K'ò yɔ̀: Nɛ yá̰á̰-dà pà toò-ko Dàbánì, k'ò yòǹ Nàhɔ́ɔ̀ bíitá-a? Kà pà yɔ̀: À̰à̰, t'oò yá̰á̰-ma. ⁶ K'ò yɔ̀: Ò kpenì-ní? Kà pà yɔ̀: Ò kpenì-ń-ma. Ǹtɛ múńdìkaà, o bíipoòta Hàdàsɛ́dì kà tà pení n'ɔ̀ɔ nɔtí. ⁷ Ye wɔ̀ni kà Sàkɔ́pù yɔ̀: Wèǹku mɛ̀ɛ káà kaá sàma, yè mum pú tɛ̀i nɔtí pehènamá wɔ̀ni. Niìa-nà nɛ nɔtí é tón hɔ̰ɔ̰̀-cɛ̰nkú-ì! ⁸ Kà pà yɔ̀: Ti pú kó nɛɛ́ mà hḭn kà nɔtí wɛǹni pú petà. Ti hɔ̰́ pehèna nɔtí-dà éè m'péé ti wɛǹni, ye wɔ̀ni è mɛ̀ɛ té nɛɛ́ bídí ye tá̰hà̰kù-ní é tì nìa.

⁹ Ò káà pà wɛì-nà-sa-dà, kà Hàdàsɛ́dì é ta̰ntá-ní n'ɔ̀ɔ báàa nɔtí. Ò mɛ̀ɛ té de yòǹ hɔ̰ɔ̰̀-cɛ̰nto-dà. ¹⁰ Sàkɔ́pù dɛ́hà-ma o màà datɔ̰ɔ̰̀ɔ̰ bíitá Hàdàsɛ́dì nà ta báà nɔtí, k'ó cemá pàdi ye wɔ̀ni ye bíńtadá, é táá bídí ye tá̰hà̰ku mɛ̀ǹkù de tà cḭ̀n-kú, é niìa o màà datɔ̰ɔ̰ɔ̰̀ nɔtí. ¹¹ Ye kú dàhàka, k'ó táá ò dɔa dɛ́dɛ́í, é ká̰ń-ká̰ńtá-ní nuǹ-nɛ́ɛmá, yaǹnaakú kú nuǹ-nɛ́ɛmá. ¹² Ye wɔ̀ni, k'óò caka è yɔ̀ n'ɔ̀ɔ báàa pà yɛń-ma, ò yòǹ Hèdèbèkáà bíitá-dà. Kà Hàdàsɛ́dì é cemá cocí kòǹ, é táá mà caka o báàa. ¹³ Dàbánì yèkaà-ma o potɔ̰ɔ̰̀ bíitá Sàkɔ́pù tɛ̀mmá wɛɛkú, k'ó cocí-ní é tɛ̀ni o peètanàpu, é tɛ̀ni óò codá sukú óò konà hɔ̰́ɔ̰̀ta. Kà pá ta̰ntá-ní hɔ̰́ɔ̰̀ta, kà Sàkɔ́pù óò caka mìì ò pa̰à̰-sa-ní wɛǹni. ¹⁴ Ye wɔ̀ni, kà Dàbánì óò caka è yɔ̀: Mɔ́masí-dà ò yòǹ-ma o hɔ̰́ɔ̰́tà kóoó, è yòǹ hḭ̀ma màcɔ̰́ nà mɔnń. Kà Sàkɔ́pù é kaàdi Dàbánì hɔ̰́ɔ̰̀ta, é pa̰á̰ weèdi nìcɔ̰́.

