Cetáma 39

Sòsɛ́fù Pòtìfáà hɔ̰́ɔ̰̀ta mɛhɛká

¹ Ye Ìsìmàyèdítìpa de tanà-ma Sòsɛ́fù Èsípútì teǹka mɛhɛká, é tɛ̀i kà Pòtìfáà-dà óò dontá. Ye Pòtìfáà mɛ̀ɛ de yòǹ niìsào-dà wódo nahà̰ku mɛhɛká. Ò de tṵ́mà yòǹ mɛ̀m̀pà ceí-pa wódo nahà̰ku kpɛ̰́ǹn-dà. ² Kà Weèdi m'péé-nà Sòsɛ́fù Èsípútì teǹka mɛhɛká. Kà n'ɔ́ɔ̀ tempa-nà ò de pa̰kú-sa wɛǹni mɛhɛká, k'yè tɔ̀dì. Ò de tɛ̀ni è péé o dakpɛ̰́ǹn, ye Èsípútì nìdo hɔ̰́ɔ̰̀ta mɛhɛká-dà. ³ K'òo dakpɛ̰́ǹn bantá é n'hɔ̰́tà Weèdi ò péé-nà. K'ò pa̰à̰-sa wɛǹni, Weèdi de hɔ̰́ héé k'yé teha-á-ma. ⁴ Kà Sòsɛ́fù dɛ́tá yuudí o dakpɛ̰́ǹn pesá, k'óò tódá k'òò tempú-nà o tɔná mɔ́nná mɛhɛká. K'òo dakpɛ̰́ǹn Pòtìfáà yɔ́ ò kɔ̰́ɔ̰́ kpɛ̰́ǹti o hɔ̰́ɔ̰̀ta hḭ́ǹka, n'ɔ̀ɔ kááma wɛǹni hḭ́ǹka k'ò yè cɔ́dì. ⁵ Ye kpɛ̰́ǹti kɔ̰́ɔ̰́ma kú dàhàka-dà, kà Weèdi kóná ye Èsípútì nìdo kpɛ́ɛsá wɛǹni, nà Sòsɛ́fù kú nɔɔ̀ti. Kà ní kóná ò de káá-sa wɛǹni hɔ̰́ɔ̰̀ta mɛhɛká, n'ɔ̀ɔ yɛ̀ɛ̀ka mɛhɛká. ⁶ Ye wɔ̀ni, kà Pòtìfáà taàa Sòsɛ́fù nɔ̀hi mɛhɛká, o kpɛ́ɛsá wɛǹni è koò pú n'wɛ̰̀si yècḭ́ḭ̀, o dipú cɔ̰́ɔ̰̀di bààsí.

Sòsɛ́fù n'ɔ̀ɔ dakpɛ̰́ǹn Pòtìfáà poòo Sòsɛ́fù há̰ de yòǹ nìi-mɔ́nń-dà, è tṵ́mà sudi yikà-suukú sàma mɔ́ma.

⁷ K'yé m'péé, k'òo dakpɛ̰́ǹn poòo óò dɔ́ka, é n'dɔ́sí óò dɔɔ́-nà. K'ó caka Sòsɛ́fù è yɔ̀: Ya̰ní é n dɔɔ́-nà! ⁸ Kà Sòsɛ́fù yeda, óò caka è yɔ̀: Yè pú kó dii. N dakpɛ̰́ǹn n dań-ma sàma mɔ́ma, mɛmá-dà tee k'ó taàa o hɔ̰́ɔ̰́tà-kpɛ́ɛsá wɛǹni n nɔ̀hi mɛhɛká, è koò pú wɛ̰̀si yècḭ́ḭ̀. ⁹ Òcɔ̰́ǹ kɔ́ɔ́ hɔ̰́ɔ̰́tà mɛntà kú mɛhɛká, mɛ̀ǹǹ kú kpɛ̰́ǹti tṵ́mà ha̰tà-ko n kpɛ́ɛtí. N dakpɛ̰́ǹn pú n yedáà yècɛ̰́ɛ̰̀ kú pḭ́ḿpu hɔ̰́ɔ̰̀ta mɛhɛká, fɔ̰́ń bààsí mìì tee-sá a yòǹ o poòo-dà. Ntɛ́ y'àá kó tṵ́má hḭmà-dà, kà n sɔkàpà mɛma kú bookú, é pa̰ná sḭ̀ḭ̀ma Weèdi yìhìka? ¹⁰ K'yèe poòo baà n'sɔ̰kù daàka wɛǹni, òò wɛì-nà ye hḭ́ǹka, è yɔ̀ óò dɔɔ́-nà, ò mɛ̀ɛ p'óò bekù.

