Cetáma 40

Wóódo dapàm̀ma pàdɛ́ɛ́ kódeedí dúùmá

¹ K'yé m'péé, kà Èsípútì wódo dapàm̀ma pàdɛ́ɛ́, kà pà dehú o nahà̰ku mɛhɛká, óò pa̰ná kpákpààma. Dapàǹn òcɔ̰́ de yòǹ ye wódo naàma yam̀ma kú kpɛ̰́ǹn-dà, kà tɔɔ̀o yòǹ mɛ̀m̀pà de ò pa̰kú-pa pɛ̰́ɛ̰̀pa kú kpɛ̰́ǹn. ² K'yé dɔnka wódo, ye dapàm̀ma pa dɛ́ɛ̀ka hḭ́ǹka. O naàma yam̀ma kpɛ̰́ǹn nà mɛ̀m̀pà de ò pa̰kú-pa pɛ̰́ɛ̰̀pa kú kpɛ̰́ǹn. ³ K'ó pà cɛ̰ɛ̰́ pa dɛ́ɛ̀ka, é pà yɛ̰̀ḭ kódeedí. Mɛ̀m̀pà de ceí-pa o nahà̰ku kpɛ̰́ǹn de nihí ye kú kódeedí-dà. Ni cɔ̰́ɔ̰̀di mɛhɛká-dà mɛ̀ɛ dɛɛ̀, pà mɛ̀ɛ té de kpeé-ma Sòsɛ́fù. ⁴ Kà ye wódo nahà̰-ceépa kpɛ̰́ǹn é pà kɔ̰́ɔ̰́ Sòsɛ́fù, k'ò dehú pa kpɛ́mú. Kà pá kɔ̀ù daàka ye kódeedí mɛhɛká.

Dɔhɔ̀ti ye wódo dapàm̀ma dɔháà-ti, nà cakàma Sòsɛ́fù kɔ̰́ɔ̰̀-ma ti hḭ́ǹka

⁵ Daadí yènì, yèǹka kàcɔ̰́ kú mɛhɛká, k'yèe wódo dapàm̀ma, naàma yam̀ma kú kpɛ̰́ǹn nà pɛ̰́ɛ̰̀-pa̰á̰pa yam̀ma kú kpɛ̰́ǹn é dɔha dɔhɔ̀ti ye kódeedí mɛhɛká. Bá mɛ̀ǹǹ dɛ̀ɛ̀, k'òo dɔhɔ̀ti káá ti cakú-sa. ⁶ K'yé weka ká̰ńyɛ̰̀ǹfa, kà Sòsɛ́fù tɛ̀ni pa pesá, é pà dɛ́há kà pà kàdi kà pa yàma pú na-naa. ⁷ K'ó pà béka è yɔ̀: Badà kà nɛ kaàdi kà nɛ yàma pú na-naa yenì-ní? ⁸ Kà p'óò tɛ̰́ná è yɔ̀: Ti dɔháà dɔhɔ̀ti-dà ti dɛ́ɛ́dì-ní, òcɔ̰́ǹ há̰ kɔ́ɔ́ miì mɛ̀ǹǹ kó nɛɛ́ ti caka-kó tì tonàpu. Kà Sòsɛ́fù yɔ̀: Weèdi cɔ̰́ɔ̰̀di-dà hɔ̰́ nɛɛ́ caka nìdo dɔhɔ̀ti tonàpu. N caka-nà-ní nɛ dɔhɔ̀ti. ⁹ Kà wódo naàma yam̀ma kú kpɛ̰́ǹn é caka o dɔhɔ̀ti è yɔ̀: Mmí, n dɔhɔ̀ti mɛhɛká, n dɛ́hà teetá pà pa̰kú-nà-ta kú bíiká-dà dìfɛ̰ɛ̰̀, kà tà nɛ̀hi n yìhìka. ¹⁰ K'yèe teetá káá dɛ̀màma màta̰a̰. Kà tá mɔntà, é cemá pa̰á̰ pémú, é tiìda é pɛdá pɛ́ɛ-sɔ̰ɔ̰̀ka kà kà bii. ¹¹ È hɔ̰́tà n toó Wóódo naà-bondedí n nɔ̀ku mɛhɛká. K'á n tɔ̰ɔ̰̀ta ye pɛ́ɛ-sɔ̰ɔ̰̀ka é nípú ka nɛ́ɛmá ye naà-bondedí mɛhɛká, óò kɔ̰́ɔ̰́. ¹² Kà Sòsɛ́fù óò caka ye wɔ̀ni è yɔ̀: Ǹtɛ a dɔhɔ̀ti tonàpu: Ye dɛ̀màmà màta̰a̰-ní, yòǹ daàa kàta̰a̰-dà. ¹³ Daàa kàta̰a̰ mɛhɛká, wódo kó tón é dentá a de ò pa̰à̰-sa sídàma mɛhɛká, ye wɔ̀ni áa deèna kódeedí mɛhɛká, áa tɛ̰́ná tɔmú a de cetá ò m'pa̰kú-pu, k'á tṵ́má óò n'kɔ̰́nì o naà-bondedí. ¹⁴ Há̰kà, kà niìya̰ wɛǹni dɔɔ̀haà a bɛ́ka k'yè coó, a dá yetá dúí n kpɛ́mú wódo pesá. K'á pa̰á̰ nììma é wɛ̰́ɛ̰́ wɛɛ́-nà wódo n kpɛ́mú, k'ó n deèna kódeedì mɛnnì kú mɛhɛká. ¹⁵ Pà n dènà-ní Hèbùdéèpa yɔtí mɛhɛká nà nɔɔ̀ti-dà, é tɛ̀ni miì bá n pú pa̰à̰ yècḭ́ḭ̀ mìì sànà-sa pá n taàa kódeedí mɛhɛká, kà pá nì n'à tàa.

