Cetáma 35

Sàkɔ́pù yídà Sìsɛ́m̀ yɔtí é táá kaàdi Bètɛ́dì

¹ Ye kú dàhàka, kà Weèdi caka Sàkɔ́pù daadí yènì, è yɔ̀: Yídá ye bɛ̀m̀bɛ̀nì mɛnì. Taá kaàdi Bètɛ́dì. K'à tɛ̀i ye pesá, k'á n maá dɔ̀hɔ̀di cɔ̰̀ǹcɔ̰̀ni. Ye pesá-dà n de a bɛkáà-ma n cɔ̰́ɔ̰̀di a de cokù tḭ́ń daadí a kúpùèyo Èsàyúù. ² Ye wɔ̀ni, k'ó caka o hɔ̰́ɔ̰́tà-kpɛ́ɛpá nà mɛ̀m̀pà de ò péé-nà-pa wɛǹni, è yɔ̀: Deèda-nà nɛ cɔhɔ̀ka wàci nɛ toó-cí, é wekàna nɛ cɔ̰́ɔ̰̀di, é cehèna nɛǹti. ³ Kà nɛ yɔ̀a miya̰, kà nɛ́ pa̰á̰ sɔ̀do, ti kɔ́dí Bètɛ́dì-dà. Ye pesá-dà n kó taá maá-ma dɔ̀hɔ̀di cɔ̰̀ǹcɔ̰̀ni Weèdi kpɛ́mú. Mɛní-dà de n tempáà-nà, n de péé tḭ́ń daadí náńkú mɛhɛká, è de é tṵ́má n bɛ́hɛ̀na n cà̰ǹku wɛǹni mɛhɛká. ⁴ Ye wɔ̀ni, kà pá hɛɛ̀da wàci pà de toó-ci wɛǹni óò kɔ̰́ɔ̰́, é dèù-nà pa too-mána pà de tɔ̰hí-nà, óò kɔ̰́ɔ̰́. Ye wɔ̀ni, k'ó yè dáná teesàpu mùcɔ̰́mù kú fɔ̰̀di kà mù tɔ́sí-nà Sìsɛ́m̀ yɔtí.

⁵ Pà yíti tḭ́ń wɔ̀ni ye pesá, kà Weèdi é pa̰ná kà wantafɔ̰̀sàdi é cɛ̰ɛ̰́ nììpa mɛ̀m̀pà kú yɔtí de tɔ́-tɔ́sí-pa ye pesá, bá p'oòcɔ̰́ǹ pú teháà é pádá kṵnnɔ̀ǹfa é pà tṵ̀na. ⁶ K'ó ta̰ntá yɔtí pà toò-ti Dùúsì, kà tì péé Kànàáà teǹka mɛhɛká, n'ɔ̀ɔ nìku mɛ̀ǹkù de ò nɔɔ̀-ku wɛǹni. Ye yɔtí-dà pà toò-ma yenì Bètɛ́dì. ⁷ K'ó tɛ̀i é maá ye pesá dɔ̀hɔ̀di cɔ̰̀ǹcɔ̰̀ni, é yíí ye bɛ̀m̀bɛ̀ni è yɔ̀: Bètɛ́dì Weèdi, mìì tee-sá ye pesá-dà Weèdi de ò bɛkáà-ma ni cɔ̰́ɔ̰̀di ò de cokù tḭ́ń daadí o kúpùèyo. ⁸ Kà Dèbòdáà, poòo mɛ̀ǹǹ de yɔ̰ɔ̰̀daà-ko Hèdèbèkáà é kpíí, kà p'óò dáná Bètɛ́dì fɔ̰̀ɔ̰̀ma, teesàku kùcɔ̰́kù kú fɔ̰̀di. Ye wɔ̀ni, é kù pa̰a̰ yèdi è yɔ̀: Kpíi-dawòka teekú.

⁹ Kà Weèdi é tṵ́má óò bɛka ni cɔ̰́ɔ̰̀di ye pesá, k'ò kṵnti-ní nà Pàdáḿ-Àdám̀. Kà ní tṵ́má óò kóná, ¹⁰ è yɔ̀: A yèdi-dà de dɛɛ̀ Sàkɔ́pù. Sá̰mà-ní, pà koò pú kó nà n'tonà mɛma. A yèdi-dà kó n'dɛɛ̀ Ìsìdàyɛ́dì. Mɛmá-dà Weèdi ò pɛ̰ḭ-má yèdi è yɔ̀: Ìsìdàyɛ́dì. ¹¹ Kà ní tṵ́má óò caka è yɔ̀: Mmí-dà yòǹ Weèdi nɔɔ̀ti wɛǹni kpɛ́ɛdí. N k'áa pa̰a̰-á-ma bííhí sàma, k'yé teha kà fùka dɔ́ɔ́di nà wóópa é ya̰dá é yɛɛ̀ni a fɔ̰̀di k'á n'yòǹ ka yàdo. ¹² Teǹka n de pɛ̰ḭ-ká Àbààhám̀ nà Ìsáákì, n mɛ̀ɛ té kà n'à pɛ̰ḭ-ḭ́-ma. Bá k'à ya̰dà koò pú kadí, n kó kà pa̰a̰-á̰-ma a yaàbíiká. ¹³ Weèdi ò wɛɛ̀-nà-ma mɛma é yɔ̀a, ye wɔ̀ni kà ní dìsi hḭ́ǹka óò hédá. ¹⁴ K'ó pɛha tá̰à̰di é tṵná ye pesá. Ye wɔ̀ni, é tóó kɔ̀ma nà dìfɛ̰ɛ̰̀ pa̰dí é hútá ni hḭ́ǹka, é nì kpáhìna kákamú tá̰à̰di. ¹⁵ K'ó pa̰a̰ yèdi ye bɛ̀m̀bɛ̀ni weèdi de ò wɛɛ̀-nà-di, è yɔ̀: Bètɛ́dì, mìì kpɛ̀i n'yɔ̀-sa Weèdi hɔ̰́ɔ̰̀ta.