¹¹ Daadí yènì, kà Sòsɛ́fù dúú hɔ̰́ɔ̰̀ta mɛhɛká o tɔná pa̰á̰pu, ye daadí k'yèe hɔ̰́ɔ̰̀ta tɔntɔm̀ma tɔɔ̀pa yè kɔ́ɔ́. ¹² K'yèe poòo tɛ̀ni cɛ̰ɛ̰́ o tókédi è yɔ̀: Ya̰ní n dɔɔ́-nà. Kà Sòsɛ́fù kutìnà é fḭ́tá, k'òo tókédi cá̰ńtá ye poòo nɔ̀hi mɛhɛká, k'ó cocí yɛ̀ɛ̀ tapáàdi. ¹³ Poòo hɔ̰́tà-ma òò hédà o tókédi o nɔ̀hi mɛhɛká é cocí yɛ̀ɛ̀ tapaàdi tá, ¹⁴ k'ó dedí é yíí o hɔ̰́ɔ̰̀ta tɔntɔm̀ma, é pà caka è yɔ̀: Dentá-nà, ye Hèbùdéè nìdo n dɔɔ̀o ti toó-ko-ní, dà de kpɛ̀i é ti yɔ́kàna. Ò tɛ̀ni n pesá-dà è yɔ̀ ò kó n dɔɔ́-nà, ká n yeda é kpákada sukú. ¹⁵ W'àá hɔ̰́tà-ma n kpekànì boòku è kpákádí è yúu nììpa tá, k'ó wɛ́í o tókédi n pesá, é cocí yɛ̀ɛ̀ tapaàdi. ¹⁶ Ye wɔ̀ni, kà poòo hḭ́ná ye tókédi o kòkèdi, háá é ceí kà Sòsɛ́fù dakpɛ̰́ǹn koní. ¹⁷ Ò koní-ma-ní, é tɛ̀ni kà poòo óò caka è yɔ̀: Ye núǹn Hèbùdéè a ti toó-ko-ní, dà tɛ̀ni n pesá è kpɛ̀i é n yɔ́kàna. ¹⁸ W'àá hɔ̰́tà-ma n kpekànì boòku, è kpákádí è yúu nììpa tá, k'ó wɛ́í o tókédi n pesá é cocí yɛ̀ɛ̀ tapaàdi.

Sòsɛ́fù kódeedí dúúma

¹⁹ Sòsɛ́fù dakpɛ̰́ǹn yeèkaà-ma miya̰ o poòo nùdi tá, kà fɔ̰́ɔ̰́di cemá ò cɛ̰ɛ̰́ dɛ́dɛ́í. ²⁰ K'ó cɛ̰ɛ̰́ Sòsɛ́fù óò ká̰ńtá kódeedí mɛhɛká, pa yɔtí wódo de kpenì-sa o kú kpenáti. Mɛmá-dà Sòsɛ́fù dúú-ma kódeedí. ²¹ Kà Weèdi m'péé-nà Sòsɛ́fù kódeedí mɛhɛká, óò bɛka ni pa̰á̰suumá. K'ó dɛ́tá yuudí ye kódee-cedo kpɛ̰́ǹn pesá. ²² K'óò kɔ̰́ɔ̰́ kpɛ̰́ǹti o kpenáti tɔɔtí hḭ́ǹka. Mɛnń-dà de nihù yìhìka, tɔná kpenáti de pa̰kú-na wɛǹni. ²³ Kódee-cepá kpɛ̰́ǹn de koò pú tṵ̀n è cɔ́dì tɔná ò de kɔ̰́ɔ̰̀-na Sòsɛ́fù, mìì tee-sá Weèdi de ò péé-nà è té hédá k'ò pa̰à̰-sa wɛǹni k'yé teha.