Cetáma 32

¹ K'yé ya̰dá weka, kà Dàbánì é pìi ká̰ńyɛ̰̀ǹfa é bàsi-nà o bíípoohí n'ɔ̀ɔ yaàbíiká, é pà cɔa, ye wɔ̀ni è há̰ tón é cɛ̰ɛ̰́ o hɔ̰́ɔ̰̀ta cɔ̀ku, é kòǹ. ² Kà Sàkɔ́pù é sɔ̰kadá o cɔ̀ku, kà Weèdi tɔntɔndipá é tɛ̀ni o peètanàpu. ³ Ò pà dɛ́hà-ma, è cemà yɔ̀: Weèdi ta̰ta̰à̰pa-dà cópú miì-ní. K'ó yíí ye pesá è yɔ̀ Màhànàyím̀.

Sàkɔ́pù pa̰à̰-ma kú bookú sɔ̀do é nɛɛ́ peèta-nà o kúpùèyo Èsàyúù.

⁴ K'ó tɔn tɔntɔnkú, kà kú nihí é taá Sèyíì teǹka mɛhɛká, pà tṵ́mà toò-sa Èdɔ́m̀ o kúpùèyo Èsàyúù pesá. ⁵ K'ó pà caka è yɔ̀: Ǹtɛ nùdi nɛ kó taá caka-dí Èsàyúù. Nɛ́ táá n'yɔ̀ o dapàǹn Sàkɔ́pù-dà nɛ tɔn-ní è yɔ̀ n'ɔ́ɔ̀ caka è yɔ̀: Dàbánì hɔ̰́ɔ̰̀ta-dà n de péé-ma é yóka háá é ta̰ntá-nà sá̰kù. ⁶ N káá-ma nɛ̀ci, nà sa̰mmùǹhi, nà hɔ̰̀ci, nà bɔɔhí, è káá dehèpa daapá nà poòpa. N tɔn-hɔ̰ tɔntɔnkú è yɔ̀ pá taá a caka n dakpɛ̰́ǹn, k'á teha é n codá-ma sukú. ⁷ Kà tɔntɔnkú yam̀ma é ka̰há̰, é tóní é tɛ̀ni óò caka è yɔ̀: Ti taá dɛ́há a kúpùèyo Èsàyúù. Ò mɛ̀ɛ té yídà è pení a peètanàpu, è nɔɔ̀-nà nììpa kɔ̀ɔnà nàhì. ⁸ Kà wantafɔ̰̀di é cemá cɛ̰ɛ̰́ Sàkɔ́pù sàma. K'ó totá o nììpa ò de nɔɔ̀-nà-pa, é pà hḭn cɛ̰má màdɛ́ɛ́, é hḭn mɛma o hɔ̰̀ci, n'ɔ̀ɔ bɔɔhí, n'ɔ̀ɔ nɛ̀ci, n'ɔ̀ɔ bɔnamáti. ⁹ O yàma mɛhɛká, ò de tonà: Kà Èsàyúù nɛdà è kɔ̀ù cɛ̰má cecemá yam̀ma, dɛ́ɛ̀ma yam̀ma mɛmpa kó fḭ́tá-ma.