Bɛ̀ǹsàmɛ́ɛ̀ pɛdáma nà Hàdàsɛ́dì kṵ́mú

¹⁶ Kà pá yídá Bètɛ́dì, é n'yòǹ yɔtí pà toò-ti Èfààtáà bɛ́ka, é n'káà sá̰á̰ cɔ̀ku, kà ta̰nta̰ǹni kaá cɛ̰́masí n'ɛ̀ɛ yɔtí, kà Hàdàsɛ́dì é pɛdá cɔ̀ku mɛhɛká. Ye pɛdáma mɛ̀ɛ de dɔǹ-ń-ma dɛ́dɛ́í. ¹⁷ K'ó n'káá mɔ̀ù-nà pɛdáma dɔnkú k'yè kpenì, kà popɛkànɔ óò caka è yɔ̀: Ò dá n'wani, bíídatá-dà tṵ́mà dɛ̀ɛ̀ ò pɛdà-ma. ¹⁸ Há̰kà, Hàdàsɛ́dì de kɔ̰́ńti-í-dà. K'ó n'kó tɔ̰ɔ̰̀ta tḭ́ń wɔ̀ni, é pa̰a̰ ye bíitá yèdi è yɔ̀: Bɛ̀ń-òníì, mìì kpɛ̀i n'yɔ̀-sa "Yikàǹfɔ̀ùka bíitá". Kà ta báàa mɛnn é tà yíí è yɔ̀: Bɛ̀ǹsàmɛ́ɛ̀, mìì kpɛ̀i n'yɔ̀-sa "N hiòma bíitá". ¹⁹ Kà Hàdàsɛ́dì é kpíí, kà p'óò dáná Èfààtáà yɔtí cɔ̀ku bɛ́ɛ́kú. Ye yɔtí-dà pà tṵ́mà toò-ma yenì Bɛ̀tìdɛ̀ɛ́m̀. ²⁰ Kà Sàkɔ́pù é tṵná tá̰à̰di o híúdi hḭ́ǹka. Ye tá̰à̰di-dà pà káà toò-ma nà yenì, Hàdàsɛ́dì híúdi tá̰à̰di. ²¹ Mii yɔ̀a-má, k'ó sɔ̰kadá o cɔ̀ku háá nà bɛ̀m̀bɛ̀ni pà toò-di Mìkìdá-Èdɛ́ɛ̀, é tɛ̀i é kpɛ̰́ḭ́ ye pesá o fḭ́ḭná. ²² Ò de kaàdi ye pesá-dà, k'òo Pɔ̀ɔ Hùdùbɛ́nì é taá dɔɔ́-nà o poòo sàmɔ́ǹn Bìdáà. Kà Sàkɔ́pù é mà yèkà, yè p'óò naakáà. Sàkɔ́pù de káá bíídahí píta nà hìdɛ́ɛ́-dà.

²³ Ǹtɛ bíídahí Dèyáà de ò pɛɛ̀-nà-hi: Hùdùbɛ́nì-dà de héé Pɔ̀ɔ, k'ó yídá é tṵ́má pɛdá Sìmɛ̀ɔ́ɔ̀, nà Dèfí, nà Sùdáà, nà Ìsàkáà, nà Sàbùnɔ́ɔ̀. ²⁴ Bíídahí, Hàdàsɛ́dì de ò pɛɛ̀-nà-hi, dà héé: Sòsɛ́fù nà Bɛ̀ǹsàmɛ́ɛ̀. ²⁵ Bíídahí, Hàdàsɛ́dì yoǹyṵṵ́ Bìdáà de ò pɛɛ̀-nà-hi, dà de héé: Dánì nà Nɛ̀fùtàdíì. ²⁶ Bíídahí, Dèyáà kú yoǹyṵṵ́ Sììpáà de ò pɛɛ̀-nà-hi, dà de héé: Kàátì nà Àsɛ́ɛ̀. O bíídahí nùdi-dà ye pesà-ní, pà de ò pɛdà-hi-ní Pàdáḿ-Àdám̀ teǹka mɛhɛká.

Ìsáákì kṵ́mú

²⁷ Kà Sàkɔ́pù é yíí-ní ye pesá, é kòǹ o báàa Ìsáákì de kaàdi-sá, kà p'èè tonà Màmùdéè, k'yè hɛ́dí-nà Kìdíá-Àbáà, yɔtí pà toò-ti yenì Hèbùnɔ́ɔ̀. Àbààhám̀ nà Ìsáákì de kaàdi-í-ma ye pesá. ²⁸ Ìsáákì fòùmu beeká nùdi de yòǹ, beeká kɔ̀ta nà púniì-dà. ²⁹ K'ó kpíí é hɔ̰́tá o yààpa, è kpɛ̰́ń sukú è dɛn fòùku. K'òo bííhí, Èsàyúù nà Sàkɔ́pù óò dáná ye pesá.