Cetáma 34

Sìsɛ́m̀ dɔɔ́-nà Dìnáà nà nɔɔ̀ti, k'òo datɔ̰ɔ̰̀pa é yeda o kpɛ́mú

¹ Daadí yènì, kà Dìnáà, Dèyáà de pɛdà-ta bíipoòta nà Sàkɔ́pù, é yɛ̀ɛ̀ é táá ye yɔtí bíipoohí dɔɔ̀pu. ² Ye yɔtí kpɛ̰́ǹn yèdi-dà de dɛɛ̀ Hàmɔ́ɔ̀, k'ò yòǹ Hítìpa bookú. K'ó tɛ̀i, kà Sìsɛ́m̀, ye yɔtí kpɛ̰́ǹn bíitá óò dɛ́há, óò cɛ̰ɛ̰́ é táá ò dɔɔ́-nà nà nɔɔ̀ti. ³ Kà Sìsɛ́m̀ yàma é dɔdi o hḭ́ǹka dɛ́dɛ́í, k'óò dɔ́ka sàma. K'ó pɛha ò kó hḭmá n'ɔ̀ɔ wɛmá mɛhɛká, kà sepàǹn yàma é fidí o bɛ́ka. ⁴ K'ó caka o báàa Hàmɔ́ɔ̀ è yɔ̀: Taá n pɛha bíipootà mɛntà, n kpɛ̀i é tà n'káá-ma. ⁵ Kà Sàkɔ́pù é yekà Sìsɛ́m̀ de yɔ́kànà-ma kú bookú o bíípoòta Dìnáà. Y'àá de hɔ̰́tà-ma o bííhí káà kaá-ho yɛ̀ɛ̀ka mɛhɛká è cɛ̰nti o nɔtí tá, k'ò yɔ̀ wá̰mu ò pú pa̰nà yècḭ́ḭ̀, é ceí kà pá koní. ⁶ Kà Sìsɛ́m̀ báàa Hàmɔ́ɔ̀ é taá Sàkɔ́pù pesá, è k'óò kɔ̰̀dà-nà ye wɛmá hḭ́ǹka. ⁷ K'ó tɛ̀i kà pá mà n'kɔ̰̀di, ye wɔ̀ni kà Sàkɔ́pù bííhí é konà-ní yɛ̀ɛ̀ka, é tɛ̀ni è hɔ̰́tà pà mà wɛì. Pà mà yèkaà tḭ́ń wɔ̀ni, é n'hɔ̰́tà cɔ̀di sàdi-dà pà pà tèe-má, ye wɔ̀ni kà fɔ̰́di pà cɛ̰dí, nà Sìsɛ́m̀ de dɔɔ́-nà-ma pa potɔ̰ɔ̰̀ɔ̰. Ò de pa̰à̰ mìì pú yònà è pa̰á̰-sa-dà Ìsìdàyɛ́dì teǹka mɛhɛká. Yè de yòǹ sɔ̀kací-dà. ⁸ Kà Hàmɔ́ɔ̀ é pà caka è yɔ̀: N bíitá Sìsɛ́m̀-dà sɛdáà nɛ sepàǹn dɛ́dɛ́í. Ò n'ɔ̀ɔ̀ pa̰a̰-nà k'óò tódá óò n'káá, n nɛ sɛ́úkú-ma. ⁹ Héé-nà kà tí dɔá poopḭ̀-cɔ̀ku ti cɔhɔ̀ka, kà tí n'kání nɛ sepàm̀ma, kà nɛ kání ti kpɛ́ɛpá. ¹⁰ Ye wɔ̀ni, ti kó teha-á-ma kà nɛ́ tɛ̀ni é pɛ́ɛ́ ti m'péé-nà, kà yɔtí n'yòǹ nɛ kpɛ́ɛtí. Nɛ kó nɛɛ́ kaàdi-í-ma miì é n'centì nɛ kpɛ̀kaàma, é dɛ́tá teǹka é teeka. ¹¹ Kà Sìsɛ́m̀ mɔ́nń é caka bíipoòta báàa nà ta datɔ̰ɔ̰̀pa è yɔ̀: Nɛ sɛùdamá kpɛ́mú, n kó bodá-ma nɛ kó n béka-sá wɛǹni. ¹² Nɛ́ n béka cɛ̀kèti sàma nà pa̰ká dɔ́ɔ́di, n kó bodá-ma ye wɛǹni. Nɛ́na baà hédá ká n tódá ye bíipootà é tà n'káá.

