Cetáma 31

Ǹtɛ Sàkɔ́pù cocí é yɛ̀ɛ̀-ma kú bookú Dàbánì hɔ̰́ɔ̰̀ta mɛhɛká

¹ Kà Sàkɔ́pù é yekà kà Dàbánì bííhí wɛì è tonà: Sàkɔ́pù fèdà ti báàa de káá-sa wɛǹni. Nà mií-dà ò hḭn-nà-ma kááma yaǹn mɛmà-ní. ² K'ó tṵ́má cɔ́ɔ́ o mɔ́nń é n'hɔ̰́tà, Dàbánì cèhènà yìhìka o hḭ́ǹka. O pa̰á̰ma de koò pú yònà ò de káà tɔ̀ɔ̀-ní kà mà yòm̀pu. ³ Kà Kɔ́yɔ̀ɔ óò caka ye wɔ̀ni è yɔ̀: Yídá é tón a báàa yɔtí, a hɔ̰́ɔ̰́tà-kpɛ́ɛpá pesá, n kó nà m'péé-nà-á-ma.

⁴ Ye kú dàhàka-dà, kà daadí pɛdá, kà Sàkɔ́pù é tɔn hɔ̰́ɔ̰̀ta kà p'óò yíí-ní o poòpa Hàdàsɛ́dì nà Dèyáà, kà pá tɛ̀ni yɛ̀ɛ̀di mɛhɛká ò de cɛ̰nti-sá o nɔtí. ⁵ Kà pá tɛ̀ni, k'ó pà caka è yɔ̀: N cɔ́ɔ́ nɛ báàa yàma, é n'hɔ̰́tà mà koò pú yònà mà de yòm̀pu n hḭ́ǹka. Àmá, Weèdi n báàa kpɛ́ɛdí há̰ n kómú-ma. ⁶ Nɛ mɔ́mpá yá̰á̰-dà è yɔ̀ n deháà nɛ báàa nà n nɔɔ̀ti wɛǹni. ⁷ Nà mɛma baàkaà, k'ó n báńta é cehèna cɔ̀ku píta ò de hḭ́n n kó n'dehú k'ò n bopù-sa n tɔmú kpɛ́mú. Mɛ̀ɛkà, Weèdi pú teháà k'ó n pa̰á̰ sḭ̀ḭ̀ma. ⁸ Kà nɛ báàa de hḭ́n: Nɔtí mɛ̀ǹtì kó n'káá-ti bɛ̀m̀bɛ̀ka-dà kó n'yòǹ a tɔmú bodása, ti wɛǹni de hɔ̰́ pɛdá bíiká nà bɛ̀m̀bɛ̀ka-dà. K'ò mɛ̀ɛ de hḭ́n: Taàcekàdaká kpɛ́ɛtí-dà kó n'yòǹ a tɔmú bodása, ti wɛǹni de hɔ̰́ pɛdá bíiká nà taàcekàdaká-dà. ⁹ Weèdi-dà fèdà nɛ báàa nɔtí é tì nà n kɔ̰́ɔ̰́.