Sàkɔ́pù tà̰ǹtà-ma kú bookú poòpa pàdɛ́ɛ́, nìi n'ɔ̀ɔ ya̰ǹn

¹⁵ Daadí yènì, kà Dàbánì é caka Sàkɔ́pù è yɔ̀: Yè pú sudi á nà n dehú hécí kà n p'áa bopù, è yɔ̀ a yòǹ-ma kpɛ́mú n yɛǹn. N caka n kó nà m'bopù-sa wɛǹni kú nùdi. ¹⁶ Há̰kà, Dàbánì de káá bíípoohí hìdɛ́ɛ́-dà o hɔ̰́ɔ̰̀ta mɛhɛká. O bííkɔ̀ɔ yèdi-dà de dɛɛ̀ Dèyáà, k'òo Pɔ̰́nɔ kpɛ́ɛdí tonà Hàdàsɛ́dì. ¹⁷ Dèyáà yìhìka de pú suu sukú, kà Hàdàsɛ́dì mɛnn kpɛ́ɛká suu dɛ́dɛ́í. ¹⁸ Sàkɔ́pù há̰ de kpɛ̀i Hàdàsɛ́dì-dà. Ye wɔ̀ni k'ó caka Dàbánì è yɔ̀: N k'áa deha beeká kàyehì, é kádá a Pɔ̰́nɔ Hàdàsɛ́dì. ¹⁹ Kà Dàbánì yɔ̀: Toò, n teháà-á-ma. Kà n ò kɔ̰́ɔ̰̀ fɔ̰́ń, ye kpɛ́ɛmá tɔ̰ṵ-nà m'aa ò kɔ̰́ɔ̰́-ma tɔɔ̀o òcɔ̰́ǹ. Kaàdi miì, n pesà. ²⁰ Kà Sàkɔ́pù é kaàdi ye pesá é deha Dàbánì beeká kàyehì, Hàdàsɛ́dì kpɛ́mú. K'yèe beeká é ka̰há̰ fem̀ma o yìhìka è yònà daàka kàcɔ̰́kà, mìì tee-sá ò de ò dɔ́sí-ma sàma dɛ́dɛ́í.

²¹ Ye beé-kàyehì ka̰hà-ma, k'ó caka Dàbánì è yɔ̀: N dɔ̀ɔcí beeká yɔ̀ɔ yɔ̀ɔpú, n kɔ̰́ɔ̰́-ní n poòo sá̰mà-ní n kpɛ̀i óò tódá-ma. ²² Kà Dàbánì é tíká ye pesá nìku wɛǹni, potà̰ǹtà̰mu dikàdiikú. ²³ Yohokú yodà-ma, k'yé n'yònà ó tódá o Pɔ̰́nɔ Hàdàsɛ́dì é táá ò kɔ̰́ɔ̰́, ò pú hḭn mɛma. K'ó tódá o bííkɔ̀ɔ Dèyáà é tanà Sàkɔ́pù pesá, é tɛ̀i kà Sàkɔ́pù óò weń-nà ò p'óò bantà. ²⁴ Ye wɔ̀ni, k'ó tódá bíipoòta tàcɔ̰́tà kà pà tà tonà Sììpáà, kà tà de ò dehú tɔná o hɔ̰́ɔ̰̀ta mɛhɛká, é kɔ̰́ɔ̰́ Dèyáà kà tà yòǹ o yoǹyṵṵ́. ²⁵ K'yé weka ká̰ńyɛ̰̀ǹfa, kà Sàkɔ́pù é n'hɔ̰́tà Dèyáà-dà wontà dɛ̀ɛ̀. K'ó caka Dàbánì è yɔ̀: M̀mɔ́ńya̰-dà a wontà n pa̰à̰-ma ye pesà-ní? Ye pú yòǹ Hàdàsɛ́dì kpɛ́mú-dà m'aa deháà-ma? Ye cèǹkaà k'á n báńta mɛma? ²⁶ Kà Dàbánì óò tɛ̰́ná è yɔ̀: Pà pú hɔ̰n mɛma ti kú hɔ̰́ɔ̰́hì-ní, é kpɛ̰ná sàmɔ́ǹn daa-hɔ̰́ɔ̰̀ta kà kpɛ̰́ǹn kadí. ²⁷ Yɔ̀a daàa kàyehì Dèyáà potà̰ǹtà̰mu dikàdiikú kó n'káá-ka, ye wɔ̀ni kà tí tṵ́má a kɔ̰́ɔ̰́ sàmɔ́ǹn, k'à cédí é tṵ́má n deha beé-kàyehì tɔɔ̀ka. ²⁸ Kà Sàkɔ́pù é teha, é yɔ̀a ye daàka kàyehì Dèyáà potà̰ǹtà̰mu dikàdiikú kpɛ́ɛká, ye wɔ̀ni k'ó tṵ́má óò kɔ̰́ɔ̰́ Hàdàsɛ́dì k'óò kádá. ²⁹ K'ó hɛɛ̀da bíipoòta tɔɔ̀ta kà pà tà tonà Bìdáà, kà tà mɛ̀ɛ té de ò dehú tɔná o hɔ̰́ɔ̰̀ta mɛhɛká, é kɔ̰́ɔ̰́ Hàdàsɛ́dì kà tà yòǹ o yoǹyṵṵ́. ³⁰ Kà Sàkɔ́pù é weń-nà Hàdàsɛ́dì, óò dɔ́ka é ha̰tá-nà Dèyáà. Ye kú dàhàka, k'ó tṵ́má sɔ̰kadá é deha Dàbánì é n'káá beeká tɔɔ̀ka kàyehì.

