Cetáma 28

¹ K'òo dɔɔ̀o Ìsáákì é yíí Sàkɔ́pù, óò kóná, óò teń è yɔ̀: Ò dá yetá tódá Kànàáà teǹka mɛhɛká, bíipoòta kà tá n'yòǹ o poòo. ² Ó yídá é taá Pàdáḿ-Àdám̀ o màà báàa Bètúɛ́dì hɔ̰́ɔ̰̀ta, é táá tóó-ní poòo o yṵṵ̀-datɔ̰ɔ̰̀ Dàbánì bíípoohí mɛhɛká. ³ È yɔ̀: Weèdi nɔɔ̀ti wɛǹni kpɛ́ɛdí óò kóná, óò pa̰a̰ bííhí sàma, k'yé teha k'ó ya̰dá hḭn niì-boocí dɔ́ɔ́di yàdo. ⁴ N'ɔ́ɔ̀ pa̰a̰ é pa̰a̰ n'ɔ̀ɔ yaàbíiká kónáma nì de pɛ̰ḭ-má Àbààhám̀, k'yé teha k'ó teeka heedì ò péé-dì kú mɛhɛkà è yòǹ cà̰ǹn, heedí Weèdi de pɛ̰ḭ-dí Àbààhám̀. ⁵ Ye kú dàhàka, kà Ìsáákì é hédá kà Sàkɔ́pù é ka̰há̰ Pàdáḿ-Àdám̀ teǹka, Dàbánì hɔ̰́ɔ̰̀ta. Èsàyúù nà Sàkɔ́pù màa Hèdèbèkáà datɔ̰ɔ̰̀ɔ̰-dà de ò héé. O báàa yèdi-dà de dɛɛ̀ Bètúɛ́dì, k'ò yòǹ àdàmɛ̀yɛ̰́ɛ̰̀ bookú. ⁶ Kà Èsàyúù é yó yekà è yɔ̀ Ìsáákì de tṵ́mà kónà Sàkɔ́pù é y'óò teń è yɔ̀ ó taá Pàdáḿ-Àdám̀, é táá tóó-ní poòo ka bɛ́ka. K'ò de tṵ́má yekà è yɔ̀ ò de kó n'kó ò kónà-ma, óò páńtá-ma è yɔ̀ ò dá yetá tódá Kànàáà teǹka mɛhɛká bíipoòta kà tá n'yòǹ o poòo. ⁷ Kà Sàkɔ́pù mɛ̀ɛ de teha o báàa n'ɔ̀ɔ màa nùdi, é ka̰há̰ Pàdáḿ-Àdám̀. ⁸ Ye wɔ̀ni, kà Èsàyúù é bantá ye pesà è yɔ̀ o báàa Ìsáákì de pu sɛdáà Kànàáà bíípoohí fòùmu. ⁹ K'ó yídá é taá ye wɔ̀ni, Àbààhám̀ bíitá Ìsìmàyɛ́dì pesá poòo ta̰ǹtapú. É tɛ̀i tódá o bíipoòta Mahàdátì, Nɛbàyɔ́tì potɔ̰ɔ̰̀ɔ̰, é tɛ̀ni dàci ò de káá-pa-ho hḭ́ǹka.