¹³ Kà Sàkɔ́pù bííhí é tɛ̰́ná Sìsɛ́m̀ n'ɔ̀ɔ báàa wɛɛsoóma, mìì tee-sá ò de yɔ́kànà pa potɔ̰ɔ̰̀ɔ̰ Dìnáà-dà. ¹⁴ Kà pá pà caka è yɔ̀: Ti pú kó nɛɛ́ kɔ̰́ɔ̰́ ti potɔ̰ɔ̰̀ɔ̰, nìi mɛ̀ǹǹ pú ca̰ntà-ko k'óò n'káá. Yè kó n'yòǹ yɔ́hɔkú-dà ti pesá. ¹⁵ N'aa teha-má bààsí kà nɛ daapá wɛǹni é ca̰ntá é n'yònà ti yòm̀pù. Mɛmá cɔ̰́ɔ̰̀di-dà nɛ kó hḭmá, kà tí nɛɛ́ teha nɛ cɔhɔ̀di. ¹⁶ Ye wɔ̀ni, ti kó nɛɛ́ n'kání-ma ti tɔɔ̀pa, kà nɛ́ ti n'kɔ̰́nì nɛ potɔ̰ɔ̰̀pa, kà ti nɛ kɔ̰́nì ti kpɛ́ɛpá. Ye wɔ̀ni, kà tí pɛ́ɛ́ nɛ m'péé-nà, kà tí hḭn nìku kùcɔ̰́. ¹⁷ Kà nɛ há̰ pú teháà mɛma é ca̰ntá, ti kó ta̰ǹta-á-ma ti potɔ̰ɔ̰̀ɔ̰, é ka̰há̰.