¹⁰ É m'bààsí miya̰, k'ó pa̰á̰ Weèdi-dɔɔ̀mu è yɔ̀: Ó Weèdi! Fɔ̰́ń mɛ̀ǹǹ yòǹ-ko n báàkpɛ̰́ǹn Àbààhám̀ Weèdi, nà n báà Ìsáákì Weèdi, fɔ̰́ń-dà n cakáà è yɔ̀ n tón n yɔtí mɛhɛká, n hɔ̰́ɔ̰́tà-kpɛ́ɛpá pesá, a kó pa̰ná kà niìi wɛǹni ní n'sudi n kpɛ́mú. ¹¹ Kɔ́yɔ̀ɔ, n pú sànà pa̰á̰suumá a n pa̰à̰-ma wɛǹni, nà cɔ́díma a bɛkáà-ma mmí a tɔntɔnto hḭ́ǹka. N de pení è toó-ní n ya̰kú cɔ̰́ɔ̰̀di-dà, é tɛ̀ni deèta Sùùtɛ̰́ɛ̰̀ kóńkù mɛnkù. Yenì kú daadí, ǹtɛ kà n kṵnti è totà nììpa nà nɔtí cɛ̰má màdɛ́ɛ́. ¹² Sá̰mà-ní m'a sɛ́úkú-ma, n dontá n kúpùèyo Èsàyúù nɔ̀ku mɛhɛká, n ò wani-í-ma sàma. N wani w'aa tɛ̀ni-má-dà-ní é n kɔ̀ù, é pɛ́ɛ́ kɔ̀ù-nà n poòpa nà n bííhí. ¹³ Deǹta è yɔ̀ a de n cakáà è yɔ̀: A kó pa̰ná kà niìi wɛǹni ní n'sudi n kpɛ́mú. È yɔ̀, a kó wɛ́kàna n yaàbíiká kà ká n'wɔ̰ǹti è yònà hà̰à̰ɔ̀a, é cemá bátá ye pesá, é weń ye kú yèǹka. K'ó deèda o kááma mɛhɛká, niìya̰ yècɔ̰́ ò kó pa̰a̰-sá o kúpùèyo Èsàyúù k'yé n'yòǹ pa̰dí. Ye niìya̰-dà de héé: ¹⁵ Bɔɔnihí kɔ̀ɔnà dɛ́ɛ́, bɔɔdaàka púdɛ́ɛ́. Hɔ̰ɔ̰̀nicí kɔ̀ɔnà dɛ́ɛ́, nà hɔ̰ɔ̰̀daàka púdɛ́ɛ́. ¹⁶ Bɔnamáti nití púta̰a̰ nà ti bíiká, kà tì káà kà mɛhìnì. Naànicí púnàhì, nà naàdaàka píta. Sa̰mmùǹhi nihí púdɛ́ɛ́, nà dahí píta. ¹⁷ K'ó totá totá ye nɔtí cɛ̰má dɔ́ɔ́di, é tì kɔ̰́ɔ̰́ o dapàm̀ma, é pà caka è yɔ̀: Pá nihí yìhìka. È yɔ̀: Pá pa̰a̰ boòma, nɔtí cɛ̰má nà mà tɔɔ̀ma cɔhɔ̀ka. ¹⁸ K'ó kɔ̰́ɔ̰́ nùdi o dapàǹn cecedó è yɔ̀: Kà n kúpùèyo Èsàyúù àà pètà-nà tḭ́ń wɔ̀ni, àà békáà è hḭ́n: Wodà héé a dakpɛ̰́ǹn? A kɔ́dí ya? Wodà tee ye nɔtì a túdí-tì-ní? ¹⁹ K'á ò tɛ̰́ná è yɔ̀: O dapàǹn Sàkɔ́pù-dà yè tee. Pa̰dí-dà w'àà pɛ̰ḭ-má-ní n dakpɛ̰́ǹn. O mɔ́nń tṵ̀n-ní dàhàka. ²⁰ K'ó tɛ̰́ná ye wɛɛ-nùdi ni cɔ̰́ɔ̰̀di dɛ́ɛ̀do, nà ta̰á̰ko, nà tɔɔ̀pa mɛ̀m̀pà kú wɛǹni baà de túdí-pa nɔtí. K'ò yɔ̀: Kà nɛ́na baà ò pètà-nà, kà nɛ́ ò n'tɛ̰́nì ye wɛɛ-nùdì ni cɔ̰́ɔ̰̀dì. ²¹ Nɛ té tuɛ̀ha è yɔ̀: O dapàǹn Sàkɔ́pù tṵ̀n-ní dàhàka. O de hḭn mɛma, è màhu è tonà ó bókàna Èsàyúù fɔ̰́di-dà nà pa̰ká ò de nihìnà-ka yìhìka, ye wɔ̀ni kà pá nɛɛ́ peèta, k'yè púdí k'óò codá sukú. ²² K'ó nihìna yìhìká, nɔtí ò de kó táá ò pa̰a̰-tí, k'òo mɔ́nń cá̰ńtá ye pesá é weń ye kú yèǹka.

Sàkɔ́pù mɔ̀di nà Weèdi

²³ Ye yèǹka ka cɔ̰́ɔ̰̀di mɛhɛká, k'ó yídá é tódá o poòpa pa dɛ́ɛ̀ka, nà pa yoǹyṵpa pa dɛ́ɛ̀ka, n'ɔ̀ɔ bííhí píta nà tàcɔ̰́, é pà dèhèna kóń-dafá pà toò-fa Yàbɔ́kì. ²⁴ K'ó pà dèhèna é pɛ́ɛ́ dehèna-nà kááma ò de káá-ma wɛǹni. ²⁵ Ye wɔ̀ni, k'ó cá̰ńtá o cɔ̰́ɔ̰̀di ye pesá. Kà nìdo òcɔ̰́ǹ é tɛ̀ni, óò màa-nà háá nà kóókɔncí. ²⁶ Ye yaǹn hɔ̰́tà-ma ò pú kó nɛɛ́ ò hɛ́í tá, k'ó potá o kpékàfa kà fá nampa. ²⁷ K'yèe nìdo yɔ̀: N wɛ́í ká n ka̰há̰, yè wekú-ma-ní. Kà Sàkɔ́pù óò tɛ̰́ná è yɔ̀: N pú k'áa wɛ́í k'á ka̰há̰, k'à pú n kónà. ²⁸ K'yèe nìdo óò béka è yɔ̀: A yèdi tonà ba? K'ò yɔ̀: N yèdi tonà Sàkɔ́pù-dà. ²⁹ K'yèe nìdo yɔ̀: A yèdi koò pú kó n'tonà Sàkɔ́pù. A yèdi-dà kó n'dɛɛ̀ Ìsìdàyɛ́dì, mìì tee-sá a màa nà Weèdi, é màa nà nììpa é tódá yuudí. ³⁰ Kà Sàkɔ́pù óò béka è yɔ̀: Fɔ̰́ń tá, a yèdi mɛ̀ɛ té tonà ba? K'óò tɛ̰́ná è yɔ̀: Badà k'à békú n yèdi? Ye wɔ̀ni, k'yèe nìdo óò kóná ye pesá. ³¹ Kà Sàkɔ́pù yɔ̀: N nɔ̀ǹfa dɛ́hà Weèdi, kà n há̰ káà fòù? Ye mɛmá-dà, k'ó pa̰a̰ ye pesá yèdi è yɔ̀ Pènúɛ́dì, mìì kpɛ̀i n'yɔ̀-sa: Weèdi yìhìka. ³² Kà wèǹku n'kó náá-ní, k'ò yɔ̀a yídápu Pènúɛ́dì é sɔ̰kadá o cɔ̀ku, è sóhí mìì tee-sá o kpékàfa de nampáà. ³³ Mɛmá-dà tee háá nà yenì, kà Ìsìdàyɛ́dì bííhí pú yon nɔtí búkédi mam̀bíidí mɛ̀nì péé-di kpékàfa tukanása pesá, mìì tee-sá Weèdi de potà Sàkɔ́pù kpékàfa, é nampa mɛní-dà.