Sàkɔ́pù dɔhɔ̀ti

¹⁰ Kà Sàkɔ́pù é yídá Bɛ̀ɛ́sèbáà, é ka̰há̰ Hàdánì. ¹¹ É tɛ̀i bɛ̀m̀bɛ̀ni nìcɔ̰́nì kà wèǹku óò dɔdi, k'ó weń ye pesá. K'ó n'kó dɔɔ́, é pɛha tá̰a̰sàdi é cekedá o yuudí, é dɔɔ́ ye pesá. ¹² K'ó dɔha dɔhɔ̀ti. Ti mɛhɛká, k'ó dɛ́há kà yɛ̀hɛkú bodí teǹka kà ku yuudí pḭ́ńtí-ní hḭ́ǹka, kà Weèdi tɔntɔndipá dikù è cúúkú-ní ku hḭ́ǹka. ¹³ Kà Kɔ́yɔ̀ɔ nɛɛ̀hi ku hḭ́ǹka. K'ó caka Sàkɔ́pù, è yɔ̀: Mmí-dà héé Kɔ́yɔ̀ɔ, a báàa kpɛ̰́ǹn Àbààhám̀ Weèdi, n'àa báàa Ìsáákì Weèdi. Tenkà a dɔɔ́-kà kú hḭ́ńkà, n kó ya̰dá kà n'à pa̰a̰-á̰-ma, é kà pa̰a̰ n'àa yaàbíiká. ¹⁴ A yaàbíiká kó ya̰dá n'wɔ̰ǹti, è yònà teǹka tá̰pùdùmu tá̰dící-dà. A kó ya̰dá fudí a teǹka fɔ̰̀-bɛ́kàma-dà nà hḭ́ńkà-bɛ́kàma, é kà fudí pɛ̰̀pɛ̰̀-yúńyúǹni bɛ́ka nà pɛ̰̀pɛ̰̀-cúɛ́cúɛ̀di. N kó ya̰dá yɛ̀dì fɔ̰́ń n'àa yaàbíiká kú pesá-dà é kóná teǹka heèka wɛǹni. ¹⁵ N kó n'à m'péé-nà-á-ma, é n'à m'púsí a kó taá-sa wɛǹni, é yó a tɛ̰́ná-ní ye yɔɔtì mɛntì kú mɛhɛká. N kó pa̰á̰-ma niìi wɛǹni m'a cakáà-sa. N pú k'áa wɛ́í daadí yènì.

¹⁶ Ye wɔ̀ni, kà Sàkɔ́pù é heǹta-ní è yɔ̀: Mɔ́masí-ì, Kɔ́yɔ̀ɔ-dà péé bɛ̀m̀bɛ̀nì mɛnì-ní kà mmí há̰ de pú mà yá̰á̰-ɛ̰́ɛ̰̀. ¹⁷ Ye wɔ̀ni, kà wantafɔ̰̀di óò cɛ̰dí, k'ò yɔ̀: Bɛ̀m̀bɛ̀nì mɛnì mɛ̀ɛ sḭ̀ǹ fá! Yècɛ̰́ɛ̰̀ koò pú dɛɛ-má k'yè pú yòǹ Weèdi hɔ̰́ɔ̰̀ta! Hḭ́ǹka sàka há̰ńnùdi-dà miì. ¹⁸ K'yé weka ká̰ńyɛ̰̀ǹfa pìdìpìdì, k'ó yídá é hɛɛ̀da ye tá̰a̰sàdi ò wontà cekedà-nà-di o yuudí, é nì cɔ́á ye pesá. É tódá Kɔ̀ma é hútá ni hḭ́ǹka, kà ní hḭn ye wɔ̀ni kákamú tá̰à̰di. ¹⁹ K'ó pa̰a̰ ye bɛ̀m̀bɛ̀ni yèdi è yɔ̀: Bètɛ́dì, mìì cakú-sa è yɔ̀ Weèdi hɔ̰́ɔ̰̀ta. Ye bɛ̀m̀bɛ̀ni há̰ de hɛ́dí-nà yɔtí tìcɔ̰́tì-dà, kà pà de tì yúu-hɔ̰ è tonà Dùúsì. ²⁰ Kà Sàkɔ́pù é hḭ́ná ye pesá nùdi è yɔ̀: Kà Weèdi n péé-nà è n púsí cà̰ǹkù n kɔ́dí-kù kú mɛhɛkà, kà nì mɛ̀ɛ tṵ́mà n pɛ̰ḭ n kó dii-sá nà n kó báá-sa, ²¹ kà n tóní è koní nà naakú n báà-hɔ̰́ɔ̰̀ta, Kɔ́yɔ̀ɔ-dà kó n'yòǹ n Weèdi. ²² Tá̰á̰dì n cɔ́à-dì mɛnì é nì kpáhìna kákamú kpɛ́ɛdí-dà kó ya̰dá é n'yòǹ Weèdi hɔ̰́ɔ̰̀ta. A kó n pa̰a̰-sá wɛǹni, n kó ya̰dá áa kɔ̰́ɔ̰́-ma, niìya̰ píta mɛhɛká, niìya̰ yècɔ̰́.