¹⁰ Nɔtí de dáhú tḭ́ń wɔ̀ni ti tɔɔtí, ǹtɛ ká n dɔha é dɛ́há-sa dɔhɔ̀ti mɛhɛká: Ká n dɛ́há kà datí mɛ̀ǹtì de dáhú-ti wɛǹni nití, kà tì káá bɛ̀m̀bɛ̀ka yoo è tɛ̰̀kàpaà yoo è cèkàdà ti tààka. ¹¹ Ye dɔhɔ̀ti mɛhɛká baàkaà, kà Weèdi tɔntɔndikó é n yíí è yɔ̀: Sàkɔ́pù! Kà n yɔ̀: Ǹtɛ mmí. ¹² Kà Weèdi tɔntɔndikó yɔ̀: Diìda é dɛ́há, nɔtí datí wɛǹni mɛ̀ǹtì dáhú-ti nití káá-ma bɛ̀m̀bɛ̀ka yoo è tɛ̰̀kàpaà yoo è cèkàdà ti tààka. N hḭn mɛma mìì tee-sá n dɛ́hà Dàbánì àà pa̰à̰-sa wɛǹni-dà. ¹³ N yòǹ Weèdi-dà mɛ̀n'àà bɛkáà-di-ní ni cɔ̰́ɔ̰̀di Bètɛ́dì a de cɔ́à-sa kákamú tá̰à̰di, é hḭ́ná nùdi è yɔ̀ a kó n'yòǹ n kóoó. Sá̰mà-ní, yídá yɔɔtì mɛntì é kòǹ a hɔ̰́ɔ̰̀ta p'àà pɛdà-sa-ní. ¹⁴ Hàdàsɛ́dì nà Dèyáà kà p'óò tɛ̰́ná è yɔ̀: Ti tṵ́mà de káá-ma yècɛ̰́ɛ̰̀ ti kó ya̰dá hɔɔ̀ta-sá ti báàa hɔ̰́ɔ̰̀ta mɛhɛká-a? ¹⁵ Mɛnń-dà baà ti dìi è yònà ti yòǹ-ma foǹni yam̀ma-a, mɛma dɔ k'ò há̰ ti yɛda é ta̰ǹta ti díící é cì dii? ¹⁶ Káámà Weedì fèdà-mà ti báà pesà, mà yòǹ ti kpɛ́ɛmá-dà tḭ́ńti nà ti bííhí. Pa̰ná sá̰mà, Weèdi a hḭ́mpú wɛǹni. ¹⁷ Ye wɔ̀ni, kà Sàkɔ́pù é cemá yídá é bádí, é diìka o poòpa n'ɔ̀ɔ bííhí bɔnamáti hḭ́ǹka. ¹⁸ K'ó tódá o nɔtí nà kááma ò de káá-ma wɛǹni Pàdáḿ-Àdám̀ teǹka mɛhɛká, é cɛ̰ɛ̰́ cɔ̀ku è kṵnti-nà Kànàáà teǹka mɛhɛká o báàa Isáákì de kaàdi-sá. ¹⁹ Pà pa̰kú mɛma sɔ̀do, kà Dàbánì mɛnn péé o hɔ̰̀ci kpìtìdi céupú nàkàcɛ̰nkú bɛ́ka. Ò p'éè péé-ma, kà Hàdàsɛ́dì é cemá yódá ye wɔ̀ni o báà wàci. ²⁰ Sàkɔ́pù mɛnn mɛ̀ɛkà, ò de sɔɔ̀na-á-dà ò pú cakáà Dàbánì àdàmɛ̀yɛ̰́ɛ̰̀ bookú nìdo è yɔ̀ ò yíti hɔ̰́ɔ̰̀ta. ²¹ K'ó nɛ́údá é ka̰há nà mìì de yòǹ-sa wɛǹni o kpɛ́ɛsá, é taá hɛ̰́ká é deèta fem̀ma kóńkú pà toò-ku Èfáátì, é coá Kàdàhátì ta̰à̰ka bɛ́ka.