¹⁶ Wóódo pɛ̰́ɛ̰̀-pa̰á̰pa yam̀ma kpɛ̰́ǹn hɔ̰́tà-ma òò cakáà o dɔhɔ̀ti suumá hḭ́ǹka, k'ò yɔ̀: Ǹtɛ n kpɛ́ɛtí. Mmí, n kú dɔhɔ̀ti mɛhɛká, n dɔháà è toó n yuudí hḭ́ǹka, pɛ̰́ɛ̰̀ cɛ̰́ńcɛ̰́ɛ̰ká náńyà̰a̰cí cìta̰a̰-dà. ¹⁷ Hḭ́ǹka kú náńyà̰fa dèǹdèǹfa mɛhɛká, kà wódo naanà-ka pɛ̰́ɛ̰̀ cɛ̰́ńcɛ̰́ɛ̰ká wɛǹni péé fa mɛhɛká. Kà nɛ̀hi há̰ kɔ́dì-ní è cɔ̀m̀pu ye pɛ̰́ɛ̰̀ cɛ̰́ńcɛ̰́ɛ̰ká ye náńyà̰fa mɛhɛká n yuudí hḭ́ǹka. ¹⁸ Kà Sòsɛ́fù óò caka è yɔ̀: Ǹtɛ a kú dɔhɔ̀ti tonàpu: Ye náńyà̰cì ci ta̰a̰kà-ní, yòǹ daàa kàta̰a̰-dà. ¹⁹ Daàa kàta̰a̰ mɛhɛká, wódo kó tón é dentá a de ò pa̰à̰-sa sídàma mɛhɛká. Ò mɛ̀ɛ kó yè dentá a de pú kpɛ̀kaàma-dà, ye wɔ̀ni áa deèna-ní kódeedí mɛhɛká, áa dúná wɛ̰̀ku teepú hḭ́ǹka, kà nɛ̀hi tɛ̀ni é cɔmpà a màǹci.

²⁰ K'yèe daàa kàta̰a̰ ka̰há̰, kà wódo pɛdáma kúúdi daadí tɛ̀ni, k'ó béná dimá é yíí o kpɛ̀ti wɛǹni. Ye wɔ̀ni, ti yìhìka, k'ó deèna-ní ye o dapàm̀ma pa dɛ́ɛ̀ka, é tón é dentá bá pa mɛ̀ǹǹ dɛ̀ɛ̀ko de ò pa̰à̰-sa sídàma mɛhɛká. ²¹ Ye wɔ̀ni, é tɛ̰́ná naàma yam̀ma kpɛ̰́ǹn o tɔmú mɛhɛká, k'ó tṵ́má óò n'kɔ̰́nì o naà-bondedí. ²² É yídá, pɛ̰́ɛ̰̀-pa̰á̰pa yam̀ma kú kpɛ̰́ǹn mɛnn, k'óò dúná wɛ̰̀ku é n'yònà Sòsɛ́fù baà de hḭ́mpú. ²³ Nà mɛma baàkaà, ye naàma yam̀ma kú kpɛ̰́ǹn pú dentà Sòsɛ́fù kpɛ́mú, k'óò dúí pépédí.