¹⁸ Kà Hàmɔ́ɔ̀ n'ɔ̀ɔ bíitá Sìsɛ́m̀ é teha pà de hḭ́mpú. ¹⁹ Kà dapàǹn é kòǹ, é tɛ̀i ò pú ceí kà wɔ̀ni óò ha̰tá, k'ó cemá cetá ye niìi pa̰á̰pu, mìì tee-sá ò de kpɛ̀i Sàkɔ́pù bíipoòta sàma-dà dɛ́dɛ́í. Ò há̰ de mà yòǹ mɛma è yòǹ niìsào-dà o hɔ̰́ɔ̰́tà-kpɛ́ɛpá wɛǹni mɛhɛká, kà p'òò kàǹ. ²⁰ Kà pá taá mɛnń n'ɔ̀ɔ báàa, bɛ̀m̀bɛ̀ni nììpa de hɔ̰́ peèta-dí, kà nì hɛ́dí-nà pa yɔtí há̰ńnùdi, é tɛ̀i é caka pa yɔtí nììpa è yɔ̀: ²¹ Nììpà mɛmpà yòǹ wɛ̀ɛ̀di nììpa-dà, pà pú maàhu sḭ̀ḭ̀ma ti hḭ́ǹka. Tí pà hédá kà pá kaàdi ti teǹka, é pa̰ná pà kpɛ̀i-sá wɛǹni. Yɔtí pɛsì-í-dà dɛ́dɛ́í pa kpɛ́mú. Ti kó nɛɛ́ n'kání-ma pa bíípoohí, kà pà kání ti kpɛ́hí. ²² Àmá pà yɔ̀, kà pá nɛɛ́ teha kà tí pɛ́ɛ́ m'péé é hḭn nìku kùcɔ̰́, ti yònà é teha-á-ma é ca̰ntá ti daapá wɛǹni, é n'yònà pà yòm̀pu. ²³ Kà ti teháà è hḭn mɛma kà pà tɛ̀ni è ti péé-nà, mìì héé-sá wɛǹni pa nɔtí nà pa kááma, yè pú kó m'pení k'yé hḭn ti kpɛ́ɛsá dò? ²⁴ K'yèe yɔtí daapá wɛǹni mɛ̀m̀pà de tɛ̀ni-pá-ní ye peètamá bɛ̀m̀bɛ̀ni pesá, é teha Hàmɔ́ɔ̀ n'ɔ̀ɔ bíitá Sìsɛ́m̀ de hḭ́mpú. Ye wɔ̀ni, kà pá ca̰ntá ye yɔtí daapá wɛǹni. ²⁵ Daata̰a̰ daadí, ye wɔ̀ni kà dɔnkú káà pà pèhèǹta dɛ́dɛ́í, kà Sàkɔ́pù bííhí hìdɛ́ɛ́, Sìmɛ̀ɔ́ɔ̀ nà Dèfí, Dìnáà datɔ̰ɔ̰̀pa, kà pá hɛɛ̀da pa seepɛ̰ɛ̰̀ká, é sékápa é dúú ye yɔtí mɛhɛká, kà ti yam̀ma kaàdi è de pú maàhu yècɛ̰́ɛ̰̀ kú hḭ́ǹka, kà pá tɛ̀i é kɔ̀ù daapá wɛǹni. ²⁶ Kà pá pɛ́ɛ́ kɔ̀ù Hàmɔ́ɔ̀ n'ɔ̀ɔ bíitá Sìsɛ́m̀, é deèna-ní pa potɔ̰ɔ̰̀ɔ̰ Dìnáà Sìsɛ́m̀ hɔ̰́ɔ̰̀ta mɛhɛká, óò kònà. ²⁷ Ye wɔ̀ni, kà Sàkɔ́pù bííhí tɔɔhí é tɛ̀ni, é tóńka pà de kɔù-pa wɛǹni kááma, é haàdi n'ɛ̀ɛ yɔtí wɛǹni kááma, mìì tee-sá pà de yɔ́kànà pa potɔ̰ɔ̰̀ɔ̰-dà. ²⁸ Kà pá tódá pa hɔ̰̀ci, nà pa bɔɔhí, nà pa nɛ̀ci, nà pa sa̰mmùǹhi, nà mìì kú wɛnnì baà de péé-sa ye yɔtí mɛhɛká, nà yɛ̀ɛ̀ka mɛhɛká. ²⁹ Kà pá kodá pa kááma wɛǹni é ka̰há̰-nà, é pɛ́ɛ́ tóó-nà pa poòpa nà pa bííhí, nà mìì kú wɛǹni de péé-sa hɔ̰́ɔ̰́hí mɛhɛká.

³⁰ Ye wɔ̀ni, kà Sàkɔ́pù é caka Sìmɛ̀ɔ́ɔ̀ nà Dèfí è yɔ̀: Nɛ pɔ́dà n yuudí-dà sàma. Nɛ n kpáhìnà niìsḭ̀ǹn-dà yɔɔtì mɛntì kú yam̀ma yìhìka. N pú káá nììpa sàma. Yɔtí yam̀ma, Kànàáà yam̀ma nà Pèdísìpa kó nɛɛ́ kɔ́hɔka-á-ma pa tɔɔ̀pa, é tɛ̀ni é n ta̰á̰-nà, ye wɔ̀ni é n nɛdá é n kɔ̀ù é pɛ́ɛ́ kɔ̀ù-nà n hɔ̰́ɔ̰́tà-kpɛ́ɛpá wɛǹni. ³¹ Kà p'óò tɛ̰́ná pa dɛ́ɛ̀di è yɔ̀: Ti potɔ̰ɔ̰̀ɔ̰-dà ò kó diìda-má dɔ́ɔ́ko?