Dàbánì bɔ̀haà Sàkɔ́pù óò nɛ̀ǹta Kàdàhátì

²² Data̰a̰ daadí, kà pá táá caka Dàbánì è yɔ̀ Sàkɔ́pù cocí hɔ̰́ɔ̰̀ta. ²³ K'ó tódá o kúcààpa, kà pá tṵṵ̀na o dàhàka é n'yòǹ cèmu daàa kàyehì, é nɛɛ́ ò nɛ̀ǹta Kàdàhátì ta̰à̰ka mɛhɛká. ²⁴ Ye yèǹka, kà pà mum pú dɛ́hà pa tɔɔ̀pa, kà Weèdi é caka dɔhɔ̀ti mɛhɛká Dàbánì àdàmɛ̀yɛ̰́ɛ̰̀ bookú nìdo è yɔ̀: Cɛ̰ɛ̰́ a cɔ̰́ɔ̰̀di! A dá yetá teha é pa̰á̰ sḭ̀ǹya̰ yècḭ́ḭ̀ Sàkɔ́pù. ²⁵ Òò nɛ̀ǹtà-ma, é tɛ̀i è hɔ̰́tà ò kpɛ̰́ḭ́ o yèǹka fḭ́ḭná Kàdàhátì ta̰à̰ka hḭ́ǹka. K'ò mɛ̀ɛ té kpɛ̰́ḭ́ o kpɛ́ɛná n'ɔ̀ɔ kúcààpa ye pesá, è pà hɛ́dí-nà cɛ̰́ma. ²⁶ K'óò wɛɛ́-nà, óò béka è yɔ̀: M̀mɔ́ńya̰-dà a n pa̰à̰-ma ye pesà-ní? Yè cèǹkaà k'á n sɔɔ̀na, é tóó n bíipoohí è hì kɛ̰hɛ̰di-nà è yònà hì yòǹ-ma ta̰à̰pu núm̀ma? ²⁷ Badà pa̰nà k'á n sɔɔ̀na a pú n cakáà, é nɛ́údá é cocí hɔ̰́ɔ̰̀ta? K'à de n cakáà a ka̰há̰ma, è yenì nà nɛ́yɛ̰̀ǹci-dà pà k'áa bɛ́hɛ̀na-má, nà kódìti, nà béèka dawòka, ye wɛǹni k'yé n'yòǹ wɛ̀ɛ̀di mɛhɛká. ²⁸ Bá a há̰ pú hédà ká n cɔa n bíipoohí, nà n yaàbíiká kà pá nɛɛ́ ka̰há. Mɛmà mɛma, a pa̰nà è yònà a yìhìka pú dìi-má-dà. ²⁹ N káá-dà nɔɔ̀ti è kó nɛɛ́ nɛ pa̰á̰ sḭ̀ḭ̀ma. Àmá, Weèdi a báàa tṵ̀n-dí wontà n cakáà yèǹka è yɔ̀ n cɛ̰ɛ̰́ n cɔ̰́ɔ̰̀di, n dá yetá teha áa pa̰á̰ sḭ̀ǹya̰ yècḭ́ḭ̀. ³⁰ N yá̰á̰ è yɔ̀ a yíì-ní, mìì tee-sá a yókáà-nà a báà hɔ̰́ɔ̰̀ta-dà kà ta níkú a káá. Toò, yè há̰ ceǹkaà k'á yódá-ní n wàci? ³¹ Kà Sàkɔ́pù óò tɛ̰́ná ye wɔ̀ni è yɔ̀: N de wampáà-á-ma. N de tonà a kó feèda-á-ma a bíipoohí. ³² Àmá a wàci bɛ́ka, k'à cì dɛ́hà-ko n kóoó kú pesá, ye yaǹn pú kó n'káà fòù. Ti dɛ́ɛ̀ka nìku yìhìka, pɛha n nɛǹti mɛhɛká mìì yòǹ-sa wɛǹni a kpɛ́ɛsá, éè tódá. Ò de pú yá̰á̰ è yɔ̀ Hàdàsɛ́dì-dà de cì yódà-ní.

³³ Ye wɔ̀ni, kà Dàbánì é dúú o yèǹkà-fḭ́ḭkú mɛhɛká é pɛha, é yɛɛ̀ni é dúú Dèyáà kpɛ́ɛkú mɛhɛká é pɛha, é dúú Dèyáà nà Hàdàsɛ́dì pa yoǹyṵpá pa dɛ́ɛ̀ka fḭ́ḭná mɛhɛká é pɛha, ò pú dɛ́hà yècɛ̰́ɛ̰̀. Ò de yɛɛ̀ni Dèyáà fḭ́ḭkú è baà é dúú-ma Hàdàsɛ́dì kpɛ́kú mɛhɛká é pɛha. ³⁴ Mɛnń-dà há̰ baà de cì tódà é cì sɔ̀na bɔnamáku kààdi sàdi fɔ̰̀di, é dìsi é kaàdi ci hḭ́ǹka. Kà Dàbánì é pɛha o fḭ́ḭkú mɛhɛká n'ɔ̀ɔ̀ pɛháà-dà, ò pú dɛ́hà yècḭ́ḭ̀. ³⁵ O báàa de tɛ̀ni-má-ní ye pesá è kó pɛha, k'óò caka è yɔ̀: N báà! A dá yetá kɛ̰̀ḭ nà n pú yíì-ma é nɛɛ̀hi a yìhìka. N péé n fa̰à̰ku mɛhɛká-dà. K'òo báàa mɛ̀ɛ é pɛha o kpɛ́ɛmá wɛǹni, ò pú dɛ́hà yècḭ́ḭ̀.