Ǹtɛ bííhí Sàkɔ́pù pɛdà-hi.

³¹ Kà Kɔ́yɔ̀ɔ é cɔ́dí é n'hɔ̰́tà Sàkɔ́pù de pú dɔ́sí Dèyáà sukú è yònà Hàdàsɛ́dì. Ye wɔ̀ni, k'óò kpáhìna popɛɛ̀ko, kà Hàdàsɛ́dì mɛnn é hḭn poyɛ̰tadá. ³² Kà Dèyáà é póń é pɛdá bíídatá, é tà pa̰a̰ yèdi è yɔ̀ Hùdùbɛ́nì, mìì cakú-sa è tonà: Wáńtá-nà bíídatá. Ye wɔ̀ni, k'ó caka é tétá nì de kpɛ̀i é n'yɔ̀pu, k'ò yɔ̀: Kɔ́yɔ̀ɔ dɛ́hà yɔ́hɔkú n yon-kú-dà é n pa̰a̰-ní ye bíítà-ní. Sá̰mà-ní, n dɔɔ̀o kó n dɔ́ka-á-ma. ³³ K'ó tṵ́má póń, é pɛdá o Sàbí è yɔ̀: Kɔ́yɔ̀ɔ yeèkaà n kɔń-ma-dà dawòni è yɔ̀ pà pú n kpɛ̀i é n pa̰a̰-ní bíídatà tɔɔtà mɛntà. Ye kú kpɛ́mú, k'ó tà pa̰a̰ yèdi è yɔ̀: Sìmɛ̀ɔ́ɔ̀ mìì kpɛ̀i é caka-sá è yɔ̀ "Ò yèkaà". ³⁴ K'ó tṵ́má póń ta̰á̰ma, é pɛdá o Bíɔ́, è yɔ̀: Sá̰mà há̰kè-è, n dɔɔ̀o kó n daàdi-nà-á-ma mìì tee-sá n ò pɛdà bíídahí hìta̰a̰. Kà Sàkɔ́pù é tà pa̰a̰ yèdi è yɔ̀: Dèfí, mìì kpɛ̀i n'yɔ̀-sa "é daàdi-nà". ³⁵ K'ó tṵ́má póń, é pɛdá o Bɔ́nɔ́, è yɔ̀: Sá̰mà-ní-ì, n kó fa̰nta Kɔ́yɔ̀ɔ-dà. Ye mɛmá-dà, k'ó pa̰a̰ ye bíitá yèdi è yɔ̀: Sùdáà, mìì kpɛ̀i n'yɔ̀-sa "fa̰ntàma". Ye wɔ̀ni k'ó nɛɛ̀hi ò koò pú pɛdà.