³⁶ Kà fɔ̰́di é cɛ̰ɛ̰́ ye wɔ̀ni Sàkɔ́pù, k'óò kɛ̰̀ḭ-nà è yɔ̀: Ntɛ́ n yetádi? Sḭ̀ḭ̀ma m̀mɔ́ma-dà m'a pa̰à̰-ma k'à n bɔ̀hɔ̀ta mɛmà kú bookú? ³⁷ A pɛháà n nɛǹti wɛǹni mɛhɛká, m̀mɔ́ńya̰-dà a dɛ́hà-ma k'yè yòǹ a kpɛ́ɛsá? A dɛ́hà-sa, yè bɛka-ní miì n nììpa n'àa kpɛ́ɛpá yìhìka kà pá ti caka ti mɛ̀ǹǹ naa-kó. ³⁸ Beeká púdɛ́ɛ́-dà n pa̰à̰-ma a hɔ̰́ɔ̰̀ta mɛhɛká. A hɔ̰̀fa yoo a bɔɔtá tàcɔ̰́tà pú denà pɛutí, n mɛ̀ɛ pú dii a hɔ̰ɔ̰̀daadí nìcɔ̰́nì daadí yènì. ³⁹ N mɛ̀ɛ tṵ́mà p'áa konà-ní daadí yènì nɔtá kà yɛ̀ɛ̀di nɔtí tà kɔ̀ù. Mmí-dà múńtà de hɔ̰́ toó n yuudí hḭ́ǹka mìì de hɔ̰́ féé-sa wɛǹni. Nɔtí pà de hɔ̰́ yódá-ti wèǹku yoo yèǹka, a de hɔ̰́ tì nà n béka-á-ma bàǹti. ⁴⁰ N dèn-ń-ma sukú náńkú n dii-kú a pesá. Wèǹku n de hɔ̰́ m'mɔdì nà wìku-dà, yèǹka wɔ̀ni kà sémú té nà n kɔ̀dì, n pú kó dɔɔ́. ⁴¹ Háá beeká púdɛ́ɛ́-dà n pa̰à̰-ma a hɔ̰́ɔ̰̀ta. N deháà a bíipoohí hidɛ́ɛ̀ka kpɛ́mú, beeká píta nà kànàhì-dà é nɛɛ́ hì kádá. É yídá deha a kpɛ́mú beeká kàkɔ̀dì é nɛɛ́ dɛ́tá nɔtì mɛntì a pesá. A de hḭ́n a kó nà n bopù-sa n tɔmú kpɛ́mú, k'á yè cèhèna cɔ̀ku píta. ⁴² Kà n báàkpɛ̰́ǹn Àbààhám̀ Weèdi de pú n péé-nà, Weèdi n báàa Ìsáákì de káá-di wantafɔ̰̀di, è yenì a n hédà ká n kòǹ n nɔɔ̀kpehí-dà. Há̰kà, Weèdi mɔ́nní dɛ́hà-á-ma náńkú n dii-kú a hɔ̰́ɔ̰̀ta mɛhɛká, nà wìku n ká̰tà-ku àà dehú. Mɛmá-dà tee wontàko yèǹka, kà ní ta̰ǹta n kpɛ́mú.

⁴³ Kà Dàbánì é tɛ̰́ná Sàkɔ́pù è yɔ̀: Bíipoohì mɛnhì yòǹ n bííhí-dà, kà hi bííhí yòǹ n kpɛ́hí. É yídá kà nɔtì mɛntì yòǹ n kpɛ́ɛtí n'àa mádí-sà miì kú wɛnnì. N kó tṵ́má nɛɛ́ pa̰á̰ ba n bíipohí kpɛ́mú yoo bííhí hì pɛdà-hi kpɛ́mú, yenì kú daadí? ⁴⁴ Ya̰ní sá̰mà-ní kà tí pa̰ná num̀múnní, kà yḭdó é m'péé ti cɔhɔ̀ka mɛ̀ǹǹ kó m'bɛkú-ko è yɔ̀, mmí nà fɔ̰́ń ti pa̰à̰ num̀múnní. ⁴⁵ Kà Sàkɔ́pù é cemá pɛha tá̰à̰di é nì cɔ́á, kà nì yòǹ pa kákamú yḭdó. ⁴⁶ K'ó caka o nììpa è yɔ̀ pá ta̰nka-ní tá̰à̰ka. Kà pá kà ta̰nka-ní, é tɛ̀ni é kà cóá cócóodí. Ye kú dàhàka, kà pá kaàdi ni fɔ̰̀di é dii pa kákamú dipú. ⁴⁷ Kà Dàbánì é pa̰a̰ ye cócóodí yèdi è yɔ̀: Yèká-Sàhàdùtáà. Kà Sàkɔ́pù mɛnn é nì yíí è yɔ̀: Kàdɛ́tì.

⁴⁸ Kà Dàbánì é caka Sàkɔ́pù è yɔ̀: Yenì, ye tá̰à̰kà cócóodì mɛnì-dà kó n'yòǹ yḭdó mɛ̀ǹǹ kó ti n'dehènì-ko, è yɔ̀ mmí nà fɔ̰́ń ti de pa̰à̰ num̀múnní daadí yènì. Ye kú kpɛ́mú-dà tee kà pá pa̰a̰ ye tá̰à̰ka cócóodí yèdi è yɔ̀: Kàdɛ́tì, mìì kpɛ̀i é n'yɔ̀-sa: Cócóodí mɛ̀nì bɛkú-di yècɛ̰́ɛ̰̀ kú pa̰á̰ma. ⁴⁹ Kà pá tṵ́má pa̰a̰ ye tá̰à̰ka cócóodí yèdi è yɔ̀: Mìsìpáà, mìì kpɛ̀i é n'yɔ̀-sa bɛ̀m̀bɛ̀ni pà nɛ̀hù-di è cɔ́dì, mìì tee-sá Dàbánì de yɔ̀: Kɔ́yɔ̀ɔ é ti n'cɔ́dì, mmí nà fɔ̰́ń kà ti yɔ̀ɔ bútá-pu ti tɔɔ̀pa dàhàka. ⁵⁰ K'à tɛ̀i è dià n bííhí náńkú, yoo k'à tódà poòpa tɔɔ̀pa, á n'dèn, yè pú yòǹ nìdo-dà kó sída ye wɛɛmà, àmá Weèdi ni mɔ́nní. ⁵¹ K'ó tɔhɛ̀na é caka Sàkɔ́pù è yɔ̀: Wáńtá tá̰á̰kà cócóodì mɛnì, nà kákamù tá̰á̰dì mɛ̀nì cɔ́í-dì mɛnì, n yè pa̰à̰ ti cɔhɔ̀ka-dà. ⁵² Mií-dà kó n'yòǹ yḭḭ́pa mɛ̀m̀pà kó ti n'dehènì-pa ti pa̰à̰-sa. N pú yònà n yè ha̰tá daadí yènì é coá a bɛ́ka nà yammàhàsḭ̀ka. A mɛ̀ǹta té pú yònà á mà hḭn-ní n bɛ́ka nà yammàhàsḭ̀ka. ⁵³ Àbààhám̀ Weèdi, nà Nàhɔ́ɔ̀ kpɛ́ɛdí, nà pa báàpa kú weèka é n'yòǹ sído ti cɔhɔ̀ka. Kà Sàkɔ́pù mɛ̀ɛ té wɛ̰́ha nà Weèdi o báàa Ìsáákì de káá-di wantafɔ̰̀di kú yèdi. ⁵⁴ É yídá, kà Sàkɔ́pù é tṵ́má pa̰á̰ dɔ̀hɔ̀di Weèdi kpɛ́mú ta̰à̰di hḭ́ǹka é yíí o nììpa ni dimá dipú. Kà pá tɛ̀i é dii ye dimá é yɔ̀a, é cemá weń ye ta̰à̰di hḭ́ǹka.